للحكايه أصل
في وقت كدا أتعرض فيه مسلسل "كلام نسوان" و وقتها حبيت أوي بتول و فكره أني أكتب كتاب و أشوفه مطبوع عليه أسمي كدا و ماسكاه بين أيديا و بشم ريحته مش بس كدا دا أنا كمان بكتب أهداء و بعمل حفلات نقاش و توقيع و بصراحه دا حلم عندي من 2009 و لحد أنهرده دا حلم من أحلامي و مش هتنازل عنه !! بعدها في 2012 أتعرض "حكايات بنات" و طبعاً عجبتني جداً أحلام و كتابتها للmessages و بتاع و طلع تاني حلم الكتابه !!
فكرتي السطحيه كانت أن الكتابه لازم روايه أو قصه قصيره و عربي صح أوي و أشرب قهوه و أكون عميقه و بتاع !! ف طبعاً فشلت أني أكون مش أنا و معرفتش أمثل أني خريجه أداب عربي و مفيش مني أتنين-دكتوراه في حتى على رأي فيلم الأيدي الناعمه-
و بما أن مش معايا فلوس كتير عشان أطبع و أنشر و أوزع كتاب و كمان مش معايا الأفكار ولا الطريقه السحريه اللي هكتب بيها الكتاب أصلاً .. بالأضافه لأني كنت فاشله جداً في التعبير و كنت مغلبه أهلي معايا فيه !!
قررت أجرب في مدونات و خلاص .. و قررت أكتب عربي فصيح و طبعاً جيت أكحلها عميتها و منفعش أبداً و فشلت بدل المره بتاع عشر مرات .. و لأكتر من سبب و الله أني بألف كلام مش عارفه جي منين أصلاً و كمان مانتش فاهمه أنا داخله على أيه أصلاً !!
لحد ما وصلت أخيراً لهذه المدونه اللي بين أيدكم دلوقتي و الحمد لله نجحت و وصلت للناس و بتتقرأ و بكتب في الصحافه الألكترونيه في روزاليوسف و بشتغل مع خديجه رحاب في Deega Talk .. و كان السبب بعد توفيق ربنا أني أتعلمت من أخطائي و فهمت أنا داخله على أيه و هكتب أيه و هعبر عن نفسي و مش هعبر عن ناس معرفهاش بكلام تحس أني أنسانه غير اللي أنت تعرفها !!
أنا مش برغي في كل دا عشان أظهر لكم مجد شخصي و أني ناجحه و مفيش مني أتنين .. لاء خالص أبسلوتلي و الله !! أنا بفكر نفسي بحلم عندي من 2009 و أختفى و ظهر تاني في 2012 و أبتدأ يتحقق في 2013 و في يوم ما هيتكتب الكتاب و هينزل أنشاءالله :) و بردو أنا بقول الكلام دا كله عشان أقول لكم أبدأوا رحله البحث عن الحلم و رحله تحقيقه كمان ^_^
يلا شوف حلمك أيه و أكتبه أو أرسمه قدام منك دايماً و كل يوم صبح و ليل أقرأه و شوفه و أفتكره أوي و أحفره كمان في عقلك .. و أبدأ حققه و خطوه بخطوه النجاح هيتحقق و النجاح هيجيلك لوحده أنشاءالله طول ما أنت بتعمل اللي عليك و ماشي على خطه صح :)
على فكره النجاح بالنسبه لي في كلمه تشجيع و في نظره فخر أمي و أبويا و أهلي و صحابي .. النجاح في أن حد نسبياً مشهور أو فعلاً مشهور يقولي كلام بجد بيشجعني و يكون بيقصده و أني أشوف ناس معرفهاش و تقولي رأي في اللي بكتبه و يعجبهم :)
النجاح بسيط و مش محتاج نعقده .. الكلمه نجاح و النظره نجاح .. النجاح مش كله شهادات و تكريمات و مهرجانات .. النجاح بسيط و أحنا اللي بنعقده مش أكتر !!
ربنا يحقق لكم أحلامكم عن قريب و تتذوقه طعم النجاح عن قريب ^_^
Comments
Post a Comment