راحه البال

عارفين لما بنقع مثلاً ف نتعور في رجلنا؛ لو التعويره دي كبيره و مش نضيفه عمرها ما هتخف و تروح؛ هتفضل موجوده للأبد. لاء مش للأبد؛ بس هتفضل موجوده لحد ما تقرر تروح ل دكتور و ينضفها كويس و يعالجها و يموت الميكروبات ف تخف و تروح و كمان ما تسبش أثر؛ غير أنك هتاخد بالك و أنت ماشي بعد كدا.

أهو حياتنا كدا بالظبط؛ بنمشي في الحياه و نفضل نمشي لحد ما نتكعبل ف نقع في أي غلطه أو مشكله؛ بدل ما نقعد نفكر صح و نعالج المشكله دي بنتناساها و بنمثل أن مافيش حاجه؛ مع أن في كتير. ف بتفضر التعويره و تعلم و تعكنن علينا عيشتنا؛ في حين أننا لو قررنا بسرعه نروح لدكتور يعني نقعد و نفهم و نأخذ وقتنا هنخف بسرعه و مش هتسيب علامه و هنفرح و نرتاح بجد. كل اللي هتسيبه درس ل قدام.

أنا عارفه أن الكلام أسهل بكتير من التنفيذ؛ بس أنا مش قعده بعلمكم خالص. أنا عيشت دا ف أنا جيا أقول الخلاصه من وجهه نظري. 

1. خد وقتك للأخر في الحزن؛ و مش مشكله لو عيشت شويه في الحزن عشان لما تفرح ما تكنش شايل في نفسك أي حاجه. يعني خلص اللي مزعلك أول ب أول.
2. لو محتاج تعتذر أوعى تتكبر؛ مهما كان أيه اللي غلط بس الشعور بالندم دا موت بالبطيئ و الأحسن 100 مره أنك تروح تعتذر و تسمع أن اللي أنت مزعله سامح و خلاص على كدا. 
3. حب نفسك أوي؛ محدش هيحبك زي ما أنت هتحب نفسك و محدش هيخاف عليك زي ما أنت هتخاف على نفسك. و من الأخر كل واحد عقله في راسه يعرف خلاصه.
4. مش لازم في كل حاجه تمشي بدماغك؛ يعني لازم يكون لك رأي و فكر بس بردو لو أخدت أراء اللي حواليك هتشوف الصوره أكبر و هتفهم أكتر.
5. أوى تدي ودنك لأي حد؛ كلامي مش عكس بعده؛ لما تيجي تأخد رأي اللي حواليك أختار اللي أنت واثق فيهم و بس و يفضل تكون خبرتهم في الحياه أكتر منك (زي مامتك أو باباك أو أخواتك الكبار كدا يعني) و حتى لما تسمع منهم قرر أنت.
6. قعد لوحدك؛ متخفش مش هتكتأب أكتر ولا هتقوم تموت نفسك؛ بالعكس أنت هتعرف تتناقش مع نفسك كويس و تقرر هتعمل أيه في حياتك.
7. فكر و أكتشف قيمتك عند اللي حواليك و قيمتك في المجتمع؛ مش هقولك روح أترهبن في الدير؛ بس هقولك روح أتطوع و ساعد حد محتاج لأن اللي بيشوف بلاوي الناس بتهون عليه بالوته. مش بس كدا مش لازم تساعد حد أقل منك حظاً بس ممكن تساعد صحابك قرايبك و أي حد حواليك. 
8. حس أنجازك في حاجه معينه؛ يعني لو بتطلع الأول أفتخر بنجاحك؛ لو أترقيت في الشغل قدر مجهودك؛ لو مربيين عيالكم كويس أفتخروا بيهم و بتربيتكم. 
9. أخر حاجه أنت مش مسئول عن كل البلاوي اللي على الكوكب؛ متظلمش نفسك من فضلك. أنت مسئول عن حياتك و بس مش مسئول عن كل الحوادث ولا حياه كل بني أدم حواليك. 

الحياه مش سهله بس مستهله؛ ف عيشها صح و مبسوط و لو قفلت في وشك خد وقتك و أفهم و صلح و أتصلح عشان توصل للحياه السعيده و الصح.