زيرو !!

لو سمعت كلمه "زيرو" ممكن يجي في دماغك الرقم صفر او راجل حلق شعره تماما او راجل أصلع او درجه امتحان و ممكن درجه حراره. بس مستحيل ان يجي في دماغك بنت حلقت شعرها اللي معروف أنه "تاج المرأه" على الزيرو بكامل أرادتها. بس هو دا بالظبط اللي هتكلم عنه أنهرده! 

"نور أمام" طالبه في أخر سنه في الجامعه الألمانيه و بتدرس فنون تطبيقيه و عندها 22 سنه .. قررت ان مشروع التخرج بتاعها يكون "Shaved" عن البنت المصريه اللي عايشه في مصر لما تقرر تحلق شعرها زيرو و تحلقه فعلاً. و بكامل أرادتها! و نظره الناس للموضوع.

نور من سنه تقريباً جيه في دماغها فكره أنها تحلق شعرها تماماً بس بسبب رفض أهلها و خوفها؛ تهربت من الفكره. بس بعد سنه رجعت الفكره تاني و المره دي مش عارفه تهرب منها. ف قررت أنها تعمل مشروع التخرج بتاعها عن البنت المصريه لما تحلق شعرها في مصر و العواقب النفسيه السلبيه اللي ممكن تحصل لها. و فعلاً في يوم قصت شعرها؛ و بسبب صوت المقص و مكينه الحلاقه نور كانت هعيطت. بس كملت في تجربه ممكن تكون الأولى من نوعها و أول ما خلصت فرحت و حسيت براحه البدايات الجديده.

و أول ما حلقت شعرها زيرو حسيت براحه نفسيه مكنتش متوقعها أبداً مع أنها خديت أيام عشان تبدأ تتعرف على نفسها في المرايا. و الفيلم تحول من مشروع تخرج لدعوه عامه؛ و نور عملت صفحه على الفيسبوك و أنستاجرام و تويتر. و بدأت تدعوا البنات أنهم يحلقوا في رساله واضحه و صريحه لمواجهه مخوافهم مهما كانت المخاوف دي كبيره أو صغيره. و فعلاً الناس بدأت تتكلم عن الموضوع دا و في ستات و بنات حلقوا شعرهم فعلاً و في ناس شجعوا الفكره حتى لو ما حلقوش شعرهم. 
نور بتقول أنها دلوقتي راضيه عن نفسها أكتر و شجاعه أكتر. و أنها مش مصدقه كم السعاده و الرضا اللي عندها مع أنها أفتكرت أن هيجلها أكتئاب لما تحلق! نور مش بتدعوا لأن الناس تحلق ولا أن المجتمع يكون عباره عن ستات صلع؛ بس هي بتدعوا أن محدش يخاف يعمل حاجه طول ما الحاجه دي مش بتضر حد.

نور بالنسبه لها "دا شعر و أتحلق خلاص" بس المشروع دا عشان كل أنسان يواجهه خوفه مهما كان صغير و مهما كان كبير!!

 

Facebook Project Fan-Page: https://www.facebook.com/projectshaved

Facebook Fan-Page: https://www.facebook.com/NourEmamOfficial

Twitter: https://twitter.com/ProjectSHAVED