انتحار أجتماعي !!!

• فلان الفلاني likes your status !!
• فلانه الفلانيه likes your photo !!
• أنسان غير موجود في الوجود likes your note !!
• عفركوش commented on your status !!
• أم جلامبو commented on your photo !!
• حمبوزو commented on your note !!
• أبو رجل مسلوخه shared your status !!
• دودو shared your photo !!
• أم أربعه و أربعين shared your note !!

دي مواقع التواصل الأجتماعي .. 100 notification و 10 facebook messages و 5000 whatsapp messages و كمان الtwitter و الinstgram و ما خفي كان أعظم ...

طب ونبي دا تواصل أجتماعي ولا أنتحار أجتماعي دا .. راضي عن نفسك و حضرتك يا طنط راضيه عن نفسك !! طب لو أعتبرنا دا طيش شباب بالنسبه لفئه ما فوق ال50 و عندهم accounts على واحده او اكتر من مواقع التواصل الأجتماعي و مبيقدروش يعيشوا يوم منغيره !! طب هو مش طيش الشباب دا زي حبوب الشباب كدا بتروح علي العشرينات ايه حوار الأربعين فيما فوق دا ؟! طب الحياه قبله كانت عامله أزاي يا حج ولا يا حاجه ؟ و المصيبه يقولك انا مش عارف/ه ازاي كنت عايش/ه قبل الsocial media ...

طب حاجه صغيره كدا .. جيل العشرينات فيما تحت نفسه يعيش منغير social media و مش قادر يتخيل كنتوا عايشين أزاي و ايه وسائل التسليه و نفسنا نعرف و نجرب اه و ربنا .. بس هنعرف منين و لا هنجرب أزاي لو كان الأهالي من أباء و جدود مش فاضيين .. مش بس كدا دول مش عارفين يعيشوا منغير smart phone و tablet و social media ...

المصيبه الأكبر أن مستوى الثقه بالنفس متوقف علي عدد الlikes و الcomments و الshares .. مش بس كدا حضرتك .. دا في كم غيره و حقد و عيون مدوره مش بتروح لا بخمسه و خميسه ولا بخور ولا عين الحسود فيها عود .. ولا الطبل الأزرق بيبطل العين و الحسد و الحقد .. ربنا يحفظنا و مش قدامنا غير المعوذتين بس مش هينفع حياتنا برانا كدا !! يعني سافرت أي مكان مش لازم مصر كلها تعرف انت فين و بتعمل ايه و بتتفسح فين !! و مش لازم كل 5 ثواني صوره !!

و يا لهوي علي سوسو لو جاليها likes أكتر من توتو .. ليله سوسو سودا و مش بعيد تاخود يومين في العنايه المركزه !! لا و لو فوفو اتجوزت قبل يويو تكون ليله و يويو تعيط و فوفو فاكيد هتطلق في خلال سنه لو كملت ! ! و المقارنه على ودنه .. تيتو خد ترقيه مع ان سنه زي ميدو و ميزو عروسته أحلي من سونسون و لومي عريسها احلي من بوبو!!

مش قصدي خالص اننا نكون متخلفين و نقفل النت علي البلد او نحجب مواقع .. بالعكس .. انا بس ضد ادمان الsocial media لدرجه ضررها اكتر 100 مره من نفعها .. الsocial media مش بس بتضيع الوقت في حاجه في افيد منها كتير .. لاء دي كمان بتقتل العلاقات الاسريه و المهارات و بتجيب كسل و بتقلل الثقه بالنفس او تزودها انت و حظك .. مع أن ممكن جدا نخصص وقت معين في اليوم للsocial media و نعمل حاجات تانيه باقي اليوم ممكن مثلا نتعلم حاجه جديده او نكتشف موهبه او نتعرف على ناس من لحم و دم او نشتغل او ندرس .. في مليون حاجه غير الsocial media ممكن نعملها ...

انا عندي 20 سنه و من جيل النت و طبعا في اوقات كتير بتضيع فالsocial media و لكن انا كنت لحد اولى اعدادي مكنش عندي موبيل و في مرحله اعدادي بردو كانت اول مره اعرف يعني ايه facebook و بعدو اتعرفت على الباقي و لحد اولي جامعه مكنش عندي whatsapp .. بس من وانا عندي 3 سنين و انا عندي كمبيوتر و نت و بدخل اعمل اللي مناسب لسني يا اما لعب يا اما google ...

من الأخر مفيش حاجه وحشه عموما ولا حاجه حلوه عموما .  كل حاجه فيها و فيها .. لو عرفت نفسك صح و وثقت في نفسك بعيد عن لولو و سوسو و توتو و بيبو و كل الناس دي و قسمت وقتك صح .. هتعيش ملك الملوك :)

يلا عيشوا حياه حقيقيه و بلاش تكون كل حياتكم افتراديه .. و الكلام دا قبلكم ليا .. و صدقوني مش هتموتوا منغير الsocial media .. فتوكوا بالعفيه ^_^