تجربتي مع الأفلام القصيرة - الجزء الأول
المنور .. فيلم من تأليف و إخراج ماجي مرجان، بطولة أمينة خليل و محمد خان. بيحكي عن نادين و جوزها رمزي و جارها عادل و مامتها. نادين عندها مشاكل في الإنجاب و بتعمل حاجة أسمها IVF و كل مرة مش بتنجح و لكن عندها أمل أنها في مرة هتنجح. أهم جملة في الفيلم اللي مدته ١٧ دقيقة تقريباً بالنسبة لي هي "الأمل مبيغرقش .. بيعوم على وش المياه".
فستان .. فيلم من إخرج إلبير مكرم . بيحكي عن أزاي "الأزمة في العقول" ما بين تربية البنت و الولد و عن إن قد أيه كلمة عيب دي كلمة مطاطه و مفهومها بيختلف حسب أنتي بنت ولا أنت ولد. و بيوضح المفاهيم المغلوطة في تربية البنات و إن الحل مش في الشدة خلاص لأن بسنت كانت بتعمل كل حاجة بس من ورا أمها. مدة الفيلم تقريباً ٢١ دقيقة.
جوانتي .. فيلم من تأليف ، إخراج ماجي مرجان، بطولة دينا عمر. بيحكي عن الفرق بين قبل الجواز و بعد الجواز عن طديق أنها بتحكي عن أيديها. قبل الجواز كانت بتلبس جوانتي و تخاف عليهم بس بعد الجواز بتلبس الجوانتي بس لما بتغسل المواعين. مدة الفيلم ٤ دقائق و بتحكي فيهم حال بنات كثير أوي.
ضفاير .. فيلم من تأليف أمير نسيم و إخرج جون اكرم. "أكيد العصافير معندهمش ضفاير"! فيلم مدته ١٥ دقيقة بيحكي عن الحرية و خوف الأهل اللي ممكن يخلق عقد للعيال. زي أن البنت متفرحش بشعرها الطويل و لازم تضفره و لما قررت تقصه أمها برضو مش راضيه.
زي الرجاله .. فيلم من إخراج روماني سعد مدته ٦ دقائق. بيحكي لو مجتعنا ذكوري أو لاء، على لسان الدكتورة مها يوسف و وجهة نظرها في إزاي الرجاله هما بس اللي بيعملوا الصح. "كلام رجاله" و الست المحترمه تمشي "زي الراجل".
سعيد يعني هابي .. فيلم ٩ دقائق من تأليف و إخراج ماجي مرجان بيحكي عن أحلام و أماني بنت مكملتش تعليمها بعد الإعدادية في الصعيد بس عشان جالها عريس موظف من القاهره! ف سابت كل حاجه ورا ظهرها و ركزت بس في الخضار و العيش و المحشي!
Comments
Post a Comment