واحده واحده

هي نصيحه من واحده؛ أعتبرها أمك ولا أختك ولا بنتك ولا صحبتك. المهم أنها شخص قلبها عليك و عايزاك تكون في أحسن حال ممكن؛ و من غير سبب. نصيحتي ليك مش جديده و أكيد سمعتها كتير أوي؛ أنا نصيحتي أنك تطلع السلم واحده واحده. خاليك فاكر أنك هتتعب و هتنهج و خاليك فاكر أن السلم طويل و مالوش بديل؛ يعني مافيش لا سلم كهربا ولا أسنسير ولا ونش ولا أي حاجه تطلعك. يا تطلع بمجهودك السلم يا تفضل كدا مكانك و محلك سر.

مش بكسر مجاديفك بس بقولك الحقيقه و من غير زينه؛ أوعى تفتكر أن في حل سهل لأن حتى قرارك أنك تفضل مكانك دا صعب جداً لأنك هتفقدك أنسانيتك و مش هتحس بطعم أنك عملت حاجه و أنك نجحت. و لو قرارك كان أسوأ من أنك تفضل محلك سر و أنك تسيب نفسك للتيار مثلاً؛ ف بكدا أنت مش هتعيش أصلاً لأنك هتنزل تحت الصفر و الطلوع هيكون أصعب بكتير لأن النقش في الصغر كالنقش على الحجر بس النقش على الكبر زي النقش على المياه. ف أفتكر أن قرارك بأنك تطلع السلم دا قرار ليك في الحاضر و المستقبل كمان.

"أوعى تعيش زي الراجل اللي عاش 60 سنه و كأنه لسا 10؛ جيه الدنيا و مشي و محدش أفتكره؛ لأنه عاش و مات طفل و مكبرش ولا جرب حاجه ولا نجح في حاجه. بس عيش أنشالله 20 سنه بس سيب فيهم علامه تعلم على كل اللي حواليك؛ على الأقل ما تجيش و تمشي و كأنك مجتش."

خاليك مختلف بكل حاجه؛ شخصيه و دراسه و شغل؛ خاليني لما أشوفك أتمنى أني أعرفك عشان حياتي هتتغير كتير لو عرفتك و أوعى تعيش صفر و تموت صفر. فكر و شوف نفسك أكيد هتلاقي حاجه محدش بيعرف يعملها زيك؛ يمكن صوتك حلو و يمكن بتعزف حلو و مش بعيد بتكتب كلام ليه أثره على الناس أو بتتكلم ف بتأثر في كل اللي بيسمعوك. يمكن تكون بتعمل أي حاجه بس بتعملها بحب و فرحه و أيمان ف بتخلي كل اللي حواليك يحبها و يحبك و أنت بتعملها و تأثر فيه و في حياته حتى لو تأثير لمده صغير. بكدا تكون نجحت!!! سهله مش كدا.

هي مش سهله على فكره؛ أه هي خطوات و لو عملتها في أمل كبير تنجح؛ بس هي زي السهل الممتنع كدا. يعني هو أتفقنا أنه سلم و هنطلعه؛ بس صعب شويه تختار أنهي سلم و أنك هتأخد وقت أد أيه عشان تتنقل من سلمه للي بعدها. ف يعني في تفكير كتير في الموضوع دا بس متستعجلش نفسك أوي يعني. 

عادي لو طلعت سلم غلط أنزل و روح الصح؛ دا اللي هو الcareer shift و تغيير الحاجه اللي بتدرسها و تدرس حاجه و تشتغل غيرها كدا يعني. و عادي لو طلعت بشويش و أخدت وقتك الكامل النتكامل ما بين كل سلمه و التانيه. و عادي أنك ترتاح بين السلمه و التانيه؛ و تحس بطعم نجاحك و تتبسط بيه.

نصيحه أخيره و همشي خلاص؛ أوعى تقلل من نفسك ولا قدراتك و أوعى تستعجل نفسك و تكروت وأوعى تستصغر سنك. أصل أنت لازم تحس بنفسك و قيمتك عشان تنجح و الناس تحس بقيمتك كمان؛ و لازم تأخد وقتك عشان تتعلم صح و تنفذ صح كمان؛ و أوعى تستصغر نفسك لأن العمر مش مضمون.

مع السلامه؛ هسيبك تقعد مع نفسك و تقرر أنهي سلم هتبدأ تطلعه :)