قادرون بأختلاف .. مكملين
الشخص الأربعه و الثلاثين؛ أسامه أحمد عبدالعزيز الديجوي؛ عنده 21 سنه و بيدرس في كليه أداب جامعه القاهره قسم فلسفه في الفرقه التانيه. بس في الأساس أسامه بيحب الرسم الكارتون و الجرافيك؛ و نفسه يشتغل في المجال دا و مش في مجال عمله خالص.
أصابته من يوم ما أتولد؛ أتولد و شبكه الأعصاب برا جسمه و في فقرتين ناقصين. و دا سبب الأصابه؛ دا غير أنه مركب شنط في دماغه من عمر ساعتين. حياته قبل أستخدام الكرسي المتحرك هو مش ميعرفهاش خالص؛ بس الحياه بالكرسي مفيهاش أي مشكله ولا عوائق. أسامه شخص عادي جداً و بيعمل كل اللي هو عايزه؛ دا حتى الكرسي بيساعده يجري أسرع من صحابه. أما بالنسبه للمشاكل ف هي مش بتفرق معاه كتير لأن دي حياه و كمان في مصر ف لازم يكون في مشاكل؛ بس أهم المشاكل الرصيف العالي، الرامب، أماكن ركن العربيات الخاصه.
التحدي بالنسبه لأسامه مش في أستخدام الكرسي بس في الوصول للcareer اللي هو عايزه. و من أكتر المواقف الكوميديه اللي حصلت معاه هي أن الكرسي لازم يتكسر كل سنه. و بما أن صعب أستخدام الكرسي في الشوارع المكسره ف بواب العماره طلع ب قانون جديد ساعدوا جداً في أستخدام الكرسي بسهوله أكتر و هو أن الكرسي يميل لورا و يطلع بضهره ف الوزن يكون أكتر على العجلتين الكبار؛ الفيزياء طلعت مهمه.
نرجع لمشكله الcareer أو التحدي؛ بيته عباره عن فنانين كتييير. باباه دكتور في فنون تطبيقيه و أخوه خريج فنون تطبيقيه بردو و أخته تربيه فنيه؛ و أسامه بيرسم من و هو عنده سنه و بيحب يرسم كارتون جداً. و بعد ثانويه عامه؛ قدم في فنون تطبيقيه و فنون جميله و تربيه نوعيه، و عمل أختبار القدرات و نجح فيه بس كان الرد مش بنقبل معاقيين!!! و دخل كليه أداب و بيشتغل freelancer في الجرافيك على خفيف؛ و نفسه يكون cartoonist و digital artist بس مفيش لا فرصه ولا أمكانيات.
و دي شويه من رسوماته:
Comments
Post a Comment