كف الميزان .. مقدمه

أولاً كل سنه و أنتم طيبين؛ و يا رب رمضان السنه دي يكون مختلف بجد و روحاني فعلاً و مش زي كل سنه. أنا زيي زي شباب كتير بننفعل جداً و نتحمس جداً أول أسبوع من رمضان؛ نصلي كله في مواعيده و نصلي السنن و نقرأ ورد قرأني يومي و نتفرج على برامج دينيه و لكن للأسف دا مش دائم. السبب ممكن يكون دوشه الحياه؛ يعني بننشغل عن ربنا؛ و السنه دي أنا نويت (و ربنا يساعدني تتم على خير) أني مش هتكلم و لكن هعمل اللي هقوله؛ قررت أني أشجع الناس أن الروحانيه تكمل 30 يوم رمضان و ما بعدها كمان. هنخلي رمضان يكون فتحه خير؛ هنبدأ ب رمضان و نستمر أن شاء الله في عدل كف الميزان من بعد رمضان كمان.

لأني من الشباب مقدرش أقول مش هنشوف مسلسلات ومش هنشوف التلفيزيون؛ لاء هنتفرج على عادل إمام و رامز و نيللي كريم جنب الفرجه على مصطفى حسني و الشقيري و معز مسعود عادي؛ بس هنتأكد أن لما نتفرج على مسلسلات و برامج هنعدل كف الميزان بأننا نعمل جزء من روحنيات رمضان اللي ربنا بيحبها و بيحبنا نعملها. يعني هنتخيل أن في ميزان؛ كف دنيا و كف دين. كف الدنيا جوا الأكل و الشرب و الفسحه و البرامج و المسلسلات؛ كف الدين هو الصلاه و الصوم و الورد القرأني و الصدقه. و العنوان دا "كف الميزان" كل أسبوع في رمضان بعد الفجر هيكون جرعه تشجيع على عدل ميزان الحياه "دين و دنيا".

أول حاجه أبدأ من دلوقتي أعمل مكان في البيت عشان الروحانيات دي و عدل الميزان و بس؛ مكان صغير في أي أوضه في البيت و أفرش سجاده الصلاه و حطي الأسدال و مصحف و ظرف للصدقات (جنيه واحد كل يوم في 30 يوم رمضان). المكان دا هيكون فيه رابط معنوي بينك و بينه لما تصلي فيه الخمس فروض و السنن و تقرأ الورد و زياده؛ و كمان المكان دا هيكون شفيع لك يوم القيامه أن شاء الله و هيقول لربنا أن فلان أو فلانه كانوا بيعملوا كذا كذا هنا.

تاني حاجه من دلوقتي نزل برنامج على الموبايل أسمه QamarDeen و دا برنامج تقييم؛ كل أسبوع أو شهر أو سنه تقدر تشوف رسم بياني بيظهر أنت بتتقدم و لا مقصر عشان متنساش؟! في الأول بتحدد أنت بنت ولا ولد و بتحدد اللغه عربي ولا أنجليزي؛ و بعدين بتبدأ كل يوم تدخل معلومات عن صلاتك (جماعه ولا فردي و بسنن ولا لاء) و صيامك (فرض ولا تطوع ولا قضاء ولا نذر ولا بدون سبب) و صدقتك (مال ولا بسمه ولا مجهود ولا كسوه ولا أطعام ولا أخرى) و وردك القرءاني (أسم الصوره و لو في زياده عن الورد اليومي كمان). 

ثالث حاجه زود على جدولك اليومي من المسلسلات و البرامج؛ برنامج ديني واحد بس لأكتر داعيه بتحب أسلوبه (منعاً للتشتت)؛ دا هيزود جزئيه الحماس عندك (أحمد الشقيري أو مصطفى حسني أو معز مسعود أو عمرو خالد أو حد غيرهم). و تابع مقالتي الأسبوعيه إن شاء الله. و متزودهاش عشان ماتزهقش ولا تتعب بسرعه؛ خدها واحده واحده عشان تدوم و متخلصش بسرعه (صلي 4 ركعات تراويح و زود كل يوم شويه؛ و مش لازم تبدأها كتير مره واحده. أبدأ بالفروض و بعد شويه زود السنن.) المقال الأسبوعي دوره بس أنه يفكرك عشان متنساش ولا تزهق و تحس أن في ناس معاك.

**أنا مش دارسه أي شئ له علاقه بالأسلام؛ و لكني واحده مسلمه حاولت أفهم ديني أكتر و أنشر تجربتي معاكم. كلامي مش شرط يكون 100% صح؛ و لكن 100% مقتنعه بيه. أتمنى يكون مفيد لكم زي ما هو مفيد ليا.

رمضان كريم؛ و متنساش تعدل كف الميزان بين دنيتك و دينك :)