هو و هي-Friendzoned

طلب من هو و هي أسمعوا الأغاني دي عشان تدخولوا في الmood و كل مقال هيكونوا موجودين في أوله عشان تفتكروا الخناقه الأبديه بين أدم و حوا!!

• https://soundcloud.com/ahmed-kheidr/pbyfn1rbblfr "هو و هي" سعاد حسني و أحمد ذكي.
• https://soundcloud.com/moawad/icejgkpiazzp "مين بيكمل مين" أمينه و هاني عادل.
• https://soundcloud.com/abo_elsho2/rlkyzz4blrrw "بالعكس" عبير نعيم و رامي عياش.

كلنا بنمر بمراحل كتيره او zones مُختلفة طول ما أحنا عايشين بدايةً من ال comfort-zone و دى ال الى بنبقى واخدين راحتنا فيها و مش بنبذل اى مجهود عشان نتعامل فيها، مش بس كدة احنا كمان بنلاقى الناس الى بنحبهم جوة ال comfort-zone دي و غالباً دة بيحصل بشكل تلقائى؛ بالاضافة لكدة، دى ممكن تكون من اكتر ال zones المُريحة او المفضلة للناس. محدش عايز يطلع براها خوفاً من المجهول؛ أو القرف اللي ممكن يشوفوا. أنا مبسوط كدا و مرتاح كدا؛ مبسوط و مرتاح مع الناس دي و مش عايز مخاطر ولا قرف. 

 نيجى بقى لأكتر ال zones رخامة و هى ال friend-zone . و دى ببساطة , للي ميعرفهاش و معداش عليها، هو يقابل هى و يحس ان فيها حاجة مُختلفة ف يقرب لها اكتر و يحاول يعرفها اكتر؛ يبعتلها morning text و حاجات من دى كتير لحد ما يتعلق بيها و يحبها. ولما هو يقرر يقول لها انه مُعجب بيها او بيحبها  ف بيكون  ردها "خلينا صُحاب احسن" و العكس ممكن يحصل برده. طبعاً بقى واضح جداً ليه هى من ارخم ال zones  لأن هو مش شايفها كصاحبته هو شايفها حاجة اكتر من كدة و عشان كدة قالها هو حاسس ايه! طبعاً هى ليها الحق المُطلق فى انها متبقاش شايفاه زى ما هو شايفها. هى ممكن متبقاش شايفاه غير a close friend و بس. 

طيب المشكلة فين؟ المشكله فى هو ولا في هى؟ المشكلة ممكن تكون فى عدم تقبل هو لحقيقة احساس هى من ناحيته، و فى الحالة دى القرار بيكون فى ايد هو. يعنى هو لازم يقرر هايقدر يكون من صُحاب هى و ينسى اعجابه ليها و لا انه يبعد عنها خالص لحد ما ينسى احساسه من ناحيتها أو الحل الأخير أنه يفضل يحبها بينه و بين نفسه و هي فاكره أنه خلاص مبيحبهاش و مش بيفكر فيها . بس دايماً الحل الأول بيكون مُتعب و رخم جداً ل هو؛ و الحل الأخير بيكون صعب جداً بس هي اللي في الأخر بتختار.

•  لأن ببساطة معظم البنات بياخدوا هو- فى الحالة دى- for granted، يعنى البنت بتبقى عارفة ان الولد مُعجب بيها او بيحبها و عارفة انها لو احتجاته هيكون جمبها. طبعاً البنات الى بياخدوا ال attitude دة عشان هما قمة فى الانانية - و هنا دى تبقى مشكلة هى-
• عشان هى بتتعامل عادى كَصُحاب و هو لسة احساسه ماتغيرش من ناحية هى، و فى الحالة دى تبقى مشكلة هو.  

بس فى الاخر هو لازم يبقى عارف ان المشكلة مش فيه هو شخصياً ولا لازم تكون فى هى، الموضوع كله ان الspark  ماحصلش و دى حاجة غالباً مالهاش سبب معروف. اما بنسبة ل هى، فالمفروض تبقى عارفة انه مش عشان الولد بيحبها و لطيف معاها انها تستغل دة و تاخده for granted، ببساطة هو ممكن يكون بيديكى فرصة عشان تشوفيه بشكل تانى او تعرفيه اكتر. فممكن تخدي لنفسك الفرصة انتِ كمان مش هتخصرى حاجة، لأنه فى احتمال يكون هو الشخص الى انت بتدورى عليه و انتِ مش واخدة بالك منه.

أما بالنسبه ل هي؛ هي متفقه تماماً مع هو و دا غير مقصود بالمره! المهم يعني أيه يعني FRIENDZONED دي؟ دا يعني "هتفضل طول عمرك صديق و بس؛ عمرك ما هتتحول لحبيب"؛ رخمه مش كدا؟ و الله قولت كدا! بس تعالوا نفكر بالعقل شويه؛ أيه اللي يخلي الشخص اللي قدامي FRIENDZONED؛ هو أنا قصده أكون رخمه يعني؟

• لو السبب أني مش حاسه نفس أحساسه يبقى أنا صح أني من الأول كنت صريحه. 
• لو السبب أني لسا مش فاهماني أو أني معجبه بغيره أو أي حاجه من الحاجات دي ف برضه كويس أني صريحه.
• لو بحاول أكون تقيله؛ حسبي ل تتقلي زياده عن اللزوم! هو أه "أتقلي على الرز" بس أوعي تسبيه يتحرق يا موكوسه.

الحل الأخر لعدم الصراحه هيكون أنك شايله لامؤخذه أستبن؛ زي الكوتش اللي أحتياطي في العربيه كدا عشان لو غيره فرقع! أنا مش حاسه نحيتك بحاجه بس يمكن أحس بعدين؛ أو أنا مش بحبك بس خايفه ملاقيش اللي يحبني أو خايفه لحسن اللي معجبه بيه ميكونش معجب بيا. و دا لامؤخذه بردو أستعباط و أستهبال؛ لأنك كدا بتلعبي بولاد الناس.

لو بقا خدنا الموضوع بشكل تاني و هو أن البنت هي الFRIENZONED و مش الولد؛ يعني البنت معجبه بولد و الولد مش حاسس بيها ولا حاجه. أظن أنها نفس الحاله بس بالعكس. يعني المفروض الولد يقطع الشك باليقين و يا يبادلها نفس الشعور يا يقولها أنها صحبته مش أكتر. و غير كدا يبقى بيلعب ببنات الناس.

الموضوع مش أزمه ولا عقده؛ بس حله في أيدك أنت. يعني زي ما هو قال؛ يا تنسى خالص مشاعرك و تتعامل بصداقه يا تنسى الشخص خالص و تبعد عشان أنت مش قادر تنسى فكره حبه و مشاعرك. 

نصيحه مني؛ بسطوا الحياه عشان تعرفوا تعيشوا. اللي بيحب حد يروح يقول له و اللي مش بيحب حد بردو يقول له. و لازم تتقبل الحالتين؛ و في الأخر متندمش لو أتأخرت في الحالتين بردو.

هو و هي دايماً مستنين رأيكم في المواضيع اللي هنتكلم معاكم فيها على الهاشتاج دا #هى_و_هو 
**أحنا بننقل اللي بنشوفوا و مش شرط أبداً يكون رأينا الحقيقي أو بيعبر عن أرائنا الشخصيه. 
**لما بنقول رأي مش بنقصد كل البنات ولا كل الولاد؛ بس قصدنا على الأغلبيه الا من رحم ربي يعني.