إعلانات الخير

كل رمضان المؤسسات الخيريه بتتسابق عشان تجميع التبرعات؛ كانوا فاهمين أن كل ما هتوجع قلب المشاهد كل ما هيتبرع!! السنة دي الفكرة دي أتغيرت و من وجهة نظري هو دا الأحسن. دلوقتي البهجه تكسب!! بمعنى أن الإعلان بينشر الأمل و التفاؤل بدل وجع القلب؛ الناس بقيت تستمتع بالإعلان بدل ما يغيروا القناه و كمان بيحفظوا الغنوه و متأكده إن دا ممكن يأثر على التبرعات و تزيد كمان!!

و من وجهة نظري دول هما أحلى 3 إعلانات لمؤسسات خيريه في رمضان 2016.

#1: إعلان مستشفى أهل مصر لعلاج الحروق تحت إشراف "هبه السويدي" تم إنشاء مؤسسة "أهل مصر" و منها بدأ علاج حالات الحروق و دعمهم نفسياً و مادياً كمان. المستشفى لسا تحت الإنشاء بس هدفها إنها هتتكفل بعلاج حالات الحروق لأن الحروق من أكثر الحوادث اللي بتحتاج مرعاه و علاج طويل المدى. ممكن تتبرع برسالة قيمتها 5 جنية على 9899 أو التبرع في حساب رقم 9899 في كل البنوك المصرية أو عن طريق الموقع الرسمي www.ahl-masr.org أو عن طريق فوري بأسم "مستشفى أهل مصر للحروق". عملوا أغنية مبهجه جداً و أسمها "شوف بقلبك مش بعينيك" و فيها مجموعة فنين كبيرة جداً و مبهجين جداً برضو زي: أمينه خليل و أسر ياسين و بشرى و ماجده زكي و أنجي المقدم و جميلة عوض و عمر السمره و يسرا اللوزي و هنا شيحة و  تامر حبيب و أحمد فهمي و محمد زيدان و حسام الحسيني و أحمد مجدي و رزان مغربي و مجموعة كبيرة جداً من الناس المبهجه بجد.

 #2: إعلان مؤسسة مجدي يعقوب لعلاج القلب تحت إشراف دكتور "مجدي يعقوب" قام بإنشاء مستشفى مجاني لعلاج أمراض القلب في أسوان. ممكن تتبرع عن طريق رقم الحساب 19731 في جميع البنوك المصريه أو عن طريق المندوب لما تتصل على 19731 أو من خلال فوري عملوا أغنية مبهجه و أسمها "أرسم قلب" للتوعيه لهم و مع مشاركة ناس جميلة زي: نيلي كريم و هشام جمال و أبطال مسرح مصر و دنيا سمير غانم و محمد حماقي و إسعاد يونس و boy band و محمود الخطيب و حازم إمام و حسام غالي و رمضان صبحي و غيرهم من أبطال الكوره. 

#3: مستشفى سرطان الأطفال 57357 بطلة الإعلان هي "حنين" بكل عفوية و طاقة رسمت بسمة على وشوشنا كلنا "بقالي ساعه بصه" و "أقول أي كلام .. أهبل يعني". ممكن تتبرع عن طريق رقم الحساب 57357 في كل البنوك المصريه أو رساله على 57357 قيمتها 5 جنية. 

و دا درس متهيألي؛ الإعلانات اللي بتعلم مش شرط تكون خياليه و مش شرط تكون بتقطع القلبو مش شرط تمون بتعمل مقارنه بين ظروف الحياة المختلفه بين الناس. بس شرط تكون بتسيب إنطباع حلو للي بيشوفها و مشجعه للخير.