أهل مصر

من أحلى الأغاني اللي سمعتها في حياتي! #أهل_مصر لما قرروا يعلنوا عن نفسهم بعدوا تماماً عن المأساويات و وجع القلب اللي ممكن يجيب نتيجة عكسية تماماً عن المتوقع من التبرع! عملوا أغنية و جابوا فنانين محبوبين جداً و جابوا حالات #حروف حقيقية، و كتبوا كلمات بتقشعر الجسم من كثر الحلاوه و التفاؤل.

بيقولوا لك "شوف بقلبك مش بعينك" بلاش تكون سطحي و تحكم على شخص من شكله اللي ملوش أي يد فيه! عشان "تعرف جمال اللي حواليك" و عشان كمان "تغير مفهوم اللي شايف كل حاجة من برا و خايف يسأل إزاي؟ و ليه؟" عشان ببساطة مفيش إجابة لأن الإنسان ملوش أي يد في شكله ولا في أي حادثة ممكن تحصل له! "مع أن أهم حاجة الروح، الجوهر زي كتاب مفتوح" و نرجع تاني نقول أن أهم حاجه الروح و الجوهر مش الشكل و الملامح! "أنا إنسان مش بس جروح، عندي أمل عندي طموح" بص أعمق شوية لأن كلنا واحد و عندنا أحلامنا و طموحنا.

"قول لهم ما يخافوش مني، اللي فيا دا غصب عني! فهمهم أنه مش إختياري دي حاله طارقه بدون إنذار" مش معنى أن الشكل مختلف شويتين و فيه علامات أن الناس تخف و تكش! "مين فينا هيقف ضد النار" عشان تحكم على غيرك (كدا كدا مش حقك بس ماشي) لازم تكون بتعرف تقف في وش النار!! "ألمهم مش حاجه بعيدة، ممكن يكون له نهايه سعيده" أكيد هيكون له نهايه سعيده!!

اللي عايز يعمل تغيير حقيقي و يتبرع؛ يا ريت يتبرع لأول مستشفى حروق في مصر عشان يتم إنقاذ ضحايا حوادث الحروق في مصر!! الموضوع مش سهل و له تأثير جسدي و نفسي على الضحية!