ليه الحياه حلوه

أي حد يعرفني فعلاً؛ شافني مره أو ميه؛ هيعرف أني بشوف الحياه حلوه و بحب الحياه و العيشه واللي عايشنها؛ و دايماً مبتسمه و بضحك حتى لو زعلانه و نفسي أكشر أو أعيط. و لو مش مبتسمه أو مكشره فعلاً؛ أول ما عيني بتقابل عين غيري بأبتسم و بضحك؛ و بفرح جداً لما حد يرد على البسمه ببسمه.

و مش معنى أبتسمتي و ضحكتي أني مش بزعل و مش بعيط؛ على فكره في أيام أنا قعدت أعيط لحد ما نمت و في أيام من كتر الزعل قعدت أتكلم مع ربنا و أقوله "كفايا أنا فعلاً تعبت و مش حمل أكتر من كدا!"؛ بس دا كله كان بليل و لوحدي و لما بكون الصبح و مع ناس بنسى دا و بس أفتكر أن أنهرده يوم جديد و أبتسم و أتبسط.

أتعلمت درس مهم أوي "لا تبكي على اللبن المسكوب"؛ خلاص اللبن وقع على الأرض هتعمل أيه يعني؟! بدا ما تعيط؛ قوم و نضفه و خلاص. حصل حاجه في حياتك مش حلوه؛ متعيطش خالص بالعكس أتعلم من اللي حصل؛ و أضحك و أبتسم؛ و أبدأ عيش حياتك عادي جداً.

أصل والله الحياه حلوه بكل الحاجات المفرحه و الحاجات المحزنه؛ كل حاجه ضحكتني أو خلتني أعيط أنا ممتنه ليها جداً جداً. مش عشان أنا مجنونه و مبسوطه باللي زعلني؛ بس ببساطه جداً اللي فرحني علمني حاجات و اللي وعلني علمني حاجات؛ و من غير الأتنين مش هكون أنا بتاعت دلوقتي؛ و لو فضلت زعلانه و بعيط مش هستمتع بعمري اللي بيجري؛ و لو ضحكت و نسيت مش هتعلم و ممكن أقرر الغلط بدل المره ميه. 

الحل المثالي اللي مجالي الحياه حلوه في عيني مهما حصل و مهما بيحصل و مهما هيحصل؛ الحياه مش بتوقف و بتمشي لازم نتعلم من غلطتنا و الحاجات اللي زعلتنا بس منغير ما نفضل زعلانين.

و بعدين أيه ذنب الناس اللي حواليك أنهم يشوفوا حضرتك مكشر و زعلان و بتعيط؛ و بسببك الناس دي تتنقل ليهم الطاقه السلبيه و الحزن اللي عندك؛ و بسببك الناس تعيط و تدعي عليك! خاليك دايماً مبتسم و بتضحك؛ و بسببك خلي الناس تبتسم و تضحك بسبب طاقتك الأيجابيه و يدعولك.

الحياه حلوه أوي؛ و هفضل مؤمنه بكدا جداً على فكره؛ و هضحك و أبتسم و أتعلم من اللي زعلني في يوم. من الأخر مش هسيب حاجه تنكد عليا!

يلا أتبسطوا و عيشوا و سيبوها على الله .. الحياه الحلوه ^_^