Social Media Summit Egypt 2015-Tip (1)

نسبه التفاعل على كلامك و صورك و فيديوهاتك على السوشيال ميديا أهم بكتير جداً من عدد الناس اللي عندك نفسهم أو كام مره بتكتب أو بتنزل صور و فيديوهات!! عشان دا الدليل القوي جداً أنك بتقول كلام مفيد للناس و الناس بتحبه مش مجرد كلام و خلاص. يعني لو عندك 100 بني أدم بس ال100 بني أدم دول بيتفاعلوا معاك؛ اهم بكتير جداً من لو عنك 1000 بني أدم و منهم 100 بس بيتفعلوا معاك. لأن في الحاله الأولى نسبه التفاعل 100% و في الحاله التانيه نسبه التفاعل 10% بس!! ف مش بتتقاس بعدد المتابعين ليك بس بتتقاس بعدد الناس اللي بتتفاعل معاك.

طب أيه هو التفاعل؟

أول حاجه التفاعل دا بيكون عن طريق الlikes و دي أول خطوه؛ معناها الكلام شدني شويه. الخطوه التانيه هي الcomment و دا معناه أن كلامك حرك فيا حاجه لدرجه أني أناقشك فيها و أقول رأيي. و الخطوه الثالثه و الأخيره أني أعمل share و دا معناه أن كلامك عجبني لدرجه أني أشاركه مع كل اللي أعرفهم. و دا كله كمان ممكن نزود على الهاشتاج بتاعك اللي الناس بتستخدمه و بتروج ليك عليه.

(و دا ممكن جداً يكون أيجابي أو سلبي؛ متفتكرش أن أي تفاعل بيكون في صالحك ممكن يكون في كتير ضدك كمان)

طب أزاي أعمل التفاعل دا؟

• دايماً أفتح المجال أن الناس ترد أو تقول رأي
• و حاول دايماً في الposts بتاعتك يكون في صور و فيديوهات عشان دول الناس بتشوفهم أكتر بكتير من الكلام
• و دايماً رد على الأسئله و الناس اللي بتجيب سيره اللي أنت بتعمله أو سيرتك و بلاش الرد يكون رد أنسان آلي
• دايماً أعرف الناس بتقول أيه عليك و على اللي بتعمله (أيجابي أو سلبي) عشان تظبط نفسك و شغلك
• أظهر شخصيتك على شخصيتك الأفتراضيه في السوشيال ميديا
• أبدأ أتعرف على أنجح الناس في مجالك و تابع شغلهم و أتواصل معاهم
• دايماً في أخر كل post عرف الناس يعملوا أيه و أيه المطلوب منهم

و عشان تعرف مستواك من ضمن الناس اللي شغاله في السوشيال ميديا و ملهمين للناس؛ أدخل على: www.klout.com و أعرف أنت تقريباً مجموعك كام من 1-100؛ و أغلب الناس 40 ف لو أنت أكتر أفرح و أشتغل أكتر و لو أقل أشتغل أكتر لحد ما توصل للي تحبه. بس ركز أنك لازم توصل الklout بكل السوشيال ميديا بتعتك (فيسبوك و تويتر و جوجل بلس و أنستاجرام و غيرهم) عشان هو مجموع الحاجات دي كلها و مش متوسطهم.

**المعلومه أتعلمتها من الSocial Media Summit Egypt 2015 بس الشرح مجهود شخصي جنب اللي أتعلمته في الEvent؛ يعني أتعلمت أني أظهر شخصيتي و أسلوبي في الكلام و دا اللي حصل فعلاً :)

**لو الموضوع عجبك أو شايف منه إفاده؛ أعملوا share؛ يمكن ناس تانيه تتعلم حاجه برضو و تنفعهم في حياتهم.