أيه سبب وجودك في الحياه؟ هنا و دلوقتي بالذات؟
الحياه رحله بتوجع أوي كدا .. رجلك متعوره جامد .. في ناس توقف و متكملش لأنها تعبت أوي و رجلها مش قادره تمشي ولا خطوه كمان و في ناس بتعافر و تكمل و أكيد رجلهم في يوم هتخف !!
في الحياه اللي أهم من أنك توصل لحاجه معينه و هدف بعينه هو أنك تكون مبسوط و تموت راضي ...
فكر كدا في الأسئله دي:
- أنا موجود ليه هنا؟
- أنا موجود ليه دلوقتي بالذات؟
- أنا موجود ليه هنا بالذات؟
الفكره في الحياه أعمق بكتير من أنك توصل لهدف بعينه .. الفكره هي أنك لما تموت تكون راضي .. ماتقولش ياريتني ضحكت أكتر ولا ياريتني أشتغلت أكتر ولا ياريتني بطلت كسوف ولا ياريتني نمت على القد و بس ولا ولا ولا ...
في فكرتين في أنك تعيش حياتك ب رضا و سعاده و تموت مرتاح و راضي و مبسوط:
- عيش كل يوم و كأنه أول يوم في حياتك...
- عيش كل يوم و كأنه أخر يوم في حياتك...
لما تعيش كل يوم كأنه أول يوم في حياتك .. هتعيش زي الأطفال .. كل حاجه من أصغار حاجه لأكبر حاجه بتبهرهم جداً .. أصله كطفل بيعمل كل حاجه لأول مره .. بيمشي و بيأكل و بيتكلم و بيلعب و بيتعرف على الناس .. كل حاجه هي أول مره بالنسبه لهم ف المتعه و اللذه موجوده جداً ف السعاده و الرضا و الراحه موجوده بردو ...
أما لو عيشنا كل يوم على أنه أخر يوم في حياتنا .. هيكون عندنا صراحه أوي و معندناش الطاقه للمجامله أصلاً و لأن الناس مش فارقين معانا و نفسنا أهم عندنا من غيرنا .. مفيش حاجه تخسرها ف هتاخد مخاطر أكتر بكتير في حياتك و لما تاخد مخاطر ببساطه هتتعلم أن الحياه مزيج بين النجاح و الفشل ...
أقول لك حاجه حقيقيه .. عيش كل يوم كأنه أول و أخر يوم في حياتك .. ببساطه هتستمتع بكل حاجه و هتفرح بأقل حاجه بتعملها و في نفس الوقت هتهتم بنفسك و هتدلع نفسك و هتفرح نفسك و كمان هتتعلم أن الحياه نجاح و فشل مجتمعين في مكان واحد و بس ...
لو عرفت سبب وجودك هتعيش للهدف دا .. مش بس كدا لما يكون في هدف في حياتك هتعيش راضي و مبسوط و مرتاح و هتموت بردو راضي و مبسوط و مرتاح .. لأن عرفت أن ربنا خلقك لسبب سامي و عشان تعمل تغير لأن وجودك من عدمه يفرق كتير أوي أوي !!
يلا روح كدا في رحله البحث عن هدفك في الحياه و تنفيذ الهدف دا هو رحله الحياه بالنسبه لك ^_^
Comments
Post a Comment