Foodie في Simply Food

Simply Food بدايه معرفتي بيهم كانت في الجامعه الألمانيه و فرع الزمالك؛ فتحوا فرع أكل بسيط و نظيف جداً متكون من المكرونه و البطاطس و البطاطا بس بطرق و إضافات مختلفه كثيره جداً. ف المكرونه و البطاطس و البطاطا بيتحولوا بقدره قادر ل menu ضخم مليان حاجات مختلفه و أطعمه بسيطه بس مختلفه و لذيذه. شويه و فتح فرعه في CityStars؛ و هو دا اللي عليه الreview أنهرده.

"نصيحتي دايماً عشان تجرب حاجات كثيره جداً من الmenu دا بيعتمد على عدد الناس اللي معاك؛ عشان تطلبوا حاجات مختلفه و تجربوا سوا."

جربت التالي:

1. شوربه بطاطس
2. شوربه خضار
3. بطاطس محمره
4. بطاطس كروكيت بالخضار
5. سندويتش شاورمه الفراخ
6. مكرونه أربيتا بالفراخ
7. مكرونه بزيت الزيتون و الثوم و الزيتون الأخضر و الأسود
8. مكرونه بزيت الزيتون و الثوم و الخضروات

التجربه ككل ممتعه و الأكل لطيف و لذيذ جداً؛ الميزه من الأسم أنه simple أو بسيط جداً في المكونات و لذيذ جداً في الطعم!! معادله صعبه بس أتحققت. الديكورات بسيطه جداً و هاديه.

شوربه البطاطس

بدأنا ب الشوربه!! شوربه البطاطس؛ خفيفه و طعمها حلو أوي أوي لازم تجربوها لما تروحوا هناك. و شوربه الخضار حادقه جداً بصراحه؛ يعني محتاجه حاجتين ملح أقل بكثير و تنوع شويه في الخضار.

بطاطس كروكيت بالخضار

البطاطس!! الكروكيت بالخضار؛ حلوه جداً و البطاطس مهروسه صح أوي و التتبيله و القشره اللي فوق حلوه جداً و معموله صح و الخضار طعمه لطيف جداً جوا البطاطسيه. و البطاطس المحمره؛ عليها تشكيله توابل لذيذه جداً.

سندويتش الشاورما فراخ

نيجي للسندويتش!! طعمه بسيط و لذيذ؛ شاورما فراخ و الخضار بتاعها و من فوق في مايونيز لذيذ جداً. عيش مقرمش و فراخ متبله و متحبشه بالبصل و الحركات دي.

مكرونه بالزيت و الثوم

المكرونه !! أخترنا زيت الزيتون و الثوم؛ للناس اللي ملهاش في زيت الزيتون متقلقوش طعمه خفيف جداً و ممكن متقدرش تميزه بسهوله. إضافه الزيتون كانت مناسبه جداً مع الطعم ككل؛ بس في إضافه الخضار كانت محتاجه تنوع في الخضار شويه يعني ممكن بتنجان و كوسه كمان. 

الmenu متفرع جداً؛ يعني تقدر تختار من 6 أنواع مكرونه مختلفه؛ و بعدين بتختار صوص من 11 صوص مختلف؛ و بعدين ممكن تختار إضافات من 12 إضافه مختلفه. في 5 أنواع بطاطس مختلفين من أختيار المطعم؛ و في 6 أشكال مختلفه للبطاطس و في 6 صوص مختلفين و 10 إضافات مختلفين ممكن يتقدموا مع البطاطس. دا غير البطاطس الكروكيت عباره عن 3 أنواع. و كمان في البطاطا الحلوه؛ في 4 أنواع من أختيار المطعم و في 11 إضافه مختلفه ممكن تتقدم مع البطاطا. 

**المجموع بتاع الكلام دا بعمليه حسابيه بسيطه عملوها في المطعم؛ أنه في أكثر من 200 طعم للمكرونه و أكثر من 150 طعم للبطاطس أو البطاطا ممكن يتم تقديمهم في المطعم. 

لازم تجربوا و تحكموا؛ بس أنا ممكن يكون تقيمي 10/10 للطعم و التنوع من أصل مكونات بسيطه جداً. 

العنوان: 12 شارع البرازيل في الزمالك؛ أو في سيتي ستارز في الدور الرابع؛ أو في الجامعه الألمانيه

التليفون: 01022100000