Social Media Summit 2015-Tip (3)

الفيسبوك هو أكتر منصه للسوشيال ميديا مشهوره و محبوبه بين الناس (اكتر من التويتر و الانستاجرام و أي حاجه تانيه)؛ دا غير أنه عنده قدره رهيبه أنه يكون إدمان-أو هو أدمان فعلاً!!! شوف كام مره كان أول حاجه تشوفها في يومك تكون الفيسبوك و أخر حاجه تشوفها برضو الفيسبوك؛ دا غير أنك تسمع صوت الموبايل و هو أصلاً معملش أي حاجه و لو بتذاكر كل دقيقتين تبص على الفيسبوك نص ساعه. دي كلها حقائق و أحنا عايشين فيها!! دا واقع مرير و صعب جداً نتخلص من الواقع دا كمان لأن في أجيال أتربت عليه خلاص و دا غير الأجيال اللي أتغيرت حياتهم بسببه زي ستات البيوت اللي عملوا مشاريع مثلاً. الحل أننا نستخدمه صح؛ مش كل أستخدام الفيسبوك بيكون تضيع الوقت أو المجهود. يعني تقدر تستخدمه في شغل أو مشروع صغير أو تطبق فكره جديده؛ و ممكن جداً تستخدمه عشان تنشر فكرتك أو تنشر حاجه عايزه توصلها لكل الناس؛ الفيسبوك ممكن يكون شغل.
الفيسبوك إدمان بسبب أنه جايب لك كل اللي تعرفهم و متعرفهمش في مكان واحد بينك و بينه شاشه و بس؛ يعني في أي وقت و أي مكان عايز تكلم أو تشوف أو تعرف أخبار حد تاني هتقدر تعمل دا بسهوله جداً و أي حاجه على بعد click واحده بس. دا غير أنك بتقدر كمان تنشر أي معلومه أو أي خبر أو أي فكره أو أي شغل لملاين الناس بسرعه و سهوله جداً. و من غير أي تبرير للنقطه دي بالأخص؛ الفيسبوك مكان عشان كلنا نقدر ببساطه شديده نتشهر و نتعرف يعني أرضاء للأنانيه بتاعتنا. دا كمان الفيسبوك سهل جداً يعرفك على كل الذكريات و يقربك بكل صحابك القدام من أيام المدرسه أو أيام الجامعه. 

أنا شخصياً من الفيسبوك أتعرفت على ناس كتير في المجالات اللي بحبها و هما الكتابه و الMarketing و أشتغلت شغل كتير بسببه كمان. قربت أكتر من عائلتي و صحابي؛ أتعرفت أكتر على نفسي و على غيري. دا غير أن لو في حاجه مش عارفه أعبر عنها في الحقيقه ممكن أعترف بيها و أعبر عنها على الفيسبوك و السوشيال ميديا عموماً. و أصلاً الفيسبوك له مكان خاص في قلبي لأنه كان من أوائل الplatforms اللي أتعرفت عليها؛ شوفت أشكال كتيره منه و تطورات كتيره منه و عندي حريه أني أكون أنا زي ما أنا عايزه أكون عليه. أهم حاجه في الموضوع أن يكون في تنظيم للوقت ما بين الحياه الحقيقيه؛ الشغل و الدراسه و الخروج و الصحاب و العيله و السوشيال ميديا. من واقع تجربتي  السوشيال ميديا هي جزء كبير من يومي و السبب الرئيسي في دا مش بس التعارف و لكن برضو الشغل؛ أيوه انا بشتغل على السوشيال ميديا ف قعدتي على اللابتوب مش كلها سوشيال ميديا ولا كلها لعب في منها كتير دراسه و شغل (دا اللي نفسي اوصله لأمي و أبويا).

"الفيسبوك حلو جداً و إدماني بالأخص لو أستخدمناه غلط؛ يعني لو كل هدفنا الهروب من الواقع دا غلط و لكن لو الأستخدام متعلق بمستقبل و شغل و تحقيق شخصيه (بعيد كل البعد عن الهروب) هتكون كسبان أكيد."

**المعلومات دي أتعلمتها شويه من الأيفنت و شويه من قرأتي الخاصه و شويه كمان من تجربتي الخاصه.

**لو الموضوع عجبك أو شايف منه إفاده؛ أعملوا share؛ يمكن ناس تانيه تتعلم حاجه و تنفعهم في حياتهم.