لا تتبع القطيع .. فأنت لا تعلم الى اين ذاهبون!!
دي Tweet كاتبها @moh_sophy في مجله كلمتنا .. فيها حكمه والله العظيم!! ركزوا فيها كدا .. "لا تتبع القطيع .. فأنت لا تعلم الى اين ذاهبون" !!
زمان كانوا بيقولوا لنا أن المعزه اللي بتمشي بعيد عن القطيع الذئاب بيأكلوها .. و لو في رحله مشيتي بعيد عن المجموعه ممكن تتوهي و تتخطفي .. و لو مشيتي بعيد عن أهلك هتتعكسي !!! هو دا حقيقي !!! لازم نمشي مع القطيع و نعيش زينا زي المعيز !!!
مع العلم أننا لو شوفنا حاجات غلط و الأغلبيه العظمه غلط نقول مالناش دعوه !! لا يا راجل .. المبادئ مبتتجزءش ما هو يا قطيع يا مقطعش ...
تعالوا نفكر سوا شويه كدا !!
يعني هو القطيع دا لو شايف ان البنت مش لازم تتعلم أصلا بس أنا نفسي اتعلم جدا .. الحل اني امشي مع القطيع و متعلمش ولا اختلف و اتعلم !! شوفوا ايه اللي حصل مع مالالا يوسافزاي في باكستان عشان قررت انها هتتعلم حتى لو الناس شايفه ان البنت عوره و متتعلمش .. دي كانت هتموت و عاشت بمعجزه عشان تكون رمز و تسيب علامه مهمه جدا في العالم كله و العالم كله يتكلم على البنت دي ...
طب لو القطيع دا شايف ان البنت حتى لو أتعلمت متشتغلش و أحسن لها تتجوز و تقعد في البيت و أنا نفسي أشتغل و انفذ اللي اتعلمته و أفيد بلدي .. الحل اني امشي مع القطيع و خلاص ولا امشي في طريقي و أشتغل و أحقق ذاتي !! أقرأوا شويه عن رغده الأبراشي و أنجيلينا جولي و أوبرا وينفري .. ماكنش هيكون في "عشانك يا بلدي اللي بتخدم مناطق عشوائيه كتير في مصر ولا هيكون في تطوع في أفريقيا و اللاجئين في سوريا ولا هيكون في مذيعه ناجحه انتقلت من الفقر لتكون المذيعه رقم واحد ...
نفذ الكلام دا في كل مجالات الحياه مش بس التعليم و الشغل .. يعني احنا مشاءالله عندنا القطيع ماشي في طريق مستقيم و مينفعش يلف و يرجع ولا يغير مكان ماهو رايح .. لو دخلت طب و مالقتش نفسي و قولت اشتغل مذيع ساخر الناس تقول دا طبيب فاشل ف بيداري خيبته "باسم يوسف" .. لو طالب في هندسه حش انه مش مرتاح و تعب من قرف المذاكره اللي مش جايبه همها و قرر يدرس مثلا اداره اعمال ولا فنون تطبيقيه ولا حاجه يبقى مجنون انت سايب كليه القمه عشان احلام و ميول و هبل من دا !!!
من الأخر أنت لو تابعت القطيع هتموت ناقص حلم و هتموت منغير ماتسيب أثر في الحياه و هتعبش تعيس و فاقد للذه الحياه !! بس لو عقلت كدا و فكرت صح و مشيت ورا حلمك و مهماكش القطيع رايح فين هتعيش حياتك زي الفل و مبسوط و محقق أحلامك و كمان هتموت سايب أثر ^_^
القطيع ماشي ورا بعض زي المعيز والخرفان مش فاهم هو رايح فين بس ماشي و خلاص .. بس أحنا أنسان و مش معيز ولا خرفان و ربنا هدينا هديه جميله اوي اسمها العقل و مش مهم الناس ماشيين ورا بعض على فين المهم انا عايزه اروح فين !!! مش مهم المكان اللي الناس كلها قررت تروح له من تعليم معين او شغل معين او اي حاجه معينه محطوطه لينا غصب و اقتدار و المهم انت حلمك ايه و نفسك في ايه و أجري حققه ^_^ أنا ممكن جداً يكون أحلامي كتير اوي و بعيد عن بعض و كل شويه بتوضح الرؤيه اكتر شويه .. بس مش مهم بالنسبه لي ابداً القطيع ماشي على فين !! مهم جدا أن أنا عايزه أحقق كل أحلامي !!!
أنا عايزه أذاكر أداره أعمال و أفتح مشروعي اللي هيخدم المجتمع و هيغير فيه للأحسن و أكتشفت اني بحب الكتابه و يمكن أكتب في مجله مشهوره ولا جرنال و مش بعيد يتنشر لي كتاب و بحب التلفيزيون و نفسي سكون لي برنامج أذاعي و برنامج تلفيزيوني كمان .. مش عيب الجنون في الاحلام بس العيب حاجتين انك تحلم احلام خياليه او انك تموت احلامك عشان خاطر سواد عيون القطيع ^_^
كلمتين نصيحه في ودانكم: أحلاموا و اتجننوا في أحلامكم و أعملوا المستحيل عشان تحققه الأحلام دي !!!
Comments
Post a Comment