أمبارح كان عمري عشرين

أه فعلاً "أمبارح كان عمري عشرين" و أنا مصدومه و مش عارفه أزاي؟ ولا أمتى؟ أنا عندي شعور بالمفاجئه و اللخبطه؛ نظراً لأني فاكره لحظات من طفولتي و كأنها أمبارح و لحظات من المدرسه و غيره. و أكتشفت أنهرده أني تمت ال21 سنه على الكوكب دا و كمان بدأت في ال22؛ مش بس كدا دا أنا كمان أن شاء الله هتخرج من الجامعه السنه اللي جايه؛ يعني في 3 سنين من سنين الجامعه خلصوا فاجأه!! ليا حق أتفاجأ و لما أتفاجأ أبص أنا عملت أيه في حياتي؟ و لسا عايزه أعمل أيه في حياتي؟ يعني عيد ميلادي هو جرس الخطر أن في سنه من عمري خلصت؛ و لازم أركز أوي في السنين اللي جايه عشان ميخلصوش ورا بعض كدا و أنا قاعده بتفرج!!

"لازم أكون بطلت سنين عمري؛ و موافقش بوجودي في صفوف المتفرجين ولا ب أني أشارك ك كومبارس في عمري؛ ببساطه أنا لازم أكون بطله حياتي و بطله عمري!!!"

خلاصه ال21 سنه دول؛ أنا أتعلمت أن لازم تتعب جداً عشان توصل لأي حاجه أنت عايزها. لو عايزه نجاح أو سعاده أو راحه أو رضا أو صحه أو أي حاجه تانيه لازم تشتغل من نار؛ عشان الدنيا دي ترمي لك حاجه لازم أنت كمان ترمي الحاجه دي في وش الدنيا (أرمي حب و سعاده و رضا و شغل؛ عشان تحصد نجاح و حب و صحه. دا قانون الكارما). أتعلمت كمان أن مفيش حاجه أسمها "لازم تكون بتعرف أي حاجه من زمان؛ مش هتتعلم على كبر"؛ أنا أسفه بس انت ممكن تتعلم أي حاجه في أي وقت و تنجح فيها كمان. في حاجه أخيره كمان قرب دايماً من الطبيعه؛ يعني أخرج في جناين و على البحر و على النيل كتير. دول أهم 3 حاجات اتعلمتهم في خلال ال21 سنه بتوعي؛ و أتمنى الناس تتعلم دا قبل كدا كمان!!

كل سنه و انا طيبه؛ و طبعاً السن مش أرقام أهم حاجه الروح بتاعتنا :) حافظ على روحك عشان أوحش حاجه أن الروح تكبر (أي حد مش في العشرينات أنا أسفه أني بقول على نفسي في العشرينات كبيره). بس يا جماعه أنا وصلت ل سن الرشد و ممكن جداً أتسجن في سجن النسا عادي!!! يعني انا نظرياً كبيره دلوقتي :)  ف كان لازم أقول الكلمتين بتوع "أوعى روحك تكبر"!! يلا كل سنه و أنا طيبه؛ و يا رب أعيش كتير لحد ما أحقق كل اللي بتمناه؛ ربنا يتقبل كل الأمنيات اللي جات لي من عائلتي و أصحابي ^_^ ربنا يخاليكوا ليا؛ و شكرا لمئات الرسائل على الفيسبوك و لرسائل الواتس أب و التليفونات :) ربنا يخاليكوا ليا و أكون دايماً في عزوتكم !!! 

"أوعى روحك تكبر مهما أنت كبرت في سنين عمرك!!"