زيك زي عامه الشعب .. ماشي جنب الحيط
كلنا في وقت ما من حياتنا كنا ذلك الانسان .. اللي زيه زي عامه الشعب و ماشي جنب الحيط .. في ناس قدرت تكسر الشخصيه دي و تعيش مختلفه و تعيش بشخصيتها هي .. و ناس لسا بتعافر .. و ناس تانيه مش عارفه حتى تعافر!
تعالوا نعرف مين اللي بنكلم عليهم دول .. الانسان اللي مستسلم جدا للحياه .. بيتشال و يتحط و مالوش رأي اصلا .. ببساطه جداً قالوا له يمشي جنب الحيط و هو فعلاً مش بيعمل حاجه غير يمشي جنب الحيط و لو قدر يمشي جوا الحيط هيعمل كدا ...
قالوا له خساره دراجاتك و يلا ادخل طب ولا هندسه .. و هو اصلا مش فاهم ايه الفروق ولا ليه ولا اي حاجه .. لا هو فاهم الدكتور بيعمل ايه ولا المهندس بيعمل أيه غير أن الأولاني بيعالج العيان و التاني بيبني العمارات!! نيجي بقا لمرحله كبرنا و لازم نتجوز ف يلا اي حد مش فارقه المهم بس القواعد المعروفه تكون متحققه .. يعني اي بنت تكون بنت ناس و متربيه و متدينه و متعلمه تنفع و اي رجل متعلم و متدين و متربي و بيشتغل و يعرف يفتح بيت ماديا مش اكتر ينفع .. اللي متوافر فيه المواصفات السابقه يقدر ينول شرف لقب متزوج او متزوجه!! يلا خلفنا و مش فاهمين الكائن الحي اللي بين أيدينا دا ين أصلا .. و نربي زي ما ماما و بابا ربونا .. و لما يكبروا و يبدأوا يسألوا أسئله بفطره الأكتشاف و المعرفه نقتل دا فيهم بعيب و أنت لسا صغير و ميصحش!!
الحياه كلها قالوا ف هو راح نفذ و خلاص .. مالوش وجه نظر و مش فاهم اي حاجه في أي حاجه .. الحياه سمك لبن تمرهندي بالنسبه له!! هو طوبه في حيطه المجتمع و لو أتكسر يجي غيره 100 طوبه !! محدش تعب نفسه أصلاً يفهمه أيه أصل الحكايه و سبب الحاجات و لا حد فكر يساعده يفكر و لا يعرفه أيه بيعمل أيه!! ولا عرف أزاي يكون أنسان ...
لو حد قرر يعرفه الفرق بين نظم التعليم المختلفه و الكليات المختلفه و الشغلانات المختلفه و يعني أيه جواز و بيت و عيال و مسؤليه .. أكيد كان حاجات كتير أوي أتغيرت في الشخص دا و في المجتمع كله!!
أصل الحياه مش بس بالدراجات .. و الجواز مش بس تربيه و فلوس!! الحياه معقده عن كدا!! الحياه مش دراجات و دراسه .. في شغل و أستمتاع و تكوين شخصيه و أعمار الأرض .. الجواز حاجات كتير منها أن الولد و البنت يعرفوا و يفهموا يعني أيه يتأقلموا و يبنوا بيت و أسره و يخلفوا و يربوا .. الشغل مش تأديه واجب بس كمان حقوق و واجبات و ضمير و أنك تسيب بصمتك!!
أحنا نقصنا أننا نسيب الحيطه في حالها و نمشي بعيد عنها .. أصل الحيطه آيله للسقوط و ممكن تتهد على دماغك في أي لحظه .. مش بس كدا أنت عايش عشان تكون مختلف لأن محدش هيعرف يسيب بصمتك .. ف ليه تخسر الدنيا فرصه أنك عايش و عندك بصمه لازم تسيبها!!
خليك مختلف و المره الجايا لما يجيلك حد يقرر لك فكر أنت و قرر لنفسك و قوله ساعدني أفهم و أقرر بس متقررليش .. لما حد يجيبلك عروسه ولا يجيبلك عريس عشان كبرتوا أفهموا بعض و قرروا بنفسكم و أتعلموا يعني أيه جواز .. و لما تخلف و أبنك يجي يقولك أنا جيت أزاي متقولش لقيناك على باب جامع ولا نزلنا أشتريناك من السوق!! و لو سألك فين ربنا متقولوش فوق ف السما فيستخبى منه تحت أي سقف و قول له أن ربنا في كل مكان و شايفنا و سمعنا في كل وقت هيتعلم يخاف ربنا في كل وقت!! و لما أبنك يكون هيدخل ثانويه عامه فهموا و سيبوا يقرر علمي ولا أدبي ولا American ولا IGCSE و لما يخلص و يجي يدخل الجامعه ساعده يفكر و يقرر ناوي يدخل ايه و يشتغل ايه .. و لما و لما و لما !!
فكروا و أبعدوا عن الحيطه عشان تعرفوا تعيشوا حياتكم كامله متكامله!!
شكر واجب لماما و بابا أنهم ماما و بابا !! أنهم دايماً محترمين عقلي و بيناقشوني و يقنعوني منغير ما يقولوا لي خاليكي زي اللي قبلك و منغير ما يخالوني أعيش طوبه ممكن يتم أستبدالي بأي طوبه تانيه !! قبل ما يقولوا لي أي حاجه عشان أعملها بيكونوا هما نفسهم بيعملوها .. بجد شكراً في أقل كلمه أنا ممكن أقولها ليكوا أصل أنتوا أهم سبب للي وصلت له من شخصيه أو من نجاح أو من أي حاجه :)
Comments
Post a Comment