هو و هي - أقول ولا مأقولش

طلب من هو و هي أسمعوا الأغاني دي عشان تدخولوا في الmood و كل مقال هيكونوا موجودين في أوله عشان تفتكروا الخناقه الأبديه بين أدم و حوا!!

• https://soundcloud.com/ahmed-kheidr/pbyfn1rbblfr "هو و هي" سعاد حسني و أحمد ذكي.
• https://soundcloud.com/moawad/icejgkpiazzp "مين بيكمل مين" أمينه و هاني عادل.
• https://soundcloud.com/abo_elsho2/rlkyzz4blrrw "بالعكس" عبير نعيم و رامي عياش.

هنتكلم النهاردة على سؤال المفروض انه بيقلق هو و هى  (لكن فى الواقع السؤال دة بيقلق هى اكتر لاسباب كتير هنعرفها كمان شوية) و السؤال هو  "أقول ولا مأقولش". اقول على كل تفاصيل علاقتى القديمة و لا مأقولش؟ اقول على كل تفصيلة (مهما كانت بشعة) فى حياتى ولا مأقولش؟ و لو قولت ايه رد فعل الشخص  (سواء كان هو او هى) و لو مأقولتش هتكون النتيجة ايه؟ و هو اصلاً من حق الشخص التانى  (سواء هو او هى) انه يعرف كل حاجة و لا لأ؟

يا ترى أقول أو مأقولش دا يمكن أكتر سؤال بيتسأل في العلاقات؛ "بدون أستغلال" زي "مريم" في تحت السيطره لما كانت عماله تفكر و تشوف أزاي تحكي ل جوزها "حاتم" ماضيها قبل ما تعرفوه في الإدمان و في الحب؛ مش مهم الماضي وصل لحد فين!! الفكره أن في حاجه ممكن أقولها أو ممكن مأقولهاش و لو قولتها هتكون مصيبه و خناقه و ممكن العلاقه تبوظ و تنتهي!! و لو مقولتش هكون كذابه و بخبي و برضو العلاقه هتبوظ و تنتهي!! طب منا ممكن أكون مش بقول عشان خايفه على علاقتنا ل تخرب.

رأي "هي":

أن لو في تفاهم و ثقه ممكن جداً تيجي بسببه الصراحه و الوضوح. صعب جداً أحكي كل حاجه و أكون كتاب مفتوح؛ بس أنت مش متفاهم أن كل دا (فشلي و نجاحي) سبب أني أكون أنا بتاعت دلوقتي!! و معندوش ثقه أني أتعلمت من غلطاتي و مش هتتكرر تاني!! ليه حاتم في كل حاجه يقول ل مريم أنتي مدمنه و كنتي مدمنه (بيستغل غلطتها القديمه في حياتهم الجديده)!!

إجابه السؤال سهل؛ أنا هتكلم و أبوح لما تكون فاهمني و لما تكون واثق فيا! هكون صريحه جداً ف كل حاجه بس لو سألت؛ لو مسألتش و أنا مقولتش ف دا لا كذب ولا تخبيه بس هعتبرها حريه شخصيه؛ حريتي ف أني أقول أيه و مأقولش أيه من فشلي و من نجاحي. 

أنا موافقه أن "الراجل الشرقي" في حاجات معينه مش هيتقبلها؛ مش معترضه والله العظيم! بس في حاجات عاديه جداً ممكن تعديها. يعني ممكن تعدي مشكله قديمه؛ ممكن تفوت غلطه أعترفت بيها؛ ممكن تنسى حاجه أنا أعتذرت عليها. ممكن تفتح مخك؛ أصلك مش ملاك و زي ما أنا ليا أخطائي أنت ليك بلاوي. التفاهم و الثقه هما الحل!!

موافقه على فكره "الراجل الشرقي" أحياناً؛ بس رافضه الظلم فيها؛ مش من حقك تعمل كل حاجه أنت عايزها و مطلوب مني أسامح يا أما أكون ست نكديهَ! و أنا لما أعمل أي حاجه حتى لو في الماضي و حتى لو حاجه عاديه جداً ف أكون واحده مش كويسه و متستحقش السماح منك!! على فكره عدم أحترامك ل صراحتي و وضوحي و عدم أحترامك لكل شئ أنا مريت بيه في حياتي من نجاح أو فشل؛ دا بيعتبر عدم أحترام ليا دلوقتي!! و دا أول شرخ في أي علاقه.

أما بالنسبه ل"هو" ف دا رأيه:

طيب خلينا نتفق ان الصراحة و الوضوح و الثقة هى من الاساسيات فى العلاقة بين هو و هى لما يقدروا و يحترموا هما الاتنين الثقة دى. بس للأسف دلوقتى الصراحة و الثقة هى فى هو و العكس، بقت تُستخدم كدليل ادانة و الشك للاغلبية العظمى من الناس. و طبعاً الموضوع ممكن يكون مقلق ل هى اكتر عشان المُجتمع بيتقبل ماضى الراجل مهما كان سئ او معيوب، لكن بالنسبة للست ممكن تفضل طول عمرها تدفع تمن غلطة واحدة عملتها فى حياتها.
نيجى بقى لاجابة الاسئلة: اقول ولا مأقولش دى مش حاجة مُطلقة و المهم اقول ايه و امتى و ازاى. يعنى من حق الشخص انه يقول و يحكى على تجربة او علاقة قديمة و من حقه برده انه مايقلش. طبعاً لو قرر انه يقول و يشارك لازم الشخص الى قدامه يتقبل حقيقة شريكه بكل سلاسة؛ لانه لو ماقدرش يتقبل الحقيقة دى يبقى دة مش الشخص المناسب ليه. لأن هو او هى لازم يعرفوا كويس ان كل التجارب القديمة الى مر بيها شريكهم فى الحياه ليها سبب فى تكوين الشخص الى بقوا عليها دلوقتى؛ فمعنى عدم تقدير التجارب دى هو عدم تقدير الشخص ككل.
من الحاجات الى هو و هى لازم يكونوا عارفينها ان من حق الشخص التانى يعرف كل حاجة مهما كانت مش لذيذة اذا هو/هى طلب انه يعرف كل حاجة. بس من وجهة نظرى انه لو الشخص ماطلبش دة يبقى الماضى بتجاربه ملك مطلق لصاحبها يتكلم عنه او لأ فى الوقت الى يقرره. يعنى لو هو/هى قرروا انهم يحكوا عن حاجة قديمة فى حياتهم بعد فترة من بداية علاقتهم الطرف التانى لازم يتفهم انه دة الوقت الى شريكه شافه مُناسب عشان يتكلم عن التجربة مش عشان فى نيته انه يخبى.

ف من الأخر و تلخيصاً للموضوع دا كله؛ في معادله بسيطه جداً و هي:

"تفاهم+ثقه=صراحه+وضوح"

هو و هي دايماً مستنين رأيكم في المواضيع اللي هنتكلم معاكم فيها على الهاشتاج دا #هى_و_هو
**أحنا بننقل اللي بنشوفوا و مش شرط أبداً يكون رأينا الحقيقي أو بيعبر عن أرائنا الشخصيه.
**لما بنقول رأي مش بنقصد كل البنات ولا كل الولاد؛ بس قصدنا على الأغلبيه الا من رحم ربي يعني.