قادرون بأختلاف .. مكملين

الشخصيه الأربعه و عشرين .. غاده عاطف و قصتها بدأت و هي عندها 3 سنين لما أهلها لحظوا أنها كل ما تقف توقع و مش قادره تمشي .. و بدأت رحله الداكتره و وصلت للندن لما عرفت أن عندها "ضمور في الأعصاب الموصله للعضلات" .. و الداكتره قالوا أن دا مرض مالوش علاج و الحالات بتموت عند سن ال7 سنين .. بس مامتها و باباها قرروا أنهم مش هيسيبوها و هيعملوا كل اللي يقدروا عليه .. و بدأت رحله الكفاح ...

و أهلها قرروا أنها هتتعلم عادي جداً و هتدخل المدرسه و دا كان لازم له أن الأب يروح لمديره المدرسه و يطلب نقل فصلها لأول دور .. و الأب كان بيوديها و يجبها كل يوم لحد ما وصلت لثانويه عامه و جابت 92% كمان .. دخلت كليه أداب و كانت مرحله صعبه شويه لأن بعض الداكتره كان بيوافق على أن المحاضرات تكون تحت و داكتره تانيه كانوا رافضين .. بس عديت مرحله الجامعه و بدأت رحله الشغل .. غاده مكنتش موافقه أبداً أنها تقعد من غير شغلانه .. و بدأت تدرس فقه و توحيد على الأنترنت لمده 4 سنين .. و بعدها شافت حلقه لدكتور عمرو خالد بيتكلم عن أهميه العمل التطوعي و أنك تشتغل عند ربنا .. و قدمت في جمعيه تعلميه خيريه و أشتغلت في التسويق لغايه ما وصلت لمديره التسويق .. و دلوقتي بتدور على عمل حكومي أو خاص بس الموضوع صعب شويتين ...

العوائق اللي ممكن تكون بتواجهه غاده هي السلالم و كتير بتلغي حاجات مهمه في حياتها عشان هما في دور عالي و منغير أسنسير .. و الرصيف اللي غير أدمي بالمره و كذا مره كانت هتقع منه .. و المزلقنات بتكون معموله غلط و بقياسات مش صح و ممكن تقلب الكرسي من عليها .. نظرات الناس كانت بتضايقها في الأول و بعدين بدأت بتبصلهم و تبتسم و تحس بالأمان أنهم جنبها و هيساعدوها لو أحتاجت مساعده ..,

دا بالأضافه لعدم التقبل من الناس للقادرون بأختلاف في الشغل و في الزواج !!!

بس و مع كل ذلك غاده عندها أمل ^_^

Facebook Page: https://www.facebook.com/pages/Alhassan-Foundation-for-Spinal-Cord-Injury/428862897190331?ref=br_tf

Website: http://www.alhassan-foundation.org/