باي باي ٢٠١٦
أهم سؤال بسأله لنفسي في بداية ٢٠١٧ هو: أيه هي ال "ليه" بتاعتي؟ what is my why؟ .. أيه اللي ممكن يخاليني أصحى من ٥ و نص الصبح؟ طب أيه اللي بيخاليني أنام من ٩ و نص بليل؟ طب أيه اللي بخاليني أشغل يومي بالشغل و بالقراءه و بالتدوين و بغيرهم؟ دي عينة منن الأسئله و الإجابة هتكون هي الهدف .. هدفي في الحياة!!
في أواخر ٢٠١٦ دخلت فيلم collateral beauty، و دا ممكن أعتبره من أحسن أفلام ٢٠١٦. طلعت منه ب درس مهم جداً و هو أن في ٣ مسلمات في الحياة و هما: الحب و الوقت و الموت! هنفضل نشاكس فيهم طول ما إحنا عايشين. نطلع من حب و ندخل في غيره و الحياة مش بتقف ولا هتقف على حاجة ولا على حد! حدود الوقت و الصراع بتاع إستغلاله اللي مش هيقف غير بوقوف دقات قلوبنا، طب أنام ولا أشتغل؟! الموت يمكن دي اللحظه الوحيده اللي لما بنشوفها قدامنا كل حاجة في حياتنا بتقف و بتهدأ لفترة من الزمن!
في ٢٠١٦ أتعلمت أن في يوم هتنام و تصحى أحسن من أي وقت فات! في موقف معين بتعيشه و بعده الحياة بتتغير ١٨٠ درجة!
في ٢٠١٦ أتعلمت أن حياتنا ممكن نختصرها في شوية فقرات .. زيها زي أي برنامج! فقرة مدرسة و بتخلص تيجي الجامعة و بتخلص يجي الشغل!
في ال٢٠١٦ أتعلمت أن مهما في ناس في حياتك بتحبك و بتحبهم بس مفيش حد بيقدر يعيش مكانك أو يقرر بدلك! في أوقات بيكون لازم تتملك حياتك و قراراتك!
أهم إنجازات ٢٠١٦ بالنسبة لي و على الصعيد الشخصي جداً .. أني أتخرجت من الجامعة الألمانية في القاهرة و بتقدير أمتياز مع مرتبة الشرف. و أشتغلت في multinational company بعد ما خلصت إمتحاناتي ب أسبوع! و للأسف دا بقا إنجاز في زمن القهاوي!!
أهم تحديات ٢٠١٧ بالنسبة لي و على الصعيد الشخصي جداً .. أني أحافظ على شغلي و أنجز فيه. و أني أسعى في الماجيستر. و أني أخسر شويتين من وزني!! و أني أكتب هنا على المدونة مرتين في الأسبوع. و أطبق فكره الhappy jar في ٢٠١٧ و أكتب كل يوم حاجة واحدة حلوة حصلت. و أني أنظم حياتي عن طريق الأجندة بتاعت مفكرة ل٢٠١٧.
و أول قرار لسنة ٢٠١٧ هو: أستنوني على المدونة كل أتنين و خميس طول ٢٠١٧!!
كل سنة و أنتم طيبين !!!
Comments
Post a Comment