comfort zone المزعومه !!

أنا بكره الcomfort zone و دي حاجه أنتم كلكم عارفينها و كمان شايفه أن بدايه الحياه في نهايه الcomfort zone بتاعتك و عشان توصل لنهايه الcomfort zone أنت محتاج جراءه و مواجهه و مساعده من اللي حوالينا .. و مطارده الcomfort zone و الوصول لنهايتها و البعد عنها كمان مش سهل أبداً و بيبدأ من أول القرارات للتنفيذ .. تحدي الcomfort zone ممكن يكون من أول قرار انك تتجوز او تخلف او تلف العالم او تشتغل حاجه معينه او تغير مجال دراستك .. تحدي الcomfort zone هو أنك تعمل حاجه أنت مش مرتاح لفكرتها في الأول ^_^

أول تحدي بالنسبه لي كان المدونه دي .. مش موهوبه من صغري و كنت بغلبهم في البيت عشان أعرف أكتب موضوع التعبير ولا الessay و كنت مش شاطره اوي فيهم و كمان دا مش مجال دراستي .. بس قررت أتحدى نفسي و أعمل مدونه و أكتب فيها و أتعلم واحده بواحده .. و التحدي دا نجحت فيه و بأكتب في المدونه و أسلوبي في تحسن و بدأ يكون عندي ناس متابعه لكتابتي و بتحبها كمان و بدأت أكتب في البوابه الألكترونيه لروزاليوسف ...

تاني مره في الجامعه كانوا جايبين هرم كدا فيه دراجات و المفروض اني اتسلق الدراجات دي لأرتفاع معين .. قولت أجرب و اول مره مطلعتش غير تقريبا خطوتين من السلم الصعب دا - و الله صعب جدا لشخص مالوش في الرياضه زي حالتي كدا - و تاني مره طلعت لنص الدراجات تقريبا .. أه كان في معاناه و كنت مرعوبه اقع من فوق بس حصل خير و موقعتش و عايشه بدوشكم ...

تالت تحدي بالنسبه لي كان أمبارح (22 أغسطس 2014) .. أنا مش سباحه و مش بعرف أعوم غير كلابي كدا و يا دوب بعرف ماغرقش يعني .. بالأضافه لأني قصيره و طولي 154 سنتيمتر و لو حمام السباحه عمقه 170 سنتيمتر مش بروح لأغرق ولا يجيلي cramps ولا أي سبب تاني .. و لما جربت من شهر و شويه كدا كان صعب جدا العب waterpolo في مكان ماليش فيه طول .. بس أمبارح أنا كنت في حمام سباحه نصه عندي طول و النص التاني عمق حمام السباحه 3 متر و نص - يعني العملاق مالوش طول - أنا شخصيا مش شايفه الأرض و مهما حاولت انزل مش بلمس الأرض حتى .. و لكني عمت رايح جي 3 مرات .. اه سباحه كلابي و اه تعبت شويه بس أثبت لنفسي اني مش هغرق و أني أقدر في عمق 3 متر اعافر و اوصل للشط و أكيد هعرف أعمل كدا و ألعب waterpolo في ال170 سنتيمتر ^_^

أنا مش قصدي أحكي مجد شخصي بس قصدي أقول أن دول كام مره اللي واجهت فيهم خوفي الى حد ما و تحديت الcomfort zone بالنسبه لي .. أكيد في مواقف أصعب من كدا و أنا عارفه ان التلات حاجات دول هبل اوي و في اصعب 100 مره .. تحدي ان شخص يطلع جبل او يلف العالم او يعمل bungee jumping دا اصعب بكتير و تحقيق الحاجات دي ممتع اكتر .. بس مش الهدف انك تخوف نفسك أو تصعبها عليك .. المهم انك تواجهه خوفك و تقف "وقفه مع التفس" و تتحدى نفسك و تتحدى الcomfort zone .. أوعى تخاف ^_^

أوعى تخاف أنك تواجه اللي بيخاوفك :)