لف و ارجع تاني

لو عملت حاجه غلط و حسيت انها غلط؛ متندمش بس اتعلم من غلطك و حاول تلف و ترجع تاني. مافيش حاجه اسمها الوقت اتأخر ولا أي حاجه من الهبل دا؛ في حاجه واحده بس اسمها ان كل بني ادم يستاهل فرصه تانيه. اي بني ادم ممكن يغلط و يتعلم و يتغير مش عيب ولا مستحيل. 

العيب و المستحيل هو الندم؛ هتعمل ايه لما تندم و تبكي على اللبن المسكوب؟!

في اوقات كتير بنعمل حاجات غلط؛ قرار غلط ممكن يحصل عادي؛ المهم انك ترجع تاني. يعني لو قررت تدرس حاجه و لقيتها مش لايقه عليك و مش حبيبها؛ يلا خد قرار و اعمل الصح و غير الدراسة اللي مش عجباك. و لو اشتغلت شغلانه مش على هواك؛ مش عيب انك تغير شغلك او شركتك او المجال كله اصلا. لو حبيت حد و طلع غلط؛ مش عيب ابدا تلف و ترجع تاني. لو حاسس أن شكلك فيه حاجات عايزه تتغير؛ مثلاً نفسك تخس يلا خس. المهم تكون مبسوط و فرحان و عامل اللي بتحبه و مرتاح له و بس.

بس قبل ما تقرر انك تلف و ترجع تاني؛ خد وقتك و اتعلم من غلطك و مترحمش نفسك. مش قصدي تعذب نفسك يعني بس قصدي تتعلم صح و تعترف بغلطاتك كلها منغير ما تجمل الحقيقه ولا تزوق فيها. و بعد ما تتعلم من غلطاتك بقا؛ ابدأ خد قرارات ينفع تتنفذ؛ غير دراستك او غير شغلك او غير شكلك او اعتذر أو أتغيير أو أعمل اللي بتحبه أو حب اللي بتعمله؛ من الأخر سيب العلامه اللي أنت عايز تسيبها.
من الأخر كدا اعمل الصح! و متخفش من ردود الأفعال. ﻷن أهم حاجه انك متندمش و تعمل كل اللي عليك و بس.

خليك فاكر أن كل حاجه تستاهل فرصه تانيه؛ مش عيب و مش متأخر. أصل الحياه مش هتستناك تذاكر عشان تعملك الأمتحان؛ الأمتحان ممكن يجي قبل المذاكره عشان تتعلم من غلطاتك اللي مش مقصوده ^_^