و من الكراكيب حياه ...
امبارح كنت برتب مكتبي و كراكيبي عشان السنه الدراسيه الجديده-ثالثه جامعه .. بس دي عاده و ربنا ما يقطع لكم عاده من و انا في اولى ابتدائي بكتشف ان المدارس داخله لما الاقي ماما بتقول يلا نضفوا المكاتب و شيلوا الكتب و الكراسات القديمه عشان يكون في مكان للجديده .. و قبل المدرسه بيوم ولا اتنين ننزل نجيب الاقلام و الكراسات و المقلمه و التفاصيل دي ...
الموضوع دا استمر لحد ما دخلت الجامعه و لحد ما هتخرج كمان ^_^
بس دايما كان في ورق مش بتخلص منه و قواقع و قصاقيص ورق ملون و اقلام ملونه و notebooks انا اللي عملها و مش برميها ابدا ابدا .. و لما قعدت اروق الحاجات بتاعتي اتبسط اوي و انا شايفه ذكريات الhighschool و سنين الجامعه اللي عدت و القواقع اللي بجمعها و الشعب المرجانية و العقد اللي بحبه لما اتقطع احتفظت بأحجاره و قصاقيص المجلات و لعبي الصغيره ...
لقيت حاجات مني .. حاجات هي السبب في اني اكون انا بتاعت دلوقتي ^_^ من زمان و انا بقطع المقالات اللي عجباني من المجالات و اشيلها يمكن دا سبب اني اكتب دلوقتي .. من زمان و انا بحب اكتب كلام يشجعني لسا موجود و بيشجعني .. من زمان و انا بحب حاجات بالوقت تطورت و بقيت جزء لا يتجزء مني ...
و من الكراكيب حياه!! حياتي و حياتك من كراكيبنا و الحاجات اللي بنحبها اللي بترسم مستقبلنا و حياتنا كلها .. اوعى ترمي الحاجات الصغيره اللي بتحبها و احتفظ بيها و كل شويه ارجع لها تاني و اتفرج عليها و خاليها قدامك مش في الصندره ولا النيش ولا البلكار و شوف تفاصيلك و افتكر ذكرياتك و شوف صورك و اتبسط اوي اوي ...
الكراكيب سعاده ^_^
Comments
Post a Comment