طلع الشيف اللي جواك
طلع الشيف اللي جواك!! شعار قنوات جديده اليومين دول .. و بما أن أنهم فاتحين في بلاد عربيه عموماً و مصر خصوصاً ف أي حاجه لها علاقه بالأكل بتكسب و بتفضل .. و الله من أول عربيه الفول لأغلي restaurant ...
ف أكتشفنا فتافيت و ن بعدها طلع سي بي سي سفره !! و دايماً أمي و أختي بيحبوا القناه دي أوي أوي .. مع أن أمي بتطبخ حلو أوي والله و أختي صغيره عندها 16 سنه يعني .. و بما أني قاعده معاهم قولت لازم أكتب اللي بشوفوا .. أه من اللي بشوفوا أه !!!
سي بي سي سفره .. في برامج تحس أنك في بلد غير البلد و أتيكيت و طرق تقديم الأكل للأطفال و تورتات و حركات جامده جداً .. أنا بتستهوني البرامج دي جداً .. ببساطه بيعلموا فن الطبخ الحديث ب أكلات من حول العالم متنوعه مع شويه معلومات عن التغذيه و شويه اتيكيت مع أن مثلاً شعرهم بيوقع في الأكل و أيدهم من اللحمه للخضار .. بس بصراحه بحبهم أوي يا خال الناس دي ...
ندخل على المدرسه الكلاسيكيه المصريه في الطبيخ و بردو من سي بي سي سفره .. و تلاقي البيت المصري من أكل مصري بسيط و سهل مع القليل من الأبتكار او الأختلاف و مكونات سهله و بسيطه .. مع نصايح الأم المصريه في تربيه العيال "أضربوا على بقو بالشبشب" و English مضروب في الخلاط ملناش دعوه بيه و مكالمات الأمهات و الجدات عشان حماده يشرب اللبن الصبح و ياكل أكله كله مع شويه سهوكه "أنت أحسن شيف في مصر" و الجو دا ...
و الله مش زعلانه .. الأختلاف مطلوب جداً .. بس أنا بختلف معاهم في حاجات بسيطه جدا زي أن حضرتك شيف مش هاني سلامه ولا أحمد عز عشان يكلموك يحبوا فيك .. و حضرتك مش محاضره في التنميه البشريه ف مفيش داعي للنصايح دي !!!
نوعين الشيفات على قناه واحده و أنا بحبهم والله .. النوع الأول له أسلوبه و التاني له أسلوبه و مش معترضه لأن لولا أختلاف الأذواق لبارت السلع .. بس لو كل واحد أتكلم في المجال بتاعه هيكون أحسن كتير أوي لو مجالك الطبيخ كن شيف ناجح و لو مجالك التغذيه اهتم بكونك شيف دارس و اهتم بنشر الفايده للناس .. بس لو أنت مش عالم ولا قارئ حتى في علم النفس و التنميه البشريه بلاش نبهر الناس بالنصايح-ممكن تعملي برنامج مشترك مع حد دارس .. و بلاش خالص مكالمات أسامه منير و بنحبك و بنموت فيك أو .. و حماده اللي مش بيشرب اللبن ولا بياكل الاكل-ممكن بردو نعمل برنامج مشترك مع أخصائي تغذيه أو تربيه أطفال مش أشرب اللبن عشان خاطر عمو و كل أكلك كله عشان تكبر !!!
ماتزعلوش مني .. بس أعتبروه نقد بناء لأني قولت أزاي نصحح الأخطاء دي و كمان عرضت نوعين الشيفات في مصر لحد دلوقتي و قولت الحلو و الوحش في كل نوع فيهم !! ف أعتبروه نقد بناء و بلاش زعل ^_^
Comments
Post a Comment