عيد ميلاد الليله مييين؟!

أنهرده عيد ميلاد مدونتي الثاني؛ يعني أنا بقالي سنتين بأكتب!! كل سنه و أنا طيبه؛ و كل سنه و المدونه طيبه؛ و كل سنه و أنتم طيبين. المدونه دي كبرت خطوه خطوه قدام مني؛ أنا شوفتها و مفيش ولا بني أدم شافها. و فرحت مع أول ألف؛ و هطير من الفرحه و هي داخله على الخمسين ألف أهو ^_^ المدونه دي من غيركم مكنش هيكون لها وجود ولا أنا كنت تطورت في موضوع الكتابه و التدوين و الكلام دا كله. ربنا يخاليكوا ليا. أنا مش هقول أسامي ناس كثيره؛ بس يكفيني أقول "شكراً و ربنا يكرمكم" و كل واحد عارف نفسه و عارف سايب آثر فيا حجمه أيه.

و الله أول مره أكون مش عارفه أكتب ولا عارفه أقول أيه؛ أصل مكنتش أتخيل كل دا! و لو تخيلته مكنتش عارفه أنه هيتحقق بسرعه كدا!! 

أنا هسيبكم مع أغنيه ل"أصاله"؛ تقدروا تتخيلوا أن أصاله دي أنا في الأغنيه دي! أنا بحب الأغنيه دي من أول يوم سمعتها فيه و أول يوم شوفت الكليب فيه. مش بس كدا أنا عندي يقين أن الأغنيه دي ممكن تكون تتر حياتي و مش بعيد أصاله تكون مغنياها ليا مخصوص! أصلها أغنيه وصفاني بشكل مخيف. و الغريب أن أنهرده الكليب دا كان أول حاجه أشوفها أول ما صحيت من النوم! 

أصل أنا "شخصيه عنيده"

يلا كل سنه و أحنا طيبين؛ و ربنا يخالينا لبعض!!