هو و هي-الزنانه

طلب من هو و هي أسمعوا الأغاني دي عشان تدخولوا في الmood و كل مقال هيكونوا موجودين في أوله عشان تفتكروا الخناقه الأبديه بين أدم و حوا!!

• https://soundcloud.com/ahmed-kheidr/pbyfn1rbblfr "هو و هي" سعاد حسني و أحمد ذكي.
• https://soundcloud.com/moawad/icejgkpiazzp "مين بيكمل مين" أمينه و هاني عادل.
• https://soundcloud.com/abo_elsho2/rlkyzz4blrrw "بالعكس" عبير نعيم و رامي عياش.

لما أتكلمنا المره اللي فاتت عن الغيره؛ أحنا ظلمنا الولاد أنهم عندهم وشين و double standards. المره دي لما قررنا نتكلم عن الزن؛ هنظلم البنات. أنا معترفه أهو؛ لأن دا أعتراف واضح و صريح بزن البنات!! أصل مافيش حد زنان زي ما البنات زنانه. بس أنا كشهد لازم أقول أن البنات ليهم عذرهم أحياناً بردو. الزن: هو قدرة الشخص على الالحاح و الاصرار على الكلام فى موضوع محدد. بس القدرة دى بتختلف مع اختلاف الشخص. خلينا بس نتفق ان فى فرق بين الرغى و الكلام الكتير و الزن؛ الرغى بيبقى كلام عادى فى اى حاجة فى اى وقت ممكن يبقى رغى فى حاجة مفيدة او مجرد رغى لكسر الملل و ال awkward silence و دة مش بيفرق بين ولد و بنت عادى فى ولاد رغاية زى ما فى بنات رغاية. 

نيجى بقى لموضوعنا و هو الزن، البنت عندها القدرة على الزن بمعدل من ٨-١٠ كلمات فى الثانيتين- دة مش رقم حقيقى دة مجرد افتراض لتوضيح الموقف- شوفوا بقى البنت بتفضل تزن كام دقيقة. طبعاً الزن بيضايق و يعصب ناس كتير مش لازم يعصب الولاد بس لأن زن البنت على مامتها بيعصبها برده فا بلاش نظلم الولاد. بس هو اصلاً البنات بتزن ليه؟ و عشان هو مش بيحب الرغى و الزن الكتير، خلينى اتكلم على الزن بين هي و هو بس. مش شايف ان فى انواع للزن مابين هى و هو، هو كله زن بس ليه احتملات كتير. مثلاً فى ولاد او رجالة مش كسلانين جداً و مش بيعملوا حاجة من الحاجات الى المفروض يعملوها مش عشان هما مايقدروش لأ عشان هما كسلانين، هنا بيجى دور هى فى انها تفضل تزن على هو عشان يخلص الحاجات الى المفروض يعملها.

فى حالة تانية لما الولد او الراجل يقول للبنت على حاجة محددة لأ و هى تفضل تزن على انها عايزة الموافقة على الحاجة دى. الموقف دة بقى ممكن نقف عنده لأن المفروض العلاقة بين هو و هى فيها تفاهم و مسئولية. يعنى لما هو يقول لأ المفروض ان هى تبقى فاهمة هو بيقول لأ ليه و تحاول تقنعه بوجهة نظرها و لو فعلاً العلاقة مابينهم فيها شئ من التفاهم و المسئولية مش هيبقى المشكلة فيها زن لأن النقاش هيبقى على سبب الرفض من هو ليه هى عايزة الموافقة.

فى بقى نوع من الزن من اكتر انواع الزن المزعجة، لما هى تفضل تزن على حاجة و هو مش بيعملها -و هو فى الموقف دة مش من النوع الكسول- بس هو بيأجل فى الحاجة لاى سبب ممكن الوقت بنسباله مش كويس ممكن مايكنش معاه فلوس كفاية و ممكن حجات كتير - و هى شغالة زن. ممكن هنا يبقى هو عليه شئ من اللوم لانه مش بيوضح السبب بس برده ارجع تانى لموضوع ان العلاقة ما بين الاتنين لازم يبقى فيها ثقة. لان هى لازم تبقى واثقة فى هى و واثقة انه هيعمل الحاجة الى هى بتزن عليها فى الوقت الى المفروض يعمل فى الحاجة. نوصل فى الاخر ان المفروض البنت تبقى ناصحة و عارفة امتى تسكت و امتى تزن.

و بعد ما هو قال أن البنات هما رقم واحد في الزن؛ أنا مش هقول غير أن البنات فعلاً زنانين أكتر من الولاد. بس البنات لهم عذرهم لأنهم بيزنوا لأن مافيش رد للي بيقوله و هي بتكون شايفه أن اللي بتقوله دا أهم من مشكله سد النهضه أصلاً و أهم من أهم شئ. لما بتقولك حاجه و أنت متعملهاش لأنك مكسل ولا أن مشغلك كتير؛ أو تطلب طلب و أنت تقرر أنه لاء و بدون أي أبداء للأسباب. 

يعني البنت بتبداُ ك طفله زنانه و أمها تزعق فيها لأنها زهقت منها و من زنها؛ طب ما الولد بردو بيزن على الكوره و الplay station و حاجات كدا و أمه بتزعق له بردو أو بتسيبه و تمشي. طب ما هو الأتنين بيزنوا أهو بس المواضيع مختلفه؛ يعني البنت بتزهق من زن الولاد لأن الولد بيزن في حاجات هي شايفاها ملهاش أي أهميه أصلاً. و هو بيزهق من زن هي عشان المواضيع اللي بتزن فيها هي مش على هواه. 

يعني هي هتزن لو أنت مكسل؛ مكسل دي يعني مش بتعمل اللي بيتقال لك و قاعد مش مهتم ولا كأنها قالت حاجه! يعني قاعد بتتفرج على الماتش و المفروض يعني أنك تعمل حاجه مهمه بالنسبه لها و قولت أنك هتعملها و بعدين قررت تتنح بقا و متعملش حاجه. أو هي هتزن لما أنت تقول لاء و خلاص؛ يعني أيه لاء!! أزاي تقول لاء و تستنى أني أقبل دا و بدون زن ولا نقاش؛ يابني ما هو زي ما أنت شايف أنه لاء أنا شايفه أنه أه. هي مش حرب بس مين اللي هيكسب و بدون تنازلات يعني؛ أقنعني و والله مش هنزن. و أخر نوع هو الزن على حاجه مش بتتعمل؛ أنا مع هو أنه مزعج و متعب للأعصاب جداً. بس تخيل معايا أن في حاجه مهمه جداً بالنسبه ليا و أنا أعصابي تعبانه و حضرتك مش بتعملها و مش بتقول أسبابك أيه؛ كل اللي بتعمله أنك متضايق من الزن. طب ما تفكر كدا تقعد و تكلم معايا و تقول لي أسبابك ما هو عادي أني أفهمك أو تفهمني؛ و نتفق على حاجه سوا و هبطل زن.

زن البنت مش كله بسبب البنت يعني؛ أوقات كتير أوي السبب بيكون أنت يا هو. يعني السبب أنك مش بتكلم أو مش بتشرح أو مكسل! طب ما هو الحل بالنسبه ليا الزن لحد ما تستلم و تعترف أيه أسبابك و أيه دوافعك أنك تنسى أو متعملش أو متوافقش! يعني بالنسبه ليا حل الموضوع دا كله في الحوار بين هو و هي؛ لو الحوار داير يينكوا مش هيكون في سبب للزن خالص.

هو و هي دايماً مستنين رأيكم في المواضيع اللي هنتكلم معاكم فيها على الهاشتاج دا #هى_و_هو 
**أحنا بننقل اللي بنشوفوا و مش شرط أبداً يكون رأينا الحقيقي أو بيعبر عن أرائنا الشخصيه. 
**لما بنقول رأي مش بنقصد كل البنات ولا كل الولاد؛ بس قصدنا على الأغلبيه الا من رحم ربي يعني.