Graduate to be
و بعد أربع سنين من التعليم الجامعي؛ أنتهت الرحلة .. بتنتهي الرحلة!! أربع سنين خلصوا بكل حاجة حلوة و كل حاجة وحشة. دخلت الجامعة عندي 18 سنة و بتخرج عندي 22 سنة؛ و زي ما الجيش هو "مصنع الرجال"؛ الجامعة هي "مصنع الإنسان". سنين الجامعة هي اللي بتساعدك تطور من نفسك عشان تتغير تماماً عن الشخصية اللي دخلت بها الجامعة. الأربع سنين دول مش بس درجات و مشاريع و صحاب و بس كدا؛ و لكن الأربع سنين دول هما "مرحلة إنتقالية"!! أربع سنين بيكونوا نهاية 19 سنة تعليم (حضانة و إبتدائي و إعدادي و ثانوي و جامعة) و بداية 45 سنة شغل (60 سنة سن المعاش و ناقص 15 سنة تعليم مدرسي).
في الأربع سنين دول: عرفت أني بحب الكتابة جداً؛ و بدأت أكتب في مدونتي و روزاليوسف و غيرهم. و في الأربع سنين دول بدأت أكون رئيسة تحرير لمجلة قانونية و لمجلة الناصية.
في الأربع سنين دول: عرفت أن حياتي ملكي أنا و نفسي لها عليا حق. أتعلمت أن السنة اللي بتخلص مبيجيش غيرها تاني؛ ف مينفعش أسيب حياتي تخلص من غير أستمتاع و شغف بالحياة.
في الأربع سنين دول: عرفت ناس كثيرة جداً و بحبهم جداً؛ يمكن أوحش حاجة في التخرج أني مش هشوف الناس دول كل يوم تاني زي الأول.
في الأربع سنين دول: أنا دخلت الجامعة بتكسف جداً أتكلم قدام الناس و مش بحب كدا؛ بس و أنا بتخرج أهو في الأربع سنين دول عملت في حدود ال20 presentation و لإن مكنش أكثر.
في الأربع سنين دول: طلعت في الGreek campus عشان أتكلم عن المجلة القانونية قدام قاعة مليئه بالبشر و كلهم قانونين!!
في الأربع سنين دول: نزلت بنك و أتدربت فيه؛ لدرجة أن العملاء مكنوش بيعرفوا يفرقوا بيني و بين الموظفين. و نزلت IBM و برضو أعتبرت نفسي واحده من الموظفين اللي مسؤولين تماماً عن الشغل.
في الأربع سنين دول: أتعلمت أكون قد كلمتي و ملتزمة ب مواعيدي مهما حصل؛ و أفتخر بأني منتمية للجامعه الألمانية في القاهره.
بالصدفة أنهرده شوفت فيديو ل"أحمد الشقيري" كان بيتكلم مع الطلبة على أن بعد التخرج الأزمه مش في "النجاح الخارجي" و لكن في "النجاح الداخلي". المشكلة مش في الشغل و النجاح في الشغل؛ و لكن النجاح الداخلي و الإحساس بالإكتفاء و الشبع الداخلي.
فيديو مهم يتشاف لكل شخص هيتخرج من الجامعة.
من الأخر يعني؛ سنين الجامعة مبتتعودش عشان كم الخبرة اللي بنتعلمها! و كم التجارب اللي بنأخدها! و كم الناس اللي بنتعرف عليها! و كم الغلطات اللي ممكن نعملها و نصلحها ويتقال عليها "طيش شباب"!! نصيحة لكل شخص لسا في "حياة الجامعة":
"أوعى تخسر الفرص دي؛ أوعى تطلع منها زي ما دخلتها!!"
Comments
Post a Comment