لعبة الحياة
في أغنية ل"علي الحجار" أسمها "هي دي الحياة" هي من كلمات "عبد الرحمن الأبنودي" و من ألحان "عمر خيرت". أهم حاجة طلعت بيها من الأغنية هي أن الحياة بطبيعتها فيها ضحك و فيها دموع و هي دي لعبة الحياة، الصح أنك تعيش الضحكتين و تخبي الدمعتين!! تعالوا نطبق الأغنية دي على الواقع، كام مرة الحياة لاعبتك؟ كام مرة الحياة بعتتلك ضحك؟ كام مرة الحياة بعتتلك دموع؟ كام مرة ضحكت أنت ف كنت السبب أن غيرك يضحك؟ كام مرة نزلت دموعك ف كنت السبب أن الناس تقولك معلش؟ لو شاركت ضحكك ف هتفيد نفسك و غيرك، طاقة حلوة و الناس بتحب الضحك عشان كل واحد مستحمل نفسه بالعافيه أصلاً. بس لو شاركت دموعك ف في الأغلب محدش هيعمل حاجة لأن محدش في أيده حاجة و ال معلش بتكون هي الحل! من غير فلسفة كثير، بس الأغنية أسمها "هي دي الحياة" و فعلاً هي دي الحياة! و في الأخر بس عايزة أشكر الخال عبد الرحمن الأبنودي (رحمه الله) على الكلمات دي و عمر خيرت على الموسيقى دي و علي الحجار على الصوت دا :)