Social Media Summit 2015- Tip (6)

السوشيال ميديا و الصحافه؛ دا المكان بتاعي إلى حد ما يعني. دلوقي و في عصر السوشيال ميديا مبقناش بنهتم أوي بالصحافه المطبوعه أو الجرايد يعني؛ و كل أهتممنا راح للأونلاين و المصادر الألكترونيه. الأسباب كثير بس يمكن أهمها أن وقت تركيزنا أقل من زمان و عايزين الخبر بسرعه كدا؛ و يمكن كمان عشان مش بنحب العربي الفصحى بتاع الجرايد و بنحب المصري و بيوصلنا أسرع. دلوقتي كل جريده مطبوعه عندها على الأقل موقع واحد لعرض الأخبار و أكثر كمان؛ يعني ممكن أخبار على مدار اليوم لأن مافيش وقت للطباعه خالص و كمان ممكن لغه أبسط و مواضيع أكثر و فرصه أكبر لكل الناس حتى اللي مش بيدرسوا صحافه.

و دي عينه بسيطه من الصحفيين اللي عرفتهم عن طريق السوشيال ميديا و معرفش من غير السوشيال ميديا كان أيه حصل:

• "بسمه السباعي": الكاتبه و الصحفيه؛ بعيداً عن أي حاجه هي عملتها علشاني. بس هي بجد صحفيه في الصحافه الألكترونيه و في صحافه السوشيال ميديا كمان؛ صحفيه جامده جداً. من الناس اللي كلامها للقلب على طول؛ كلامها مينفعش متيحسش!! مش بس كدا هي واحده من الناس اللي ساعدتني في أول خطواتي في الصحافه الألكترونيه أو صحافه السوشيال ميديا. و أنهرده أفتتاح أول كتاب لها  "موسيليني و عطيه". عن العلاقه بين الرجل و المرأه في إطار الكوميديا السوداء؛ يعني هنشوف الواقع اللي بيتعاش بس بشكل كوميدي شويتين.

• "دينا نجم": أول مره قرأت لها كانت في صحافه مكتوبه؛ بس بعدين تابعتها على السوشيال ميديا. بستمتع جداً بكل مقالاتها اللي هي بأسلوب السهل الممتنع؛ تقرأها بسهوله جداً بس الفكره دسمه جداً و محتاجه تفكير عميق.

لو هنعتبر أن ليا قصه تستحق النشر في صحافه السوشيال ميديا؛ ف أنا من غير السوشيال ميديا مكنتش عرفت أني بحب الكتابه ولا كان حد عرف حاجه أصلاً. أنا بدأت مدونتي في 2013 و بعدها ب شويه أتعرفت على "بسمه السباعي" و هي كانت السبب لأول خطوه ليا و هي أني بكتب في بوابه روزاليوسف؛ بعدها الخطوه الثانيه و "مي طاووس" قالت لي على جريده مطبوعه أسمها "البوابه" و نزلي أول مقال مطبوع؛ الخطوه الثالثه السبب ال"دينا الشيناوي" و كانت "Identity". ف واضح أن من غير السوشيال ميديا كان ولا حاجه من دي هتحصل!!

من أسوء الحاجات في السوشيال ميديا هي سرعه الأنتشار مع عدم التأكد من المصدر؛ يعني أي حد ممكن يقول أي فنكوش و الفنكوش دا ينتشر. ف صحافه السوشيال ميديا ممكن جداً يطلع فيها صحافه صفرا و ممكن يطلع فيها صحافه تافهه و ممكن يطلع فيها صحافه كذابه؛ ف هي مسؤوليه أكبر بكثير. 

**المعلومات دي أتعلمتها شويه من الأيفنت و شويه من قرأتي الخاصه على مواقع مختلفه أو كتب و شويه كمان من تجربتي الخاصه.

**لو الموضوع عجبك أو شايف منه إفاده؛ أعملوا share؛ يمكن ناس تانيه تتعلم حاجه و تنفعهم في حياتهم.