عن العيله

فاكر البيت اللي دايماً العيله كلها بتتجمع فيه في رمضان و العيد دا .. طب فاكر و أنت صغير الأوضه اللي كان كل العيال بيدخلوا يلعبوا فيها و يضحاكوا و يتخانقوا .. جو حلو أوي و البيت فيه العيله كلها و أجيال كتير بس أنت أصغر جيل-جدتك و جدك و الجيل دا كله و أمك و أبوك و الجيل بتاعهم و أنت و جيلك كمان- .. و كل الكبار لما يعوزوا مياه يقولولك تجيبلهم و لما صوتكم جوا الأوضه يعلى يدخلوا يهزءوكوا .. و لما الأكل يتحط على السفره يا أما يتكون واكل قبلهم يا أما لو كبير شويه بيغرفوا ليك و تقعدوا تأكلوا سوا .. و لو عيد صغير أو كبير العيله كلها بتدي عديه لبعد-أصلاً الفلوس اللي مامتك و باباك بيدفعوها ل مثلاً ولاد خالك خالك بيرجع يدفعهالك أنت و أخواتك و نلف في حلقه مفرغه- .. و أول يوم العيد تتجموعوا في بيت شخص و تاني يوم في بيت تاني و تالت يوم تخروجوا و أصلاً كل يوم مع نفس الناس و نفس العيله بس كان في أستمتع رهيب !!

فاكر كل دا .. على فكره بقا انت كبرت و بطلت تدخل الأوضه بتاعت الصغيرين و بتقعد مع الكبار دلوقتي و كمان بتطلب المياه من الصغيرين .. مش بس كدا دا في يا جيل يا أتنين أصغر منك و بيقعدوا في الأوضه بتاعت الصغيرين يلعبوا و المفاجأه أنهم بيلعبوا نفس اللعب مع أنهم ماشفكوش أصلاً-يمكن بس في الipads و الtablets و الsmartphones دول زياده- .. و لمه العيله دي فيها ناس مشيت و راحت لربنا و فيهم ناس جديده لأنهم أتولدوا جديد .. و الحياه دايره بتلف و اللي بيحصل معاك أمبارح بتعملوا في غيرك بكره !!

أنا متأكده أن كل واحد و واحده فينا في corner في حياته و ذاكرته بيحب الطفوله و أكيد في الcorner دا موجود الذكريات دي و الصور دي و السفريات دي و البيوت دي و الأوضه دي .. أكيد العيله بالناس اللي موجوده و الناس اللي راحت و الناس اللي جت بيفضلوا أحلى حاجه في الدنيا ...

من الأخر يوم مع العيله بالعمر كله .. نصيحه أتصوروا كتير عشان الذكريات تعرفوا توصلوها لعيالكم و أحفادكم :)

ربنا يقربنا دايماً لبعد ^_^
 و أوعوا تتفاجأوا لما تلاقوا الأجيال اللي كبرت بتطلع اللي أتعمل فيها في الأجيال الأصغر و أوعوا تتفاجأوا لو لقيتوا الأجيال الصغيره بتلعب نفس الألعاب اللي كان بيلعبها الأجيال الكبيره و منغير ما يشوفوا بعض .. هذه الجينات يا ساده و الدنيا دواره!!