الحياه حلوه بس نفهمها ^_^
الحياه حلوه بس نفهمها؛ الحياه بتضحك للي بيبتسم؛ الحياه جنه عيشها و أتهنى .. و دي الكلمات اللي غناها فريد الأطرش. الحياه حلوه و بتضحك و جنه بس للي يفهمها و يبتسم لها و يعشها. أه دي حقيقه جداً؛ الزعل هيجيب زعل أكتر و الفرح هيجيب فرح أكتر و دا أسمه الSnow ball effect .. لو في ثلج و بيعمل كره و بتدحرج في الأرض؛ كل ما هتدحرج كل ما الكره دي هتكبر!! لو الكره دي حزن هيزيد و لو الكره دي فرحه هتزيد و تكبر بردو.
يعني لما بيحصل حاجه تضايق و تحزن و نستسلم لها كدا و نزعل؛ أوعى تفتكر أن الفرح هيجي لوحده و الحزن هيقل لوحده؛ بالعكس تماماً الحزن هو اللي هيزيد و الدنيا هتسود أكتر و هيكون صعب جداً تطلع بره دايره الأكتئاب دي. أوعى تنسى أن مافيش شماعه للحزن دا؛ لأن أنت اللي دخلت نفسك فيها؛ و أنت اللي سيبت حاجه كبيره أو صغيره تأثر فيك جداً و تسود حياتك. ماتلومش غير نفسك على حزنك!
و لو حصل حاجه تفرحك و دا على العكس و أستسلمت لها بقا و فرحت و عملت أرجوز عشان تعمل حاجات تانيه تفرحك و تفرح أكتر و أكتر؛ الفرحه هتزيد و بمجهود أقل من الحزن لما بيكتر و مش هتعرف تطلع من دايره بيضا كلها فرحه و سعاده و بس. أوعى تنسى أن هنا بردو مافيش شماعه تعلق عليها فرحك؛ لأن فرحتك بعد ربنا أنت السبب فيها؛ تعبت عشانها و أشتغلت أو أكتشفت أيه بيبسطك و عملته. ماتشكرش غير ربنا على فرحتك!
هي الحياه كدا يا حزن و حزن و حزن و سواد غميق جداً؛ يا فرحه و فرحه و فرحه و بياض ناصع. عايز أيه السواد ولا البياض؛ الأتنين في أيدك و الأختيار بتاعك لوحدك.
Comments
Post a Comment