باربي الزمن الحالي

دلوقتي أنا بتكلم عن الباربيهات بس هيجي يوم للبرينز تشارمينج اوعوا تقلقوا والله .. المهم دلوقتي نركز على البرنسيسات اللي كلهم تحولوا لبربيهات و أي حد غيرهم اصبح يع و اع و كل الالفاظ اللي بتدل على الاشمئزاز و القرف-تحس ان في حبهان تحت ضرسهم كدا- و أصبحت اي بنت مش باربي بيئه موت و مش كلاس خالص !!!

يعني ركزوا كدا في البنات اليومين دول:

• كل البنات صابغين شعرهم فاتح (بني-أصفر-نص أصفي) 
• كل البنات ضاربين الlenses (زرقا-خضرا)
• كل البنات وزنهم يتراوح بين ال40 و ال50 بالكتير
• كل البنات المحجبات مشمريين الكم للكوع و البنطلون فوق الخلخال و الاشارب تربون-مش هتكلم في الحرمانيه أنا بس بتكلم في الشكل-
• كل البنات لابسين كعب و كأنهم مولودين به بس المصيبه انهم بيعروجوا و تحسهم ماشين على الحبل
• كل البنات حاطين eyeliner و محددين عينهم و مزودين الرموش و الmascara عشان السحر الجبار للنظره و طبعا لازم الlip liner و الlip stick و الlip gloss بالمره
• كل البنات لابسين نفس شكل البنطلونات و التيشرتات و الdresses و الskirts .. حتى نفس الاكسسوار
• البنات كلها بتاخد selfies و ضاربين البوز و أشتروا الselfie stick كمان

طبعاً ما خفي كان أعظم بكتير !!! المهم أنتم مبسوطين و انتم كلكم شبه بعض كدا !!! نفس الشكل و نفس اللبس دا حتى نفس رسمه الحواجب .. ممكن الشكل يكون حلو-مش دايماً- بس الروح مش موجوده غالباً .. مش هكون قاسيه اوي بس انا لو شوفت كتب كتير بنفس الغلاف(الشكل) هشوف كتاب واحد و خلاص مش هقرأ كل الكتب دي يعني !!!

المصيبه الكبرى بالنسبه لي ان البني أدمه الطبيعيه دي:

• شعرهم طبيعي او على الاقل مناسب ليهم
• عينيهم بطبيعتها او على الاقل lenses ماشيه معاهم
• وزنهم منطقي جدا و مناسب و متناسق و مليانين شويه فوق ال60 كيلو يعني
• المحجبين محجبين عادي زي زمان ايام ما كان الحجاب لربنا مش موضه و الكم طويل و البنطلون طويل و ممكن يكون skirt او dress 
• الكعب وقت الحاجه حتى لو قصيره و الflat مكتسحه الساحه 
• المكياج بالمعقول و بالمناسب للوقت و المكان و الشكل 
• اللبس بالمناسب للجسم مش بالناس بتلبس كدا
• الselfie واحده ولا اتنين عشان الاحتفاظ بالذكرى مش 102 و مش عاجبها اصلاً و نفسها في مصور بروفيشينال ليل و نهار يصور فيها

باربي الزمن الحالي شايفين الكائنات الطبيعيه جدا دي مش طبيعين خالص و مجانين أنهم مش شبه الأغلب !!! أنتي أزاي مش صابغه شعرك أصفر و بني .. ولا لابسه lenses زرقا ولا خضرا .. و وزنك ازاي مش تحت ال50 .. و انتي ازاي محاجبه زي مامي و تيتا كدا دا حتى ماما و تيتا اتجهوا للتيربون .. لاء ماتقوليش انتي مش بتلبسي كعب Oh my God .. طب الmake up يا بنتي انتي عاجبك شكلك كدا .. طب و لبسك دا قديم اوي على فكره و مش على الموضه خالص .. يعني ايه كفايا اتنين selfie مش اقل من 200 ...

باربي أرحميني !! خاليكي في نفسك و سيبي بنات الناس في حالهم ونبي !! عايزه أشوف أرواح مش أشكال و خلاص ...

أنا مش أوفر ولا مزودها-لا والله .. أنزلوا في الشارع و تأملوا البشر كدا شويه .. ركزوا في البنات-الباربي ظاهرين اوي ماتخفوش و موجودين كتير في جميع المستويات الأجتماعيه و الماديه و المولات و النوادي و الجامعات و الافراح و الاعياد ميلاد و مؤخراً المدارس .. تحس ان البنات طالعين من الحرافيين على هنا على طول (شويه سنفره و دوكو و زبط هوا .. يعني رطوش بسيطه كدا) ...

الموضوع بدأ من أول ما لعبنا ب عروسه باربي الطويله و رفيعه و بشعر اصفر و بعينين ملونه و لبس على سنجه عشره و كعب عالي !! ليه منشجعش الصناعه المحليه و نلعب بكرنبه اللي لابسه فستان بكرانيش و شعر غامق و تخينه و بتأكل ايس كريم !!

طب ليه مفيش عرايس مختلفه بأشكل شباهنا أكتر بمختلف أشكلنا !! 

و نبي انا بنت زيكم قبل ما حد يقول اني ولد متخفي و انا عندي 20 سنه قبل ما حد يقول اني كبيره و بخرف او زهقانه من عيالي و احفادي .. بس فعلا زهقت من الشكل الواحد دا و نفسي أشوف أشكال كتير و أرواح الناس تظهر على وشوشهم !! فين الأختلاف و الكلام بتاع أن نفسنا نكون متميزين و أن الناس تشوفنا بأروحنا و شخصيتنا مش أشكلنا و بس !!

كلمتين ملخص الزن دا كله-ونبي ما تزعلوا مني: الشكل مش كل حاجه خالص و مش أهم حاجه اصلاً .. المهم ان صحتِك تكون كويسه و انت مرتاح في شكلِك .. مش مهم اللبس ماركه ولا سعره ايه المهم انه لايق عليكي .. مش مهم اي حاجه غير انك تكوني مرتاحه و روحك مبسوطه اوي ^_^

أحنا عايشين عشان روحنا تكون مرتاحه و نكون مبسوطين مش عشان نقلد الناس و نعيش مسخ مش أصل :)

*"كل" اللي موجوده كتير في المقال دي معناها الأغلبيه العظمى !!