هو و هي-صالوناتي

طلب من هو و هي أسمعوا الأغاني دي عشان تدخولوا في الmood و كل مقال هيكونوا موجودين في أوله عشان تفتكروا الخناقه الأبديه بين أدم و حوا!!

• https://soundcloud.com/ahmed-kheidr/pbyfn1rbblfr "هو و هي" سعاد حسني و أحمد ذكي.
• https://soundcloud.com/moawad/icejgkpiazzp "مين بيكمل مين" أمينه و هاني عادل.
• https://soundcloud.com/abo_elsho2/rlkyzz4blrrw "بالعكس" عبير نعيم و رامي عياش.

أنهرده هو و هي هيتكلموا عن جواز الصالونات؛ قعده الصالون و مره من المرات القليله اللي هتشوف الحاجات اللي طالعه من النيش. في وجهات نظر مختلفه كتير عن جواز الصالونات دا؛ منهم اللي رافض للفكره و منهم اللي موافق على الفكره و منهم اللي مش فارقه معاه أصلاً. أنا ك هي مش فارقه معايا جواز صالونات ولا غيره؛ يعني المهم التوافق بقا و الشخصيه و الحب و الموده. اللي رافض جواز الصالونات شايف أنها وسيله غير أدميه "يعني أيه يجي عريس يتفرج عليا في الصالون/الفاترينه؟" حتى لو مفهوم الصالون أختفى و تحول لقعده في النادي أو في المول!! الموافق شايف أن دي طريقه مضمونه للجواز عشان هو أصلاً داخل البيت من بابه و مش هيلعب ولا هيكسر قلوب ولا حاجه (كافي خيره شره)!! و اللي مش فارقه معاه شايف أن في شخصيه معينه مرسومه في الخيال و لو موجوده في العريس اللي جي الصالون دا مش هيضر لو في حب و أحترام كمان؛ بس لو مش موجوده يبقى مع السلامه!!!

أنا من البنات اللي مش فارقه معايا بصراحه؛ يعني عندي شويه حاجات في دماغي و لو متوافره و معاها تفاهم و حب و تعارف مفيش مانع أننا نأخذ فرصه للتعارف (مفيهاش تدبيس أصلها)؛ بس لو هو عكس اللي في دماغي يبقى بلاش و لو مافيش حب ولا تفاهم يبقى بلاش برضو (مفيش نصيب). مفيش غصب في الموضوع ولا فرجه ولا حاجه؛ مش بحس أني في فاترينه ولا حاجه. و الموضوع ملوش علاقه بالسن ولا حاجه (انا في العشرينات)؛ بس يعني في ناس واخداها أني وصلت لل30 فيما فوق و متجوزتش و لازم أتجوز و أخلف عشان ميبقاش فاتني حاجه في الحياه (بنات و ولاد على فكره بيفكروا كدا) ف بيتم تشويه صوره التعارف الرسمي أو جواز الصالونات. 

كل لما أروح النادي بشوف قعده جواز الصالونات دي؛ و أخر مره كانوا جنبي جداً و قدرت أسمعهم و يا ريتني ما سمعت بصراحه. 

معرفش ليه في جواز الصالونات البنات بتحب تتصنع أوي و تمثل شخصيه مش شخصيتها خالص؛ و الولاد كمان أوقات كتير بيمثلوا حاجه مش حقيقيه خالص. و اللطيف أنكم دلوقتي بتمثلوا و بكرا هتتفجئوا بالحقيقه و يكون في أكبر نسبه طلاق على الإطلاق. طب ليه بنمثل من الأول؟!! يعني ليه منكونش على طبيعتنا و يا أوك يا لاء بالحقيقه مش بالتمثيل. بعدين مشكله التمثيل بردو بتبدأ لما الأم بتقعد تحفظ بنتها كلمتين عشان الموضوع يمشي على خير؛ وتظهر عاقله و بتاع!! و تختار لها هدومها الشيك و مش عارف أيه (الأم بتساعد البنت تمثل!!!) و برضو بنشوه فكره جواز الصالونات!!

طب ليه ماتروحيش تقبلي العريس و أنتي بفطرتك جداً؛ و بشخصيتك الحقيقيه جداً و بالواقع بتاعك و لما تتكلموا تتكلمي على طبيعتك و بحقيقتك من غير أي تمثيل و قرف. لما قعدت في النادي أخر مره البنت أول سؤال سألته للولد كان عن الصلاه (أه والله دي أهم حاجه بالنسبه لها) قالت له يا ترى بتصلي ولا الجمعه بس؛ و أنا عندي أعتراض أن الصلاه دي علاقه الرب ب عبده و فرض و مهمه؛ بس حضرتك ملكيش أي دعوه (بالنسبه ليا دا سؤال سطحي) و كأنك بتقيس سرعه القطر بالليتر!!. و بعدين قعدوا يتكلموا و طول الحديث بتقولوا "من واقع تحليلي لشخصيتك" (هو لو عايز دكتور نفسي كان راح ل دكتور نفسي؛ مين قال لك تحليلي شخصيته). و دا مجرد مثال و ما خفي كان أعظم بكتيييييير !!! (و عموماً ربنا يكرمهم و يتمم لهم على خير لو دا خير ليهم؛ بس سؤالي هو ليه الأسئله اللي كأنك في أنترفيو دي أو في النيابه؟؟)

الزتونه من الموضوع دا كله بالنسبه ليا أنا ك واحده من ال"هي" في المجتمع؛ ممكن أوافق على مبدأ جواز الصالونات بس بمبدأ أني أتعرف عليك و نشوف طبيعتنا و حياتنا و أرائنا عشان دي حياه و عمر بصراحه و مش هضحي بيهم (مش صلاه و تحليل شخصيه هما اللي هيحددوا المستقبل). و لو أنتي من الناس اللي رافضه الموضوع متروحيش تقابليه أصلاً بس بلاش تمثيل و تطفيش ونبي. و لو مش فارقه معاكي قدامك حل من حلين أتنين يا توافقي (متمثليش و خاليكي على طبيعتك) يا ترفضي (و متمثليش برضو). و بلاش حوار النيابه دا؛ عشان هو مش مع لميس الحديدي!! يعني هو و أنتي بتقبلوا بعض للتعارف مش أكتر و التعارف مش بالأنترفيو ولا  التحقيق و طرف بيسأل و التاني بيرد؛ و لكن بالحديث و أننا بنرغي و ندردش من الأخر. أحنا اللي بنفشل قصه جواز الصالونات دي؛ بس الجواز في العموم زي البطيخه و مفيش حاجه ناجحه 100% ولا حاجه فاشله 100%.

و نيجي ل هو بقا؛ بما اننا هنتكلم عن جواز الصالونات- الجملة نفسها سخيفة 'جواز صالونات، جواز صالونات' سخيفة بجد- بس مانقدرش ننكر برده ان فى عدد مُحترم من الناس شايف ان دة من احسن الطُرق للجواز و ان برده فى عدد كبير من من جواز الصالونات حولينا نقدر نقول عليه ناجح، نظرياً. 

ليه بقول نظرياً؟ عشان ببساطة فكرة جواز الصالونات قايمة على ان الشخص خلاص اتعلم و اتخرج و اشتغل و مفيش حاجة ناقصة او مفيش حاجة ماعملاهاش الا الجواز، بالتالى لازم يروح البترينة - الى هو الصالون او النادى او اياً كان المكان- عشان يعاين و يختار. المشكلة مش مشكلة هو لوحده، المشكلة عند هى كمان, و المشكلة مش فيهم اد ما فى مفهوم الجواز المُتعارف عليه. فكرة ان يلا انا خلاص باشتغل بس ناقصنى انى اتجوز. الجواز و الاسرة من احلى الحاجات فى الدنيا، بس و التفاهم و الاحترام و توافق الشخصيات و الدعم و تحمل المسؤلية و الاهم منهم الحب هيتحقق ازاى؟ مش مهم كله بيجى بعد الجواز. و طبعا المفهوم دة بيكون عند البنت كمان ان كله هيجى بعد الجواز، و من هنا بتحصل المشاكل. لما بيكون دة المفهوم عند هو و هى انه كله بيجى بعد الجواز بس المهم الجواز يحصل و كل واحد فيهم بيكون مستنى الشخص التانى هو الى يضحى او يجوى على نفسه عشان العيشة تستمر. و دة بيحصل بدليل جوازات الصالونات الكتير الى شايفنها و ناجحة بس بيحصل لما حد من هو او هى يقرر انه يضحى. طبعاً لو ماحدش منهم ضحى الجوازة بتبوظ و دة برده بيحصل بدليل نسب الطلاق العالية جداً دلوقتى. 

هو طبعاًالتضحية من هو و هى فى اى علاقة جواز مطلوبة و هايجى وقت ولازم حد يضحى. بس الفرق كبير اوى لما حد يضحى عشان بيحب الشخص التانى و يكون متأكد انه بيضحى عشان الحياة بينهم تستمر و حد بيضحى عشان بس الجوازة ماتبوزش و تبقى ايام الشخص عايشها و السلام. 

لازم برده نكون واقعين و نبقى عارفين ان مش كل جواز الصالونات فاشل و مش كل الجواز الى عن حب ناجح. وفى النهاية الجوازة زى البطيخة يا تطلع حمرا يا تطلع قرعة

هو و هي دايماً مستنين رأيكم في المواضيع اللي هنتكلم معاكم فيها على الهاشتاج دا #هى_و_هو 
**أحنا بننقل اللي بنشوفوا و مش شرط أبداً يكون رأينا الحقيقي أو بيعبر عن أرائنا الشخصيه. 
**لما بنقول رأي مش بنقصد كل البنات ولا كل الولاد؛ بس قصدنا على الأغلبيه الا من رحم ربي يعني.