تجربتي مع الأفلام القصيرة - الجزء الثاني

الكشك .. فيلم بتمويل من الإتحاد الأوروبي بيتكلم عن التسرب من التعليم و عمالة الأطفال في مصر. حموده طفل كان بيحب الكتابة و كان شاطر في المدرسة بس ظروفه العائلية كانت السبب أن أمه تخاليه يسيب المدرسة و يشتغل في كشك عند عم علي. و في وسط الشغل بيمسك كشكوله و بيحلم بقصة الأرجوز اللي كان بيكتبها في المدرسة. و في الأخر حموده رجع مدرسته و قصته كسبت المركز الأول في المسابقه. الفيلم مدته ١٠ دقائق و من إخراج جهاد عبد الناصر.

فاضي من جوه .. فيلم تابع للمعهد العالي للسينما بيتكلم عن الفراغ اللي بنحس بيه و كأننا فاضين من جوا و بنعمل كل حاجه بس من غير إحساس. دا ممكن كمان نعمل الحاجة و عكسها، نتفرج على البرامج الدينيه و نسمع أغاني بعدها على طول. دا ممكن نسمع أغنية مهرجانات من غير ما بتهز فينا شعره. فيلم مدته ٤ دقائق و من إخراج جهاد عبد الناصر. الجديد في الفيلم دا إن مافيش حوار.

١+١=١ .. فيلم ل محمد منصور بيتكلم عن التشتت اللي جوا كل شخص مننا. بيحكي عن الظاهر و الباطن في كل موقف من مواقف الحياه العاديه جداً، يعني ممكن تكون بتدي فلوس للراجل الغلبان في الإشارة عشان عايز تساعده أو عشان عايز تظهر كإنسان كريم. الفيلم مدته ٥ دقائق و بيوصل الفكره بشكل صريح عن طريق الشاشة المقسومه.

الحذاء الأحمر .. فيلم ل فوزية حسن مدته ٧ دقائق و بيحكي عن البنت اللي بتبيع في محل جزم و بيعجبها جزمه لونها أحمر و بسببها صاحب المحل بيرفدها و بتمشي بدري و تركب الميكروباص اللي فيه الإرهابي اللي بسببه بتفقد قدميها. بيناقش فكرة إن مافيش داعي للندم عشان اللي بيحصل و توابعه صعب يتغير تاني أو يرجع زي ما كان.

شيفون .. فيلم مدته ١٠ دقائق ل رامي رزق الله. الفيلم بيحكي قصة شريحة مش صغيرة من البنات اللي أهلهم بيقرضوا عليهم الحجاب لمجرد أنهم كبروا! البنات اللي مش بيكونوا واثقين هل هما حلوين ولا وحشين عشان كان بيتداروا و السبب أنهم مختاروش أبسط قرار في حياتهم .. مختاروش لبسهم. و كمان بيظهر الضغوط اللي بتتعرضلها البنت لو قررت تقلع الحجاب، خطيبها هيقول أيه و أهلها. في الأخر الحجاب مش هو المشكله بس البنات محتاجه حرية الإختيار.