هو و هي-غيران كدا ليه

طلب من هو و هي أسمعوا الأغاني دي عشان تدخولوا في الmood و كل مقال هيكونوا موجودين في أوله عشان تفتكروا الخناقه الأبديه بين أدم و حوا!!

• https://soundcloud.com/ahmed-kheidr/pbyfn1rbblfr "هو و هي" سعاد حسني و أحمد ذكي.
• https://soundcloud.com/moawad/icejgkpiazzp "مين بيكمل مين" أمينه و هاني عادل.
• https://soundcloud.com/abo_elsho2/rlkyzz4blrrw "بالعكس" عبير نعيم و رامي عياش.

لما قررنا نتكلم عن الغيرة جيه فى دماغى اغنيه بتقول "بغير عليها حتى لما تسلم عالناس" بصراحة الاغنية جات فى دماغى عشان الكلام بتاع الاغنية قمة فى الover؛ و مش قادر اقتنع انه مبالغه فى التعبير عن الحب لأنى ببساطة شايفه تعبير مستفز. اكيد فى ناس بتحب تسمع الأغنية و بتستمتع بيها و ده شئ ماقدرش أعاتب حد عليه و لا شئ يستفزنى شخصياً. بس مفهوم الاغلبية من البنات و الولاد عن الغيرة هو دة الشئ الى يخلينى اسأل نفسى "هى غيرة البنت على الولد -و العكس كمان- دليل على حب الشخص؟"  و "هل هى شئ صحى لعلاقة الأتنين الى بيحبوا بعض ولأ؟" و "ايه هى حدود الغيرة المسموح بيها؟"

بالنسبة للنسبه الأكبر من البنات؛ الغيرة  شئ مهم جداً و بتبقى عايزه من الولد اللى بتحبوا  انه يغير عليها لما تتكلم -مجرد كلام- مع صحابها الولاد؛ و فى نفس الوقت لما يضايق من هزارها الover و الflirtation بين صحابها تقول عليه انه بيقفش على كل حاجة و انه بدأ يخنقها!. عايزه الولد يقولها البسى ده و متلبسيش ده؛ و فى نفس الوقت لو رايحة عيد ميلاد صاحبتها و عايزة تلبس لبس معين و قالها لأ الدنيا تولع ما بينها و ما بينه. 

نيجى بقى للأغلبية الكاسحة من الولاد؛ الولد من دول بيبقى عايز يكون هو المحور الوحيد فى حياة البنت؛ ماتكلمش ولد غيره ماتخرجش خروجة هيبقى فيها ولاد و هو مش معاها؛ و ممكن يكون مش موافق انها تلبس لبس معين عشان هو مش معاها و لما يكون معاها ممكن تلبسه عادى؛ و كل ده تحت اسم الغيرة. عايز هو يكلم سوسو و يدلع على لولو و البنت ماتتكلمش؛ ممكن الموضوع يوصل بيه انه يسيب البنت عشان كانت لابسة لبس هو مش موافق انها تلبسه -و دى انا شوفتها فى الحقيقة مع اتنين صحابى- و برده تحت اسم الغيرة. 

بصراحة المشكلة الكبيرة سببها المفهوم الغلط عن الغيره. عشان الغيره الطبيعية دى بتبقى من الحاجات اللطيفة بين اى اتنين و بتبين قد ايه الشخص ده غالى علينا و قد ايه بنحبه و قد ايه بنغير عليه؛ و الغيرة الطبيعية دى بتظهر فى مواقف محددة مش بتبقى Life Style يعني و نستعملها عشان نبرر بيها حبنا فى التحكم و الاحساس بالسيطرة و الرجولة -ده بالنسبة للولاد-؛ اما بالنسبة للبنات اللى بتبقى عايزة الولد يغير عليها و على طول ف ده مش لازم يكون دليل على حبه الكبير ليكى بالعكس ده ممكن يكون دليل على حبه لنفسه و حبه فى الاحساس بالسيطرة و فرض العضلات مش أكتر. اه و حاجة كمان مش معنى ان الولد ليه صحاب بنات يتكلم معاهم سواء صحابه القدام او فى الدراسة و الشغل؛ انك مش مالية عينه و انه مش بيحبك خصوصا لو هو معرفك على صحابه دول. اه لو الموضوع over اوى بينهم ممكن تبتدى تقلقى بس غير كدة Don’t over think.

دا رأي هو بس هي ليها رأي تاني خالص؛ أنا هرد بأسم هي على ال3 أسئله اللي فوق دول. غيره البنت و الولد على بعض مش دليل على الحب خالص؛ دا دليل على عدم الثقه جايز؛ بس الحب أكبر من كدا كتير و الغيره ممكن تكون لعبه حلوه شويه عشان أظهار الأهتمام و أن الشخص دا مختلف عن باقي الناس اللي في العالم. أنا شايفه أن الغيره صحيه في العلاقه بس لو بحدود مش بزياده يعني؛ زي ما قولت كدا فيها أظهار أن الشخص دا مختلف عن باقي الناس و باقي العالم و باقي الكون؛ و هي كمان تحس أنها أميره حبه و ملكه في قلبه يعني. حدود الغيره المسموحه بالنسبه ليا في الحب؛ أنها متعطلش عن الحياه ولا عن النجاح و الشغل و الدراسه؛ الحب و الجواز دي سكه و الدراسه و الشغل دي سكه و مينفعش يأثروا على بعض بالسلب أبداً و عشان كدا المفروض أن كل واحد يشجع التاني و يقف جنبه و يشجعوا؛ و أكيد مش الهدف أنه ينزلوا الأرض يعني.

في رأيي البنات مش بتتفهم بسهوله؛ بصراحه أحنا نفسنا مش فاهمين نفسنا أوي. بس اللي أعرفه أننا بنحب نحس أننا أميرات و مليكات؛ نحب نحس بالأهتمام و الحب و التفاهم و التشجيع؛ بس في نفس الوقت بنتخنق بسرعه و بنزهق. متهيألي أحنا عايزين حد يفهم أمتى يغير و أمتى لاء و أمتى يعطف و أمتى مش وقته؛ أصل اللي يزيد عن حده يتقلب ضده. يعني أحنا عايزين ولد full option و معاه sensor يحس أمتى يعمل أيه!.

في رأيي بردو الولاد عندهم أنانيه شويتين؛ عايزين كل حاجه ليهم و ليهم بس. يعني البنت اللي بتحبهم مش بتعمل حاجه غير أنها تكلموا 24 ساعه في اليوم 7 أيام في الأسبوع؛ و هو ممكن يكلم 100 غيرها عادي و ميشوفش أنه غلطان؛ ممكن هو يخرج مع بنات أو في مجموعه و فيهم بنات بس هي لايمكن تخرج مع ولاد ولا في مجموعه و فيها ولاد؛ ممكن يسهر ل وش الفجر و يكون online بس هي مينفعش تسهر و عيب و كدا؛ و لو قاعدين في قاعده فيها شيشه مثلاً و في بنات بتشيش عادي بس البنت اللي بيحبها noway أن دا يحصل. من الأخر الولد عنده double standards جداً؛ و بيعاير بمعيارين و اللي بيشوفوا عادي كفه و اللي بتعمله حبيبته كفه تانيه خالص و دا بأسم الغيره.

متهيألي المشكله الكبيره اللي بسببها علاقات كتير بتفشل و تبوظ بيكون السبب الرئيسي فيها الغيره بالشكل الغلط أو الزياده أو تلزيق أي حاجه بأسم الغيره. لأن الغيره الطبيعيه بتكون زي الملح و الفلفل في العلاقه و دي حاجه حلوه و محتاجينها أي أتنين في مراحل معينه من العلاقه؛ بس متكونش الغيره هي الشماعه اللي بيتعلق عليها كل البلاوي. و نصيحه للولاد: البنات بني أدميين عادي؛ و عندهم مشاغل غيرك كتير البنت اللي بتحبك مش مامتك التانيه خالص؛ و عندها شغل و دراسه و مستقبل جنب الحب ف بلاش تكون over و تفتكر أنك الوحيد اللي في حياتها. أما بالنسبه للنصيحه للبنت: غيره الولاد على البنات مش شرط أبداً تكون حب يا هبله؛ بس ممكن يكون أرضاء لأحساسه ب أوبا أنا وقعت البنت دي في دباديبي أو حب الأمتلاك أو أمراض نفسيه كتيره أوي أو مش بعيد أبداً تقلب شك.

**أحب أوضح أننا مش بنتكلم عن كل البنات ولا كل الولاد؛ و الغيره المتوسطه هي اللي بيتقبلها الطرفين؛ أما الغيره اللي بزياده هى اللي فيها طرف مش راضي و مخنوق. ف لو الولد و البنت مبسوطين سوا بالغيره أو منغير الغيره ف ربنا يهني سعيد بسعيده.

**توضيح صغير؛ هو و هي مش قصدهم يتفقوا في وجهات النظر بس دي صدفه جداً و غير مقصوده؛ بس فرصه سعيده أن في ولد بيفكر قريب من البنات و في بنت بتفكر قريب من الولاد.

هو و هي دايماً مستنين رأيكم في المواضيع اللي هنتكلم معاكم فيها على الهاشتاج دا #هى_و_هو 
**أحنا بننقل اللي بنشوفوا و مش شرط أبداً يكون رأينا الحقيقي أو بيعبر عن أرائنا الشخصيه. 
**لما بنقول رأي مش بنقصد كل البنات ولا كل الولاد؛ بس قصدنا على الأغلبيه الا من رحم ربي يعني.