هي و هو-أتقابلنا قبل كدا

طلب من هو و هي أسمعوا الأغاني دي عشان تدخولوا في الmood و كل مقال هيكونوا موجودين في أوله عشان تفتكروا الخناقه الأبديه بين أدم و حوا!!

• https://soundcloud.com/ahmed-kheidr/pbyfn1rbblfr "هو و هي" سعاد حسني و أحمد ذكي
• https://soundcloud.com/moawad/icejgkpiazzp "مين بيكمل مين" أمينه و هاني عادل
• https://soundcloud.com/abo_elsho2/rlkyzz4blrrw "بالعكس" عبير نعيم و رامي عياش

مش عارفه أبدأ منين بس هقول اللي أعرفه و أجري على الله؛ في موضوع التعارف و المقابلات الأولى و شوفنا بعض و الجو دا هتكلم معاكم أنهرده. أول مره أي أتنين بيشوفوا بعض أن كانوا بنات أو ولاد يتكون أهم مره أي أتنين هيتقبلوا فيها أصلاً؛ يا هيتحمسوا يفضلوا صحاب و التعارف دا يزيد و يتحول لصحوبيه و لو هما بنت و ولد ممكن جداً يتحول لأعجاب و حب و قصه رومانسيه جميله يا تنجح يا لاء؛ يا أما المقابله الأولى بردو هتقول لاء مينفعش نتقابل تاني أصلاً ولا نتكلم تاني. و هحكيلكم من وجهه نظر أنثويه للغايه أيه بقا اللي فيحصل في يوم زي دا!

يعني من اللي بشوفوا كدا الولاد بيحكموا شويه بالشكل و اللبس و الكلام دا؛ بس البنت بتهتم أكتر بالشخصيه و العقل و التفكير و الحاجات دي. يعني 31% من الرجاله أعترفه أنهم أحرجوا البنات اللي وزنهم زياده من أول مره أتقبلوا فيها؛ مع أن في البنات اللي أحرجوا ولاد وزنهم زياده كانوا بس 12% (دراسه من Elle magazine و MSNBC.com)؛ و دا بيأكد أن الولاد بيشوفوا البنت بمنظور سطحي بيفرق فيه الشكل مع أن البنت مش كدا في أغلب الأحيان و النسب تشهد!

 و من واقع اللي بشوفوا في مجتمعي الصغير من جامعه و صحاب و كلام البنات؛ الولد أه لازم يكون شكله أبن ناس كدا، و يكون محترم و يعمل حاجه تظهر أحترامه، و يظهر أهتمام بالبنت و أنبساطه أنهم أتقبلوا و يقول لها "It's nice meeting you"، يكون لبسه شيك و الساعه و الجزمه بالأخص ليهم سحر أنا مش فاهمه ليه، يكون واثق في نفسه و مش تافهه ولا مطيور، و يكون لطيف، و يكون بيغير مش كيس جوافه يعني. و زي ما كلنا شايفين و عارفين أن البنت طموحتها أكبر من شكل بكتير البنت عايزه "راجل"؛ و دي الكلمه اللي بيقف عندها ناس كتير جداً و بيكونوا عايزين يفهموا معني للكلمه؛ بالنسبه ليا الراجل هو اللي ناضج و محترم و متدين و مؤمن أن البنت زي الولد و مهياش كماله عدد. البنت بعكس الولد اللي مهتم بس بشكلها و لبسها و شعرها، يخاف و يقلق لو البنت طموحه ولا ناجحه في حاجات مختلفه. 

نقطه على جنب كدا؛ الولد لو معجب ببنت لازم هو اللي يقولها و هو اللي يبدأ بالخطوه الأولى دايماً؛ يعني أوعى تستنى البنت تيجي في يوم و تقولك أنها بتحبك ولا تيجي تخطوبك من مامتك و باباك (مش هنعيش في فيلم هتولي راجل). البنت بتحب أوي تحس أن في حد بيتعب عشانها و بيعمل كل اللي يقدر يعمله عشان تكون مبسوطه و بس.

البنات شايفه أن الولاد سطحيين أكتر من البنات؛ و طبعاً كلامي مش عن كل الولاد بس عن الأغلبيه.

و عشان أرجع للمقال اللي فات؛ لعبه القط و الفار بتتعمل عشان أحساس البنت ساعات انها دولفن. يعني عايزه تنط تأخذ نفس عميييييق و بعدين تكمل عوم و عيشه في المياه. عشان ساعات كتير هو بيحس ان هي امه التانيه؛ الحقيقه انها حبيبه و نص تاني بس مش ام و صعب اوي تتحول لأم بدون مقدمات. ف بتنط تاخد نفس من الطموحات و النجاحات و بعدين تغطس تاني في الحب و الرومانسيات. مش لعبه يا سي هو بس فكر فيها صح؛ بتبعد وقت عشان تقدر تحقق حاجات هي عايزها زي ما أنت بتنغمر اوي في الشغل و تنسى تكلمها ولا ترد عليها او غيره؛ و بتظهر في وقت من اليوم اللي هي فاضيه فيه. الصح تتفقوا تلعبوا قط و فار سوا؛ وقت المدرسه او الجامعه او المذاكره او الشغل هنبعد؛ و وقت الحب هنحب و نقرب عادي. مش فكره زرار و نفتح و نقفل بس فكره كل واحد ياخد فرصته في النجاح و تحقيق الطموح و كل واحد بردو ياخد فرصته في الحب و الرومانسيات. أنتم مش عايشين حياه واحده؛ أنتم عايشين حياتين بس في منهم جزء كبير مشترك.

"لو عايزها أنجلينا جولي؛ خليك توم كروز الأول."

" مش معنى ان الشكل مش كل حاجة؛ انها تنزل من البيت شبه حمادة."

 دى كانت جملة سمعتها من واحد صاحبى. هو صحيح كان كلامه فى المطلق و مش بيكلم على بنت محددة، بس الجملة دى كان لازم اقف عندها و اسأل نفسى: هو احناـ الولادـ  لما بنشوف بنت لأول مرة ايه الى بيشدنا ليها؟ لامؤخذة عقلها و دماغها و طموحها؛ ولا هى لابسة ايه و ازاى و عاملة ايه فى شكلها؟  طبعا اجابة السؤال ده هتختلف من شخص ل شخص؛ بس اغلبية الولاد او الرجالة عموما بينبهروا بالبنت الى بتلفت نظرهم من اول مرة بيشوفها فيها سواء بلبسها او بشكلها؛ و يا سلام لو البنت وصلت للولد احساسه بنفسه و ان قد ايه هو جامد و روش. 

من كلام صحابى الولاد و حكايات صحابى البنات، عرفت ان على عكس البنات الى بيفرق معاهم الولد لابس جزمة و ساعة ولا لأ -عمرى ما عرفت ايه سر الاعجاب المبالغ فيه بالجزمة و الساعة- دمه خفيف و بيعرف يهزر ولا لأ؛ معظم الولاد في اول مرة بيشوفوا البنت فيها مش بيفرق معاهم حاجة خالص عشان يقرروا اذا كانوا عايزين يتعرفوا عليها اكتر ولا خلاص يسيبهم منها؛ غير كام حاجة كدة و هى ان الولد شايف البنت دى حلوة ولا لأ و اديتله ال prestige الى هو بيحاول يرسمه ولا لأ، و بأكد زى ما قلت  قبل كدة "معظم الولاد".  طبعا دة ليه اسباب كتيرة زى نظرة المجتمع للست انها لازم تبقى زى model  الاعلانات و مش مهم اى حاجة تانية زي هى تقدر تعمل ايه و تأثر فى المجتمع ازاى. 

بس في الحقيقة الولاد الى هما اقليه بيبقوا عايزين يشوفوا فى البنت حاجات تانية غير انها حلوة و بتلبس حلو؛ مثلا الذكاء، المسؤلية، الطموح، الرغبة و الاصرار على النجاح، الاختلاف. البنت الذكية اللى عارفة كويس هى عايزة ايه من الدنيا و محددة هى عايزة تعمل ايه فى حياتها بيكون ليها جاذبية كبيرة؛ بنسبة للأقلية من الولاد. و بالمناسبة هما مش اقلية عشان هما Aliens او جاين من كوكب تانى؛ هما بس شايفين الدنيا من منظور مختلف عن معظم الناس. بالأضافة لأنه عارف ان النوع ده من البنات هو اللى ممكن يساعده انه يشتغل على اهدافه و يوصل ل طموحاته.  

و بعد ما شوفنا رأي هي و رأي هو في أول تعارف بين الولد و البنت؛ مش دورنا نطلع حد جاني و التاني مجني عليه؛ بس دورنا نلاقي نقطه في النص عشان نعرف نلتقي فيها؛ يمكن وقتها الصراع الأبدي يوصل لنهايته ك صراع و بدايته ك أسلوب حياه و طريقه تفكير.

و دلوقتي دوركم جيه؛ عايزين نعرف رأيكم على الهاشتاج دا #هو_و_هي :)

**خاليكوا فاكرين أن دا مش رأينا الشخصي و لكن أحنا بنمثل البنات و الولاد؛ و كمان كلامنا مش عن كل الولاد ولا عن كل البنات بس كلامنا عن الأغلبيه العظمى؛ و برغم أننا معندناش خبره عظيمه بس أحنا شوفنا حوالينا كتير و لسا بنشوف كمان.