التونتيز قي مجال العمل

بما أني دلوقتي في العشرينات (داخله على ال23)، ف دا وقت معقول أكتب فيه عن العشرينات و الحاجات اللي من وجهة نظري مهم أنها تتحقق في العشرينات. بالنسبة لي هو دا الوقت اللي بتبدأ تكبر و تتحمل مسؤولية نفسك أكثر من قبل كدا، دورك أنك تكون عون نفسك في الدنيا أو على الدنيا. دا الوقت اللي بتكون حر نفسك فيه، الوقت اللي بتبدأ فيه تتعرف على اللي أنت عايزه من حياتك بجد. في العشرينات بتبدأ تعرف شغفك الحقيقي أيه! لو أنت في العشرينات دلوقتي، تأقلم مع أنك متلخبط و تأقلم مع أنك بجد تلميذ في مدرسة الحياة.

في العشرينات لازم تجرب كثير أوي، جرب تشتغل و جرب تقعد في البيت و جرب تسافر و جرب تقعد لوحدك و جرب تقعد في زحمة و جرب تروح الصحرا و جرب تقعد على البحر و جرب أكل جديد و جرب تسهر و جرب تنام بدري و جرب تشوف الشروق و جرب تشوف الغروب و جرب تهرب من نفسك و جرب تهرب جوا نفسك. جرب كل حاجة برا راحتك أو أخرج برا الcomfort zone بتاعتك. جرب كل حاجة و عكسها، لحد ما ترسى على بر! 
في العشرينات مش لازم تقارن نفسك بأي حد من زمايلك بتوع المدرسة ولا الجامعة. هتلاقي ناس بتتجوز و ناس بتخلف و ناس بتبدأ career و ناس بتلف العالم و ناس بتأسس شركتها الخاصة، و أنت هتلاقي نفسك في مكان لوحدك مختلف عنهم. دلوقتي أنت عايش بتوقيتك أنت و طبعاً ل خطتك أنت!! مش عشان دفعتك طلعوا من أولى ل ثانية يبقى أنت لازم تعمل زيهم يا أما تكون فاشل و ساقط، المرة دي الوضع مختلف تماماً.

طبيعي أن في العشرينات تكون لسا متخرج جديد و داخل مجال العمل جديد، أول شغلانة بجد و بحقيقي في حياتك. مش بس تدريب ولا شغل جنب الدراسة، بس دا شغل بجد و بتقييم حقيقي و مفيهوش هزار! ف ك واحدة في الموقف دا دلوقتي، في كام نقطة عايزة أقولهم من واقع تجربتي:

• من الطبيعي أنك تحط أهدافك رقم واحد و تحققها عشان تثبت نفسك في مكانك الجديد. حتى لو أتقال عليك أناني!
• أعرف كويس أن وقت الشغل مفيهوش غير الشغل، و برا الشغل مافيهوش أي حاجة لها علاقة بالشغل ولا حتى تبص في الإيميل. عشان تعرف توزن الحياة صح و تعيشها صح.
• النظام مهم! مهم أنك من يوم السبت بليل تنظم الهدوم اللي هتلبسها خلال الأسبوع و الشنطة اللي هتنزل بيها كل يوم (يفضل متتغيرش كثير خلال الأسبوع).
• متبصش في الموبايل أول ما تفتح عينك ولا تبص في الأيميل و الto-do list أول لما توصل الشغل. عشان لما تشوف كل الnotifications و الأحداث و الحاجات اللي وراك دي من بدري كدا، هتبدأ تحس ب ضغط و سلبية. بس لو أستنيت بعد ما تفوق و تدخل في المود، الموضوع هيكون أحسن بكثير. و كمان أقرأ كل إيميلات اليوم قبل ما يخلص عشان ميتزحمش، و أمسح اللي مش مهم!
• لازم تحترم كل الdeadlines و تحترم كلمتك و تشتغل ب أقسى طاقتك عشان تثبت نفسك في الشغل صح. 
• مكانك في الشغل لازم يكون منظم برضو، كل حاجة في مكانها الصح و مافيش زحمة أوي عشان تقدر تركز.
• أشتري أجندة كل سنة (أنا بستخدم الأجندة بتاعت مفكرة و مبسوطه بيها جداً)، و أكتب فيها كل يوم وراك أيه و علم على كل حاجه تخلص عشان تحس بالإنجاز في يومك.
• عشان تركيزك يزيد، جرب أنك تشتغل لمدة 25 دقيقة متواصل و أنت قافل الموبايل و مش بتعمل أي حاجة غير اللي في أيدك و بس، و بعدها خد break خمس دقائق. و دي طريقة بومودارو عشان تنجز!
• أتعلم كثير، خاليك واثق أن التعليم مش بيخلص في المدرسة ولا في الجامعة. عشان أي مجال عمل مش ثابت، بالعكس دا متغير جداً ف لازم تدرس كثير و تطور من نفسك كثير جداً.

و كفاية كدا على دوز يوم الأثنين :)