Social Media Summit Egypt 2015

اليوم العالمي للسوشيال ميديا: هو يوم للأحتفال بالسوشيال ميديا بما أننا في عصر السوشيال ميديا و ليل نهار على الموبايل أو اللابتوب قاعدين ما بين الفيسبوك و التويتر و الأنستاجرام و ما خفي كان أعظم؛ ف هي محاوله للأستفاده من التكنولوجيا الجديده و السوشيال ميديا. يعني بنحول التسليه ل فرص شغل جديده و فرص نجاح من نوع السهل الممتنع؛ أنا من غير السوشيال ميديا مكنتش كتبت ولا حد عرف حاجه عن اللي بكتبه (و دا مثال صغير جداً يعني).

السنه دي الأحتفال كان متكون من يومين؛ و مجموعه متنوعه جداً من تجارب السوشيال ميديا الناجحه و كلمات من ناس متخصصه في المجال دا و مجموعه من ورش العمل الخاصه بالسوشيال ميديا برضو. اليوم العالمي للسوشيال ميديا بدأ الأحتفال بيه في مصر من سنه 2013 (يعني دي ثالث سنه)؛ و أول مره أحضره كانت السنه دي  في 2015. هي كانت تجربه جديده عليا و يومين من أحلى الأيام في حياتي؛ بسبب اليومين دول أنا أتعلمت حاجات كتيره جداً صعب أي حد يتعلمها في أي مكان تاني برا إطار اليوم العالمي للسوشيال ميديا. ممكن في الجامعه ندرس دعايا و أعلان و أزاي أبدأ مشروعي أو شركتي على أرض الواقع؛ بس لا يمكن نتعلم (على الأقل دلوقتي) في الجامعات أزاي نستخدم السوشيال ميديا بشكل أحترافي جداً عشان نستفيد منه في الدعايا و الأعلان و بدايه مشاريع أو شركات كبيره مختلفه في عالم أفتراضي ناجح.

برغم الأخطاء اللي حصلت خلال اليومين من تأخير بسيط في الوقت أو تغيير بسيط في الجدول أو ناس مجتش و محترمتش ميعادها و الناس اللي قاعده مستنيه؛ و لكن الأخطاء كلها كانت من خارج أيدي المنظمين و أنا متأكده من دا ( ف بلاش نكون بنضغط عليهم بزياده). و برغم كل الأخطاء اللي حصلت دي؛ بس اليومين كانوا مفيدين جداً و فيهم محتوى رائع. بعيداً عن أن حصل حاجات أنا شخصياً بختلف معاها؛ بس أنا بحب النص المليان من الكوبايا ف ههتم هنا أكتر بالحاجات الحلوه و هكتفي بالسطرين اللي كتبتهم عن الحاجات اللي ضايقتني شخصياً ك درس نتعلم منه في الأحتفاليات بعد كدا مش أكتر. يلا ندخل على الإيجابيه!!

اليومين تكونوا من:

• 16 كلمه من متخصصين في مجال السوشيال ميديا (حصل منهم 15 كلمه)
• 27 قصه نجاح بسبب السوشيال ميديا (حصل منهم 25 كلمه)
• 6 ورش عمل متعلقه بالسوشيال ميديا (حصلوا كلهم)

و الكلمات و القصص و ورش العمل شغالين مع بعض في نفس الوقت؛ يعني كل شخص بيختار المفيد أكتر له عشان يعني اللي مش عجبوا حاجه ممكن يحضر الحاجه اللي تهموا أكتر. في الأخر اليومين أستحملوا أني أحضر تقريباً 22 حاجه من أصل ال46 اللي حصلو فعلاً؛ و برضو عشان مزعلش أن في حاجات كتير (تقريباً نص الجدول محضرتوش؛ ف في يوتيوب لكل اللي فاتني). أتعلمت منهم 78 معلومه جديده عليا و مفيده ليا؛ من غير اليوم دا مكنتش اتعلمت المعلومات الجديده دي.

***و أستنوني في الفتره اللي جايا عشان هبدأ أشرح ال78 معلومه جديده؛ أستنوني لو أنتم مهتمين بالسوشيال ميديا و مهتمين أنكم تتعلموا حاجه مختلفه على السوشيال ميديا و مهتمين بأنكم تبدأوا مشروع أو شركه جديده أفتراضيه.

في الأخر خالص؛ شكراً لكل شخص أشتغل على اليوم دا عشان يطلع مفيد و ممتع بالشكل دا. شكراً لكل المنظمين و الشركات و الناس و الحضور كمان و شكراً لكل شخص أتعرفت عليه و أتكلمنا أو أشتغلنا مع بعض في أي ورشه عمل ^_^ 

أسامي من الناس اللي أتكلمت لازم أقولها عشان تحاولوا تحضروا لهم بعد كدا و تتعرفوا على خبرتهم؛ و دا شكر خاص ليهم:

• ماجد عاطف (صحفي)
• أحمد الرفاعي (شركه EgyWeb)
• عمرو صالح (شركه 1Shield)
• عمرو القلعاوي (شركه FP7) 
• مي عبد العاصم (شركه Media &More)
• شيماء الجمال (انا حامل)
• محمد ناجي (المقر)
• نهال هشام (من مجموعه MBC)
• أحمد عارف (شركه Fresh Buzz)
• يسرا المهيري (Super Mama)
• كريم حسام (شركه MO4 Networks)
• يحيى السادي (شركه MO4 Networks)
• باهي أبو العز (شركه Kijami)
• أحمد هيمان (مصريين)
• رنا القاضي (شركه EgyWeb)
• باسم الهادي (شركه Kijami)
• وليد مصطفى (شركه By2olak)
• شادي عبد الجليل (شركه Triptanza)
• أحمد الأبي (Abi Instagram)