أن لله و أنا ايه راجعون

"يلا يا بابا انا نازل عايز حاجه؟
لا يا بني سلامتك؛ بس ما بلاها ده بيقولو في قلق زياده!
قلق ايه بس يا حج؛ ده ماتش وتشجيع و جمهور كل عاده!
بس يابني انا قلبي مقبوض؛ خايفه يمكن يحصل حاجه!
هيحصل ايه بس يا امي؟ يعني هموت؟
مكنش عارف ان قطر حياته انهارده هيفوت! و هيتقتل حلمه في ممر الموت باس اديها وراسها وفي لحظه سكوت؛ دعت فيها يارب؛ سلمها و بال خير الماتش يفوت!لا ياما ادعي الزمالك يفوز .. وارجعلك طاير مبسوطحاضر بس اوعى يبني تتآخر؛ لا يا حاجه متخفيش ، يخلص الماتش واجي جايب الجبنه وكيس العيشاسمع كلام امك بلاش تآخير؛ وراك بكره مذاكره كتير!حاضر يا بابا بقى مع السلامه؛ كده هتأخر على احمد واسامه
يلا يا صاحبي بسرعه نروح؛ مستعجل على ايه يابني محنا رايحين رايحين!
فرحان مبسوط هنشجع نادي العمر واحنا من الفوز واثقين !
طيب طيب ادينا وصلنا .. ايه الزحمه ديا؟؛ دول يابني المشجعين الميه ميه ...
ابعد يابني عن الداخليه .. امي موصيهلي وصيه ..." 

-أيه أبراهيم

و دا ولد مبسوط نازل الماتش فرحان؛ هيشجع فريقه مع صحابه. للأسف مكنش عارف أن دي أخرته و أنه دا أخر كلام بينه و بين أبوه و أمه. مكنش يعرف أن بعد الكلام دا هيموت و هيعيش فوق عند ربنا مع صحابه من بورسعيد. 

"الوو يا صاحبي انت فين ؟؟!! مش شايفك ليه انت مع مين؛ ايوه مش سامعك واقع فين ؟؟ .. انت و اسامه كويسين ؟ احنا ورا السور مستخابين؛ في ناس كتير واقعين .. انت بردو فين ؟؟ (صوت غريب فجآه بان و صوت وجع يهز ابدان) .. مالك يا صاحبي من ايه موجوع؛ انت اتصبت ولا ايه الموضوع ؟؟؛ مبتردوش ليه؟؛ يا صاحبي رد متخاوفنيش عليك!؛ طب بس قولي انت فين وانا اجي اشيلك! يا صاحبي رد امك بتتصل؛ صوتها مخنوق ومن كتر الدموع؛ بتصرخ بتقول في ناس كتير ماتت؛ أنت ليه ساكت؛ رد و رايح قلبي؛ طب تعالى نساعد الي متصاب جنبي .. الو؛ هو ده صاحبك .. اه هو مبيردش ليه انت مين .. صاحبك مات ادعيله .. مات ايه ؟ صاحبي مامتش؛ قولو انا و احمد مستنين عند التالته يمين؛ قولو يستنا شويه والله جايين ولا بجد خلاص بقى من الميتين؟ .. صاحبك مات شهيد؛ و ال ليله ليله عيد؛ رايح الجنه لل ٧٤ عريس جديد مستنينه و مشواره انتم مكاملينه؛ الملايكه اهم بيزفوه؛ زفه عريس زي الي كانت بيحلم بيها امه وابوه ..."

-أيه أبراهيم

من أول مره سمعت عن ناس بتموت بسبب ثورات و حريه الرأي أو بسبب الطائفيه و العنصريه و التشدد و الأرهاب أو بسبب حاجات كتير أوي و منها الكوره كمان. حتى الكوره اللي ملهاش أي علاقه لا بسياسه ولا دين ولا أي حاجه؛ دي رياضه يا جماعه يعني و فريقين بيلعبوا و في كسبان و خسران و ناس بتشجع و تتبسط. حتى الكوره بيتقتل فيها ناس!! في الأول كل اللي بيموت كان ناس منعرفهاش ف كان ممكن جداً أصدق أي حاجه تتقال مفيش مشاكل؛ بس ب الوقت الناس بدأت تقرب مني جداً. رمايل جامعه و أهل صحابي و صحاب صحابي؛ حتى أنا كان في قنبه جنبي ممكن تنفجر في أي لحظه. الموضوع مش بعيد و مش بس الناس الوحشه ولا الناس البلطاجيه؛ و لما الموضوع وصل للدم الكل أتعك فيها؛ شرطه و جيش و شباب عادي كله بيموت و مفيش تفرقه. 

لو ركزت كويس هتلاقي حد تعرفوا مات بسبب البلطجه؛ في ماتش ممكن أو في مظاهره أو في أرهاب زي القنابل اللي في كل حته. لو عملت بحث صح هتلاقي ظابط الشرطه و ظابط الجيش و الشاب العادي جداً. و حتى لو قسمنا الشاب العادي جداً هتلاقي ناس ماتت سلفيين و أخوان و أشتراكيين و من كل الأطياف الشعبيه.

نصيحه صغيره من بنت عشرينيه؛ البلد مش هتتغير لوحدها و من نفسها لازم نشتغل جامد و نتعب عشان يحصل أي تغيير للأحسن. كل واحد يركز في مكانه أتعلموا و أشتغلوا بجد على التغيير و بلاش نطالب بالتغيير بالهتاف بس. خد خطوه عشان كل اللي مات ميحسش فوق أنه مات غدر و دمه راح هدر؛ أشتغل و أجتهد و أعمل فرق عشان اللي مات يحس أنه متنساش و مات لهدف.

سؤال لأي شخص قرر يقتل أي شخص و أي ما كانت المبررات (أفتكروا أن المقتولين كتير و من كل حته و من كل فصيل في الحياه) نفسي أفهم بتفكروا أزاي!!؛ أيه الفايده من أم و أب يتقهروا؟ أيه الفايده من أخواتهم سندهم في الحياه يروح؟ أيه الفايده من حبيبه و خطيبه و زوجه تفقد أعز شخص لقلبها؟ أيه الفايده من أولاد ميشوفوش أمهم ولا أبوهم تاني أبداً؟ أيه الفايده من أصحاب مقهورين على صحابهم اللي بيشوفوهم في المشرحه؟ أستفدت أيه من القتل و الدم و القهر؟ 

العزاء الوحيد بالنسبه ليا أن ربنا مش بتضيع عنده الحقوق؛ و أن كل اللي ماتوا كلهم أحياء عند ربهم يرزقون. أن لله و أن اليه راجعون.