عيد الخروف
بكره عيد الخروف !! الصح يعني أن أسمه العيد الأضحى المبارك :) بس عشان دايماً و أنا صغيره كنت بشوف خرفان كتير و في المدرسه نعمل خروف بالورق و نرسم خرفان و نعرف أن في أجازه هنخودها !! و بعدين نشتري هدوم جديده و نستحمى حمومه العيد و نحضر الهدوم على الشماعه و ننام بدري عشان الليل يخلص و يجي الصبح ننزل ل تيتا و جدو و نخرج و نروح لقريبنا و بعد ما راحوا لربنا بننزل نتفسح و نروح لقرايبنا بردو .. و الشوارع يكون كلها دم و نشوف الراجل اللي بيبيع الفروه و الراجل اللي بيسن السكاكين و دي قصه العيد بالنسبه لي .. ناس ممكن نكون مش بنشوفهم من العيد للعيد أصلاً و شخصيات مش بنشوفهم غير في عيد الخروف "الراجل بتاع السكاكين و الراجل اللي ببشتري و يبيع الفرو و الجلد"-نفسي أعرف بيختفوا فين الناس دي!- .. قولت أحكيلكم قصه عيد الخروف ^_^
و دي أصل الحكايه بتاعت عيد الخروف: زمااااااااان أيام سيدنا أبراهيم و أبنه سيدنا أسماعيل .. سيدنا أبراهيم رأى رؤيه بأنه بيذبح أبنه سيدنا أسماعيل .. راح سيدنا أبراهيم لسيدنا أسماعيل و قال له ربنا أمرني بذبحك .. ف سيدنا أسماعيل رد على سيدنا أبراهيم أنه يعمل اللي ربنا أمره بيه .. لأن سيدنا أبراهيم و سيدنا أسماعيل مؤمنيين بربنا و بيسمعوا كلامه .. و لما بدأ سيدنا أبراهيم ينفذ أمر الله .. ف ربنا نزل كبش من السماء بدل سيدنا أسماعيل عشان يكون الكبش هو الأضحيه و يكون جايزه لسيدنا أبراهيم و سيدنا أسماعيل لأنهم نفذوا أمر الله و معترضوش على أمر الله ...
و العيد الكبير أو عيد الأضحى هو اليوم اللي ربنا نزل فيه الكبش .. و من شعائر الأسلام أننا نضحي بخروف أو بقره أو جاموسه أو معزه أو جدي-بس في المدرسه كانوا بيحبوا الخرفان و بس معرفش ليه- .. و كل سنه في نفس الوقت بنضحي بالأضحيه و بنشتري الهدوم الجديده و بنشوف بعض و بنعيد على بعض و بنفرح و نفرح بعض و بنخرج و بنجيب بلالين و بنأخذ عيديه .. عاده و ربنا ما يقطع لينا عاده-بنحتفل أن الكبش نزل و سيدنا أبراهيم مقتلش سيدنا أسماعيل :)
اليومين اللي فاتوا في ناس كتير بتسأل أحنا ليه بنذبح؟ و أننا لازم نغيير التفكير دا و نبطل ذبح الحيوانات البريئه!
عندي رد بسيط :) هو أحنا ليه بنصلي 5 مرات في اليوم؟ أشمعنى بنصوم من الفجر للمغرب؟ ليه بنسعى بين الصفا و المروه في الحج؟ و ليه و ليه و ليه؟؟؟
في حاجات كتيره أوي بنعملها عشان ليها حكمه عند ربنا و طول ما أحنا مؤمنين بوجود ربنا و ديانتنا هي الأسلام نؤمن بكل أوامر و نواهي ربنا .. عشان في حاجات في الدنيا بتتاخد package و الدين حاجه من الحاجات دي .. يمكن أحنا مش فاهمين دلوقتي بس دي حكمه من ربنا !!
أه حرام نذبح الحيوانات قدام بعض و دا اللي ربنا أمرنا بيه عشان الرحمه بس مش حرام التضحيه ...
بعدين هو أنتم مش بتأكلوا لا فراخ ولا لحمه ولا سمك ولا بيض ولا لبن ولا سمنه ولا زبادي ولا أي مشتق من مشتقات الحيوانات !! و حتى لو مقاطعين للحوم و مشتاقتها أنتوا بردوا مقاطعير للفاكهه و الخضار ما دول بردو كائنات حيه ولا ايه؟؟ ربنا خلق كائنات مسخره لكائنات تانيه و هو دا الecosystem !!
معلش شغلت دماغكوا بموضوع كبير أوي في ليله العيد .. بس مش قصدي و الله بس حسيت أن عندي رد محتاجه أقول له :)
عموماً كل سنه و أنتم طيبين .. أستحموا و جهزوا هدومكم الجديده و أفرحوا أوي ^_^
لو أنتم صغيرين ف دوركم تفرحوا و لو أنتم كبار ف دوركم تفرحوا اللي حواليكم ف تفرحوا :)
بما أني معرفكوش كلكوا يعني .. ف عديتي ليكم دعوه بظهر غيب و عديتكوا ليا هتكون بردو دعوه بظهر غيب ^_^ ربنا يجعلكوا سبب لفرحه قلب الناس و يعمل لكم كل خير أنشاءالله :)
Comments
Post a Comment