هو و هي-لو دا هيثبت لك اني

طلب من هو و هي أسمعوا الأغاني دي عشان تدخولوا في الmood و كل مقال هيكونوا موجودين في أوله عشان تفتكروا الخناقه الأبديه بين أدم و حوا!!

• https://soundcloud.com/ahmed-kheidr/pbyfn1rbblfr "هو و هي" سعاد حسني و أحمد ذكي
• https://soundcloud.com/moawad/icejgkpiazzp "مين بيكمل مين" أمينه و هاني عادل
• https://soundcloud.com/abo_elsho2/rlkyzz4blrrw "بالعكس" عبير نعيم و رامي عياش

و بعد ما أتكلمنا على أول مقابله؛ أكيد حصل مقابلات تانيه كتيره؛ بس مش هنتكلم عن كل خروجه و كل مقابله؛ ولا هنتكلم عن كل نظره و كل كلمه و كل همسه. هنتكلم عن اللحظه اللي بيحصل فيها كهربا كدا بين الأتنين؛ لحظه ما الكيميا ما بين هو و هي بتحصل. من الأخر هي لحظه مش بتتوصف بس بتتحس على رأي الأخت نانسي عجرم. يعني وقت ما هي بتحس بأعجاب ب هو؛ و هو يحس بأعجاب ب هي. أعجاب متبادل يعني؛ و تفضل هي تستنى هو لحد ما يقولها أنه بيحبها-يعني أقولها دلوقتي أني بحبها؟-. و هنا تبدأ الحكايه؛ أو الرحله بين أتنين بيعرفوش بعض بس هيتحولوا ل توأم روح بعض. يعني هيبدأوا يطلعوا السلم من أعجاب لحب لأكتر و أكتر و لحد ما ينتهي أو يتطور لجواز. 

هي ليه مش بتقول لما بتعجب و تحب هو؟ و ليه بتفضل مستنياه يقولها أنه بيحبها. من وجهه نظري الموضوعيه؛ البنت بتحب تحس بالأهتمام و أنها أميره ف مش سهل و يكاد يكون مستحيل أن هي تأخذ الخطوه الأولى. بالعكس تماماً هي بتستنى تشوف الخطوه الأولى من هو عامله أزاي و يتحدد عليها مصير العلاقه كله؛ مش فكره معقدين بس أحنا بنحب نحس أن هو مهتم و بيتعب نفسه عشان يوصل لنا. أنا بصراحه صعبان عليا هو بما أنه بيأخد الخطوه الأولى و لازم الخطوه الأولى تكون مبهره جداً و في نسبه خطوره أنهم يخسروا بعض حتى لو ك أصحاب عادي لو هي مش بتبادله نفس الشعور. مشفقه عليك يا هو و الله؛ بس بردو لازم تتعب عشان توصل ولا أيه.

"محدش بيأكلها بالساهل."

نيجي ل هي بقا؛ عشان أكون منصفه جداً أحنا دورنا مستقبل مش أكتر؛ ف بلاش نعيش في الدور بزياده. و بردو يعني أحنا مش عبط ولا هبل؛ و عندنا قرون الأستشعار اللي بنعرف بيها لو هو معجب ولا بيحب أو لاء. أحنا البنات بنحب المفاجائات ف أظن أن لو هو تعب أكتر من أنه يجي بس يقول أنه بيحبك هيكون أحلى بكتييير و هتكون لحظه مش هتتنسي أبداً؛ يعني لو جيه هو و مثلاً كتب جواب فيه كل مشاعره و كل الكلام اللي عايز يقوله؛ و بعدين وصلهولك بأي طريقه في أيدك ولا رماه في الشنطه و لا حطه على المكتب ولا أي طريقه. مش بالذمه هتنبهروا و مش هتنسوا الحركه دي و هتكون أول ذكرى حلوه و مميزه في قصتكم سوا-بدل كلمه بحبك في الchatting و خلاص. أصل الأعتراف بالحب دا بيكون زي proposal صغير جداً؛ ف لازم يكون معمول حلو و مختلف. 

**أنا مؤمنه بكلمه أحمد زكي في فيلم أضحك الصوره تطلع حلوه "كلمه بحبك دي أكبر عقد."

**نصيحه ل هو: خاليك مبتكر و خاليك جرئ!! متخليش حاجه تواقفك و متخفش. 

و روح أثبت ل هي أنك بتحبها؛ و مش شرط تكون أحمد السقا اللي نط في الشلال؛ مش كل الأبتكار جنان يعني.

حاجه أخيره عايزه أوضحها؛ الأعجاب حاجه و الحب حاجه تانيه خالص. الكيميا اللي بتحسها في الأول خالص و تروح تعترف بسرعه أنك بتحبها و تدعي ربنا أنها كمان تحبك؛ دا بيكون أعجاب و دا مرحله مبدائيه جداً جداً فيها بس بتتعرفوا أكتر و بتكونوا عارفين أن فلان دا مميز شويه عن باقي الرجاله و فلانه دي مميزه جداً عن باقي البنات. و بعدين بتبدأوا تطلعوا السلم سوا و يتحول الأعجاب ل حب. 

أهم حاجتين في الحب دا؛ أنه يكون حقيقي و مش بيروح بالوقت بالعكس دا بيزيد. و يكون في بينكم حياه مشتركه أنتم اللي خلقتوها سوا؛ بتتشاركوا في الأهتمامات و يتشجعوا بعض-حوا مخلوقه من ضلع أدم؛ و متقدرش تعيش من غيره. و في نفس الوقت وراء كل رجل عظيم أمرآه.- بالنسبه ليا دول أهم حاجتين عشان رحله الحب تكون مثمره.

أول مرة اتفق مع هى فى حاجة من الحاجات اللى بنكتبها لما قالت "يتطور للجواز" مش ينتهى زى ما اغلب الناس بتقول؛ عشان الحب مش بينتهى بالجواز بالعكس المفروض الجواز يخليه اقوى و اعمق. بس خلينا ماشين مع الناس-اللى انا باختلف معاهم- اللى شايفة ان فعلا نهاية الحب هى الجواز ؛ مين اصلاً الى بيحدد بداية الحب عشان يحدد نهايته؟   

مبدئياً الحب عموماً شعور صعب وصفه بس الاكيد انه من مسببات السعادة و النجاح و الفرح ، مش دايماً مسبباته مبهجة لانه بيسبب القلق و الخوف كمان.  

نرجع لموضوعنا اللى هو الحب مابين هو و هى. بصراحة مش بشوف الموضوع أزمة يعنى هو معجب ب هى و حاسس انها مش زيها زى اى حد-بيحبها من الاخر بس عايز ياخد الموضوع خطوة خطوة-لازم ييروح يقولها. طبعاً الحياه مش بتمشى سهلة كدة عشان ال over-thinking مبهدلنا كلنا. ال over-thinking فى انه ممكن يخسر البنت دى خالص و الموضوع بدل ما يتحول ل حاجة حلوة قوى يتحول لحاجة من اوحش الحجات الى ممكن تحصل ل هو، الرفض. ممكن جداً تكون هى مش حاسة بنفس الاحساس الى هو حاسس بيه و حقها اكيد؛ بس لو هو قالها انه معجب بيها او بيحبها و هى معندهاش نفس الاحساس دة مش لازم تبقى سخيفة، بمعنى ان ردها يكون انهم مينفعش يعرفوا بعد تانى و انهم مايتكلموش تانى و انها تقول لصحباتها دا هو كان بيموت فيا بس مش الأستيل اللى فى دماغى. ببساطة هو عمل خطوة صعبة قوى و هى انه يعترف للبنت الى بيحبها بحبه دا ف مش لازم تصعبيها عليه بزيادة و تقولى له المفروض مانكلمش تانى عشان ينسى، مش انتِ الى تقولى سيبِ القرار دا لى هو؛ يا هو هيبعد من نفسه او هيحترم فيكى انك قولتيله لأ بشياكة و هيعرف هو يتعامل. 

 نيجى بقى لما هى تبقى معجبة بولد عمرها ما بتفكر تروح تقوله او تظهر له بأى طريقة عشان الموضوع صعب جداً، بشكل اوضح مش الموضوع هو اللى صعب الخوف من رد الفعل و ان الواحد يتوقعه هو اللي صعب. مش لازم تروحى تقوليله فى وشه بس فى حاجة اسمها signs؛ يعنى ممكن توضحي له بأى طريقة و كدة تبقى كسبتى حاجتين انك وصليتله اللى انت حاسة بي و انت مقولتيش حاجة مباشرة و اديتله الشجاعة ان لو حاسس حاجة يقولها. 

بنسبة لسؤال مين الى بيقرر ان الحب ابتدا اصلاً عشان ينهيه فالاجابة هما الاتنين اللى بيحبوا بعض ذات نفسهم. هما الى بيقرورا امتى الموضوع يبتدى او امتى خلاص تخلص الحكاية. عشان كدة لازم هو و هى يدوا نفسهم فرصة انهم يفكروا كويس و ييفهموا بعض كويس قبل ما يقرورا القرار الاول عشان دا مش مجرد قرار دا مسئولية تجاه شخص عايز تكمل حياتك و هو جمبك و تشارك كل تفصيله فى حياتك معاه؛ او لو القرار التانى عشان دا بيهد من الحاجات اللي كان هو و هى بيحاولوا يبنوها.

و دا رأي هو و هي في موضوع الأعجاب و الحب من أوله لأخره. و عشان نفكركم دا مش رأي شخصي و مش رأي ينطبق على كل الناس.