قالوا عليك
كل واحد فينا عين نفسه قاضي .. و بنقول على بعض كلام و بنسمي بعض اسامي برضاك او غصب عنك .. ممكن يكون كلام ايجابي و ممكن سلبي .. ممكن تكون حاجات فيك و ممكن حاجه مالهاش علاقه بيك .. وارد جدا يكون كلمه سر عشان لما يتكلموا عليك انت ماتفهمش انه اللي بيتهزأ دا انت اصلا و مش بعيد يقولوا لك ان دا اسم حد تاني عشان تتريق على نفسك انت شخصيا ...
كلنا من النوع اللي بنقسم و نقول على بعض كلام .. انت بتعمل كدا و انتي بتعملي كدا و حضرتَك و حضرتِك كمان .. اقول لكم حاجه: أنا كمان اوقات بعمل كدا و نفسي أبطل!! كل واحد فينا بيعمل كدا أوقات او لفئه معينه او على طول ...
و لو شوفنا بنت لبسها كله بنطلونات و تيشرتات بنقول دي مسترجله .. و لو شوفنا تربون و سبانش نقول حرام و عيب .. لو بنت هاديه و ساكته تكون تنكه و شايفه نافسها و لو مُتكلمه و اجتماعيه تكون هبله و متسرعه .. لو تخين او تخينه نقول كرمبه و لو رفيع او رفيعه نقول معصعص ...
دا بالشكل كدا !!!
لو سمعنا واحد او واحده بيتكلموا English كويس جدا نقول بيطنطت علينا و لو الEnglish نص نص نقول ليه كدا و بيحرج نفسه دا بيئه اوي و لو مافيش English خالص نقول ايه دا انت واخد محو اميه ولا ايه ...
دا بس باللغه !!!
لو اتكلمنا على قصه الشعر .. ولد سيس اللي بيحط gel و بنت مسترجله اللي قصه شعرها قصير و فاكره نفسها barbie اللي سايبه شعرها طويل و لو ولد شعره طويل ولا عامل ديل حصان نقول دا بنوته اوي ...
دا بس الشعر !!!
الواحد مش عارف يرضي الناس ازاي !! لا البنت المسترجله نافعه ولا الدلوعه نافعه .. لا الولد اللي عامل ديل حصان نافع ولا الولد اللي بيحط gel نافع .. لا اللي بيتكلم English نافع ولا اللي بيحاول نافع ولا اللي مبيتكلمش اصلا نافع .. التخين مش عاجب ولا الرفيع عاجب .. لا اللي شايف نفسه نافع ولا الاجتماعي حلو !!!
ايه ننتحر ولا نكتأب ولا ايه الحل؟!
ببساطه كدا ^_^
أولا: مش من حق اي حد انه يصنف حد و رأيك لنفسك مش أكتر و مش معنى انك شايف حاجه هتكون دي حاجه مش قابله للغلط ...
ثانياً: مش مطلوب منك تعجب حد و مش مطلوب انك تعيش خايف من كلام الناس .. و لعلمك كدا كلام الناس دا كله بيخبوا بيه ضعف شخصي او عقده عنده ...
من الأخر زي ما بتتكلم على الناس و بتصنفهم انت كمان بيتكلموا عليك و بيصنفوك !!!
مش مطلوب منك تحب كل الناس و تتعامل مع ناس انت مختلف عنهم .. بس لازم تحترم الناس عشان الناس تحترمك و لو لازم تتعامل مع حد يا تتعامل صح و كويس يا بلاش احسن لك و احسن له :)
حُب الناس كنوز .. متصاحبش اللي شايفهم مختلفين عنك بس عاملهم حلو و سلِم و صَبح و مَسي و ابتسم في وشهم .. و دا مش معناه ابداً انك تكون اهبل بس معناه ان يكون عندك حسن ظن و بلاش نتكلم على بعض و نقول كلام على بعض ملوش أي دليل!!
Comments
Post a Comment