رساله مني ليا
الكلام دا مش شرط مني أنا ليا .. ممكن جداً يكون منك أنت و ليك أنت بردو أو منك أنتي ليكي أنتي ^_^ دول كلمتين رساله بتقولها لنفسك و تخاليهم حلق في ودنك-مش عارفه أشمعنى حلق و أشمعنى في الودن!!-
يلا بينا !!!
أول حاجه .. أوعى تعيش حياه حزينه و كئيبه و مهمومه .. أوعى تشيل طاجن ستك فوق راسك !! كلنا عارفين كويس أوي أن الحياه مش أبيض و بردو عارفين أنها مش أسود !! كلنا عارفين أن الدنيا مش دايماً فوق ولا دايماً تحت .. الدنيا يوم فوق و يوم تحت !! طب ليه تعيشها مكشر و شايل الهم .. أفرد وشك و أضحك و أستمتع و أوعى تكشر في وش حد عشان متعكننش على واحد يومه بس أضحك في وش الناس عشان يضحكوا ليك و أنت اللي يومك يتعدل !!
و دا كلام "نفيسه بكوغتي" عن الموضوع دا: "أنسى .. أيوه أنسى .. أنسى أي حاجه زعلتك .. أى حاجه صعبه و أي كلمه من حد وجعتك .. أنسى عشان دنيتك أقصر بكتييير من أنك تشيل من حد و أنسى عشان ليك رب عادل .. عشان في الغالب معظم الناس اللي مرتاحه هي اللي بتنسى"
تاني حاجه .. أوعى تتخلى في يوم عن حلمك !! عادي تجرب بدل المره 1000 و عادي تفشل مره و 100 .. العيب بجد أنك تفقد الأمل و تدفن حلمك و تقرر متحققهوش .. حرام !!
و دا كلام "نفيسه بكوغتي" عن الموضوع دا: "أحنا في مجتمع غير أدمي بالمره فلو قافش أنك تنجح في مستقبلك ماتسمعش لحد .. ماتمشيش ورا حد .. متتمسكش في حد خلي حلمك قدامك و أجري وراه لوحدك .. لوحدك عشان في الغالب معظم الناس حقوده و بتحب النجاح لنفسها و بس"
ثالث حاجه .. مش عيب أنك كل شويه أيام كتير في روتين الحياه و الترس اللي بيدور مبيقفش دا تقرر توقف و تنزل منه يوم .. قرر تنسى الروتين في يوم و تصحى متوضبش السرير و ألبس لبس جديد و أسمع أغاني أول مره تسمعها و شوف فيلم قديم أو جديد أول مره تشوفه .. أنزل الشارع و أخرج بس في مكان جديد يفضل يكون مفتوح .. قرر تكسر روتين الحياه من نوم و صحيان و مدرسه أو جامعه أو شغل و خد يوم أجازه أو جنان !!
و دا كلام "نفيسه بكوغتي" في الموضوع دا: "الجنان في بعض الأحيان حلو و مطلوب .. جرب كدا تطلع منك و تشوف حياتك من برا .. حلوه؟ يعني لو مت دلوقتي هتبقى مرتاح و راضي؟ معظمكم هيقول لاء .. يبقى أتجنن و عيش كل لحظه كأنها أخر لحظه في حياتك .. متخليش يوم يعدي عادي كده من غير أي حاجه مميزه .. عشان في الغالب معظم الناس الروتين موتها بالبطئ"
بلاش يجي وقت نفسك توحشك !! و بلاش تيجي يوم تشتاق أنك تطلع براها !!! أصل نفسك مش وحشه .. نفسك حلوه أوي بس لازم يجي وقت و تفصل و لازم دايماً تكون متصالح مع نفسك و بتحب اللي بتعمله و بتعمل اللي بتحبه ^_^ مش لازم تزهق من نفسك عشان تطلع براها بس وارد عشان تفصل تطلع شويه و ترجع !!
مش عيب أكون مبحبش المهرجانات بس أوقات ممكن أسمع مهراجانات و أشهيص نفسي .. دا مش جنان !! و لو جنان مش مشكله و مش مهم !! دا بس قرار أني أفاجئ نفسي دايماً عشان مزهئش مني في يوم ^_^ مش عيب أني مكنتش بحب الأفلام الأبيض و أسود و حبيتهم فاجأه !!
فاجئ نفسك دايماً دي وصيتي ليك ^_^ و أنا كدا خلصت ...
على فكره الكلام دا أنا كتبته الأول و بعدين و أنا بقرأ شويه في بروفايل بنت أسمها "نورهان أبو بكر" الشهيره ب"نفيسه بكوغتي"-أكتشفت بالصدفه أنها كانت علامه من علامات مجله كلمتنا- أكتشفت كلمتها اللي في نفس المواضيع اللي أتكلمت فيهم !! صدفه كدا ^_^
Comments
Post a Comment