هابي نيو ير ^_^

مش عارفه ليه أنهرده أفتكرت فيلم جاءنا البيان التالي؛ لما نزلوا كدا عشان السنه الجديده و يسألوا الناس أيه أمنياتكم للسنه الجديده؛ و كان في راجل في المجاري عايش و راجل في السجن و حاجات كدا. أهو أنا دلوقتي عامله زي محمد هنيدي و حنان ترك و عايزه أعرف هتعملوا ايه في النيو ير؟ عايزين تقولوا أيه للسنه الجديده؟

و بما أن 2014 كانت مليانه أيام حلوه و أيام نص نص؛ ف قولت أكتب أهم حاجات حصلت في 2014 في شويه نقط كدا؛ عشان أتعلم ل2015 و مغلطش نفس الغلطه مرتين.

• كان نفسي أطلع بطاقه بقالي كام سنه بس كنت خايفه من الصوره؛ للأسف الصوره طلعت مؤسفه جداً جداً؛ دي مش أنا على فكره والله.
• كان أقصى أحلامي أن المدونه يوصل عدد المرات اللي أتقرأت فيهم ل 10000 بس اللي حصل في الواقع كان أحسن كتيييير؛ وصلت 26629.
• حلمي أكون مذيعه راديو و تلفيزيون؛ و طلعت أول سلمه في الطريق دا و بقيت في فريق الأعداد لكلام ديجا على الyoutube.
• كان نفسي أكتب كتير؛ و أعتقد أني عملت دا و كتبت كويس و الأسلوب تحسن كتير و أخذت خطوه جديده في مجال الصحافه و بقيت عضوه في Insider أكبر جريده طلابيه في مصر.
• عرفت ناس كتير أنا ممتنه جداً أني أعرفهم و أنهم في حياتي أصلاً و كل واحد عارف نفسه.
• أتعلمت أن مافيش أي داعي للتسرع و أني أجري ورا الفنكوش؛ و في نفس الوقت أتعلمت أني أنتهز الفرص لأنها بتطير بسرعه أوي.
• سيشهد التاريخ أن 2014 هي المره الأولى اللي نقعد في الساحل لمده أسبوع كامل مش 3 أيام و بس عشان "شغل بابا".
• سيشهد التاريخ بردو على حاجه هبله جداً زي أني أول مره أمسك لحمه نيه و أكتشف أنها مش حاجه وحشه زي ما كنت متوقعه.
• قرأت هيبتا و دا من أحلى الكتب الرومانسيه اللي ممكن أكون قرأتها في حياتي؛ و قريت ربع جرام و الفيل الأزرق و 1919 و حكايه صرصار و دويتو و Seriously I'm kidding و مش فاكره لو في تاني ولا لاء!
• حضرت أول ندوه ثقافيه في حياتي عن كتاب ربع جرام في مكتبه حدوته؛ و أتناقشت مع عصام يوسف و كتب لي أهداء على الكتاب؛ و قالي أن أسمي حلو و هو بيحب أسم شهد.
• في رمضان نزلت الجامعه و جمعنا فلوس عشان شنط رمضان و تعليم الأطفال في العشوائيات و أتعلمت كتير أوي و من أهم الحاجات دي أن الخير بجد موجود فينا.
• سيشهد التاريخ-و أي كأن التاريخ مفيهوش غيري يعني- أن اتقال أني بضحك كتير و على طول مبتسمه و متفائله؛ و صحابي كانوا بيشبهوني ب عادل أمام في صاحب السعاده (مش هعتبر أنهم بيحسدوني ولا حاجه عشان أنا نفسي حلوه).
• سمعت أغاني كتير أوي السنه دي؛ و أول مره أحضر حفله لعمر خيرت كانت السنه دي بردو.
• سمعت كلام كتير حلو عن المدونه و عن أسلوبي في الكتابه.
• أتطوعت في مؤسسه الحسن و أتعلمت منهم كتير أوي.
• شجعت صديقتي الصدوقه لبنى أنها تعمل المدونه بتاعتها و تكتب في روزاليوسف كمان.

كفايا كدا مع 365 يوم يعني أكيد حصل حاجات كتير أكتر من كدا بكتير؛ بس يمكن دول أول حاجات في دماغي. أنتم كمان أكتبوا جواب زي دا مليان بالحاجات اللي حصلت في 2014 و الدروس اللي أتعلمناها كمان. و أستعدوا ل2015 بكل أيامها الحلوه و دروسها كمان.

كل سنه و أنتم طيبين و شكراً أنكم كنتم في حياتي السنه دي و يارب تكونوا دايماً في حياتي. و كل شخص مهم السنه دي في حياتي-عارف نفسه- يستنى البوست الخاص بتاعه :)

هابي نيو ير ^_^