مكاني

لاء مش مكاني بتاع السوشي؛ و لكن مكاني أنا .. المكان بتاعي و بتاعي لوحدي كمان. المكان دا هو مكتبي بعد التعديلات؛ قررت بما أنني هتخرج السنه دي خلاص و هبدأ حياتي العمليه بجد و مش هزار و تدريب و فنكوش! و بناءً عليه بدأت أشوف فيديوهات على اليوتيوب لترتيب و تظبيط المكتب بتاعي أو مساحتي عشان أقدر أنجز أسرع و أحسن الحاجات اللي بفكر أعملها و عايزه أنجزها. اللي هتشوفوا دلوقتي ملوش أي علاقه بالبنات المرسومه اللي بتطلع في فيديوهات اليوتيوب خالص؛ أولاً أنا مصريه أباً عن جد و ثانياً هنا في مصر مافيش نفس الإمكانيات دي ولا نفس الconcepts دي بنتعلمها ولا النظافه و قلة التراب دي!! و بناءً عليه دي النسخه بتاعتي من الWorking Space بالنكهه المصريه (على قد حالنا يعني).

طبعاً دا كله ميمنعش شويه حاجات Handmade على شويه هدايا من صحابي لما سافروا على شويه حاجات ممكن جداً تكون "زباله" لناس تانيين بس ساعدوني أني أنظف و أرتب المكتب و يكون أجمل و محبوب بالنسبه ليا على الأقل؛ زي صناديق الأحذيه أو كوبايات الكنافه بالمنجو. هسيبكم مع شويه صور كدا ل"مكاني"؛ و بعدها هقولكم نصايح أو Tips كدا عشان تحاولوا لما تسحلوا نفسكم في أكثر من حاجه مختلفه تنجزوا في كل حاجه و تتعلموا خبرات حلوه من كل فرصه و ميمنعش تكونوا مرتاحين و مبسوطين برضو.

نبدأ بالصور:

planner و هدفها أنك تقسم يومك و تتابع أيه اللي محتاج أنه يخلص خلال اليوم؛ أنا بحب أستخدم ألوان مختلفه و بحب أكتب Quotes لطيفه عشان تشجعني خلال اليوم.

الcorner دا عباره عن صندوق فيه ورق فاضي كثير جداً عشان المذاكره أو الشغل؛ و قدامها شويه ألعاب مختلفه بحبها.

مجموعه صناديق عشان أحط فيها الكتب بتاعتي بديل للمكتبه يعني.

علب شفافه كان فيها glitter و خلص؛ و بعدين مليته خرز ملون من سلاسل قديمه؛ شكلهم بيفرحني جداً.

دا corner الأقلام بتاعتي من كوبايات الكنافه بالمنجو القديمه؛ أقلام ملونه و أقلام بglitter.

النصايح و الTips بقا:

• الplanner أو الTo-do list دول صديقك الصدوق؛ يعني أكتب كل حاجه محتاج أنها تحصل في اليوم دا أو الحاجات اللي لازم تخلص في وقت معين. 
• متنساش كل ما تخلص حاجه تشطبها؛ إحساس أنك خلصت حاجه دا أحساس بالإنجاز و الإيجابيه في حد ذاته.
• متنساش على المكتب تزود الهدايا و اللعب بتاعتك اللي بتحبها؛ و كمان زود شويه حاجات ملونه تانيه عشان تزود فرحتك و بهجتك و حبك للمكان.
• أوعى تنسى تقسم يومك صح الصح؛ يعني من ساعة ما تصحى لحد ما تنام أستغل الساعات دي أوي؛ و متنساش راحتك.  
• طبعاً متنساش راحتك؛ و لازم وقت تفصل فيه من اللابتوب و المذاكره و الشغل و كل حاجه؛ و أفتكر أن الأجازه يعني أجازه من كل حاجه و أي حاجه.
• أوعى تنسى الأقلام الملونه؛ عشان تزود تركيزك في اللي بتعمله و التنوع.
• و طبعاً متنساش الموسيقى و الأغاني اللي بتحبها؛ و يفضل أن الأغاني دي تكون حماسيه و إيجابيه جداً.
• نصيحه مش دايماً بعمل بيها؛ أصحى بدري عشان تلحق اليوم من أوله و تلحق تخلص كل اللي وراك. (ممكن تبدأ بأنك تصحى ربع ساعه بدري كل يوم؛ و تنام بدري ربع ساعه برضو)

تقريباً دي كل حاجه أنا قررتها أو أتعلمتها لحد دلوقتي؛ متنسوش أنكم تدرسوا كل اللي تقدروا عليه؛ و أستغلوا أي فرصه عشان تضيف لكم حاجه جديده و خبره جديده؛ و أضيفوا للكوكب دا حاجات جديده و مختلفه. أفتكر أنك بتعيش حياة واحده بس؛ و لازم تنجز فيها على قد ما تقدر و تعمر فيها الأرض. أفتكر أن ربنا خلقك لسبب مختلف عن باقيه خلق الله؛ أكتشف الهدف دا و حققه :)