عشوائيه
أحنا عايشين في عشوائيه و الموضوع أكبر كتير من شويه مناطق عشوائيه ولا ناس فقيره ولا ناس مريضه ولا ناس بتنتحر عشان شويه فلوس ولا انتهاك حقوق ولا ظلم و افترى ولا سمك كبير بياكل السمك الصغير ولا فقر ولا تعليم منتهي الصلاحيه ولا ثقافه عايزه تتفور ولا أخلاق اتدفنت بالحيا ولا وسايط ولا ولا ولا .. الموضوع كبير اكبر كتير من بلد متقسمه لقصور و أماكن عشوائيه مفيهاش حتى بيوت فيها كاراتين!
تعالوا نبص بصه على حياتنا العشوائيه مش مناطقنا العشوائيه .. و دا أول نوع من العشوائيه .. مفيش معاد ننام فيه ولا معاد نصحى فيه ممكن كتير نصحى طول اليوم و ننام طول النهار .. مفيش مواعيد أكل اي وقت بنأكل اي حاجه و والله بناكل طول الوقت اصلا و نحلي و نحدق و نتغدي الساعه 9 بليل و نصحى منفطرش .. حياتنا سمك لبن تمرهندي ...
العشوائيه فينا مش بالأماكن لان ممكن شارع او سور يفصل القصر عن الحاره .. و دا تاتي نوع .. يعني ناس بتلبس شنطه ب 2000 جنيه و ناس مش لاقيه تاكل .. واحد بياخد 500 جنيه في الشهر و مطلوب منه يعيش و يكون اسره .. ناس عايشه في قصور في نفس الوقت اللي فيه ناس ساكنه القبور و ناس يطلع لها حبايه في وشها تلف عاى الداكتره و ناس عندها سرطان و مش لاقيه علاج و ناس بتشرب مياه معدانيه و غيرهم بيشربوا مياه لونها رمادي اقرب للكحلي كدا!
كفايا كلام عن العشوائيه اللي ممكن تشوفها في بعض الافلام او التوكشوز .. يلا ندخل على نوع تالت!
بعد يوم طويل و مرهق ممكن نلف لفه في التلفيزيون .. على أمل تلاقي حاجه تشوفها رايقه او تعلمك حاجه .. تلاقي التوك شوز كلهم زعيق و خناق و صوت عالي .. و المواضيع ثابته! سحر اسود و مين ملبوس او قاضيا منافيه للأداب او فن و هلس .. مفيش ثقافه الا من رحم ربي! و افلام اغلبيتها العظمى عنف و قله ادب و رقص و غنى! طب دي مش عشوائيه؟
و تلاقي المواضيع موضه .. فتره صافيناز و تلاقيها طالعه في كل مكان .. فتره بعدها السحر الأسود و تلاقي كل التوك شوز و الافلام عن السحر الاسود! في تابوز كدا و في كمان راكور .. لدرجه انك تحس ان هتفتح الحنافيه ينزل الموضوع الموضه!
ختاما لموضوع ملوش ختام .. العشوائيه فينا مش في اماكن .. المشكله اكبر بكتير من اماكن و برامج و اغاني و كتب .. المشكله في المخ! صندوق هيصدي لو فضل مش شغال كدا! وصيتي حاول تشغله بأي طريقه: فكر و متاخودش حاجه مسلم بيها! اسمع اغاني تدعوا للتفكير مش لهز الوسط! اقرأ كتب للثقافه مش عشان تظهر عميق! اتعلم عشان توسع مخك مش عشان دا فرض!
الحياه حلوه بس نفهمها صح! و نبطل عشوائيه!
Comments
Post a Comment