بياعين السعاده

في ناس كدا ربنا عملها بياعيين سعاده؛ بكل أنواع السعاده لحظيه أو طويله المدى. يعني بياعين الأيس كريم و بياعين غزل البنات و بياعين أفلام السينما و بياعين الأغاني و بياعين الحفلات و بياعين الشيكولاته و بياعين المسلسلات و بياعين الكتب و بياعين المجلات و بياعين الكلام الحلو و بياعين الألوان؛ من الأخر بياعين كل حاجه حلوه و فيها طعامه و لذاذه كدا.

بياع الأيس كريم اللي معندوش أي مانع أنه طول اليوم شغلته يبيع أيس كريم؛ أصل الأيس كريم هو السعاده-عمرك شوفت حد بيشتري أو بيبيع أو بيأكل أيس كريم و هو زعلان. دا الأيس كريم ممكن يكون أهم حاجه هتحصل ف حياه الطفل أو الكبير كمان. و عن تجربه شخصيه الأيس كريم بيساوي السعاده بالأخص لو مع الكوره الملونه و المسكره دي في بياع شاطر شغلته أنه يفرحك ب كلام أو بحركات. بيلعبوا بالأيس كريم و كأننا في السيرك؛ و بيتحول الأيس كريم من حاجه حلوه و مفرحه لواحده لعرض سيرك مفرح كمان. -روحوا Cold Stone و أنتم تعرفوا يعني أيه عرض سيرك بالأيس كريم و يخالوا الفرحه فرحتين-

بياع غزل البنات اللي معندوش غير زماره و أكياس ملونه أزرق و أحمر و فيها الحاجه اللي مش مفهومه اللي بتذوب و بتدي أجمل أحساس بالسعاده. و لو مش يتاكل اللي في الأكياس زيي كدا ف في اللي في علب و لونه روز. و لو مش بتأكله بردو زيي في الأحلى و الأحلى و هو الراجل العظيم اللي بيحط سكر و يطلع غزل بنات و يلفها على العصايا. و دي بردو سعاده ^_^

بياعين أفلام السينما و المسلسلات و الأغاني و الحفلات و الكتب و المجلات؛ لو بيصنعوا ضحكه أو بسمه أو قشعريره أو دمعه؛ فهما بيصنعوا فرحه بردو مهما حصل. مكان كدا أنت مش عارف مين قاعد جنبك و بتشوفوا حاجه واحده بس كل واحد طالع بفكره مختلفه عن اللي جنبه. بس دي سعاده و بالأخص الفيلم أو الأغنيه أو المسلسل أو الموسيقى أو الحفله أو كتاب أو مجله اللي بتحرك حاجه جواك.

السعاده في أبسط و أصغر الحاجات؛ السعاده موجوده في كل حاجه حوالينا. الحياه أي غير شويه لحظات و لو شويه اللحظات دي بقو مليانين لحظات سعاده (أو سعاده لحظيه) هنعوز أيه تاني بقا.