Foodie في نعناع
مطعم أكل بيتي مصري؛ لو بتعمل ريجيم أو بتحافظ على وزنك ركز أوي و أنت بتطلب و تأكل هناك P: نبدأ من الأول كدا؛ أنا شوفت برنامج "الأكيل" بتاع مراد مكرم و كانت الحلقه عن مطعم نعناع اللي "مفيده شيحه" مشاركه فيه. ف قررنا نجربه أنا و عائلتي بعد ما شوفنا أنسجام و أستجمام مراد؛ أول ما وصلت حبيت الألوان المفرحه جداً اللي حواليا في كل مكان "أصفر و أزرق و أخضر" دا غير الزرع و الورد اللي في كل مكان حواليا. و بعدين الطربيزات الخشب اللي محفور عليها رسومات حلوه أوي و كنب مريح جداً؛ المعالق و الشوك و السكاكين مختلفين في الشكل و الرسمه جداً و التقديم في طواجن خضرا لطيفه جداً.
ندخل على المهم بقا؛ الأكل!! كان نفسي أجرب كل الأكل اللي في الmenu بس للأسف ربنا خلق قدره محدده للمعده بنتعداها في حدود بدل ما نموت!! ف طلبنا حاجات مختلفه و قررنا نجربهم سوا (أنا و عائلتي):
- شوربه لسان عصفور بالفراخ
- سمبوسك بالبسطرمه
- ملوخيه بالفراخ
- أرز معمر
- فطيره بالجبن المشكل
- أم علي
- كريم كراميل
- عصير بطيخ
في المجمل التجربه رائعه بصراحه و أكيد هتتكرر أن شاء الله تاني و ثالث و رابع و دشليون مره كمان؛ طعم الأكل بيتي جداً و حلو أوي. الأكل دسم و لكن حلو جداً؛ عشان تجربوا أكبر قدر ممكن من الmenu لازم تروحوا في مجموعه مع العائله أو الأصحاب عشان تتشاركوا في حاجات مختلفه و تجربوها سوا.
"Sharing is Caring."
ف المهم بقا!! الشوربه على مرقه فراخ بجد مش مياه ولا ماجي و كنور؛ و الشوربه مش مياه خالص بس غنيه جداً بلسان العصفور و قطع الفراخ. سمبوسك البسطرمه مقرمشه جداً و البسطرمه متقطعه صغير جداً في الجبنه السايحه؛ مبيتشبعش منها و الله. الملوخيه خضرا و متخرطه (يعني فريش) مع الرز المطبوخ صح أوي؛ و الفراخ متحمره و لونها يجوع و برضو مبيتشبعش منهم. بعدين الأرز المعمر هو كان غرقان في القشطه و السمنه و اللبن؛ و مع ذلك طعمه حلو جداً جداً بس كان هيكون أحلى لو مسك نفسه أكثر شويتين. نيجي للفطيره بقا؛ مقرمشه من فوق و من تحت و مليانه جبن مشكله مش عارفه أفرقهم بس حلويين أوي و طعمهم ماشي سوا و بالفلفل و الطماطم. الحلو بقا كان هديه من مدير المطعم (شكراً جداً على ذوقك)؛ أم علي و كريم كراميل حلويين جداً و أم علي مليانه مكسرات بس كان نقصها شويه لبن كمان و الكريم كراميل مع أني مبحبوش بس كان لطيف. و ختمنا ب عصير البطيخ الفريش.
من الأخر لازم تجربوا بنفسكم و تحكموا على الطعم و الحلاوه المصري البيتي؛ هو مش مطعم أكل شرقي و مصري و خلاص بس دا أكل بيتي. أنا شخصياً ممكن أقول أنهم 10/10؛ بسبب الجو و الألوان و الطعم و التنوع و كل الحاجات دي.
- في شيشه للي يحب
- في مكان مقفول مكيف للي ميحبش الدخان
- في زرع و ورد
- في مراوح بترش مياه عشان الحر ف عامله جو عالي أوي
- في ناس بتشتغل على طول بتضحك في وشك
- في مدير مطعم لازم أشكره شكر كثير جداً (مش عشان الرشوه بالحلو) بس عشان هو friendly جداً و بعد ما بنخلص أكل بيجي يقعد معانا 10 دقائق يأخذ feedback بالتفصيل
- يقال أن لسا هيزيد Kids area و فرن للعيش و الفطير السخن
أنا متحمسه جداً جداً أني أشوف المكان دا بيكبر واحده واحده؛ و عايزه أروح تاني و أجرب باقي الmenu!! الناس دي مش بس بتبيع أكل؛ دول بيبيعوا تجربه كامله متكامله و جو لطيف جداً من أول خطوه ليك في المكان و لحد ما بتمشي. الناس دي عارفه أزاي ممكن يبنوا قاعده جماهيريه كبيره من الناس اللي هتقلب على أكل مامتهم و تروح تأكل عندهم ^_^
مفيده شيحه و أحمد عبده شكراً على التجربه المتكامله دي؛ و شكراً لكل بني أدم بيشتغل هناك ^_^
و دا الmenu عشان تحاول تقرر هتجرب أيه من الأكل دا كله؟!
عنوان "نعناع": 46 شارع 9 في المعادي؛ من عند McDonald's.
تليفون "نعناع": 01020047087
مواعيد "نعناع": من الأثنين للأحد؛ من الساعه 10 الصبح للساعه 2 بليل.
Comments
Post a Comment